A Ch'an̈ Schab'l Libro Samuel 8 - Chuj San Sebastian Bible

Ya'jnac ganar David jun tzo'n̈ owal

¹ Ax David yet' eb' soldado 'ix ya'n eb' owl yet' eb' filisteo. Ax x'aji, x'ajx ganar eb' filisteo yuj eb'. Yuj cha, xcancn eb' 'a yol sc'ab', x'ochcn eb' 'a yaln̈ schecnb'il.

² An̈jtona', xya'n ganar David eb' moabita. Xya'n 'em n̈ojn eb' 'a sat lu'um, xlajw cha, xyechtan yet' jun ch'an̈ tz'echtan lu'um. A jantc mach tzcan 'a yojl chab' ch'an̈il, tzcham eb', ax eb' tzcan 'a yojl yoxl ch'an̈il, matz cham eb'. 'Ixta 'ajnc yochcn eb' moabita 'a yaln̈ schecnb'il David, x'ochcn eb' yac' stojlb'al 'a 'a.

³ Ya'jnar pax ganar David win Hadad-ezer, atn win yunnal Rehob, win sreyl Soba, yic wan s'at win Hadad-ezer chi 'at scha 'i'nc 'ec' slum macb'il yuj 'a sti a Éufrates.

⁴ Ax x'aji, 'ix yamchj can 1,700 eb' soldado yuj David 'a scal owl cha, atn eb' 'et'jnac te caruaje yic owal, ax junc'l mil eb' tzb'ey 'a yoc xyamchj can paxi. Stzu'n pax n̈i'chjoc sch'an̈l yoc smasnil no chej to'jnac jun tzo'n̈ caruaje cha, cojxn no tzto'n junc ciente caruaje chi xcani.

⁵ Xlajw cha, xjaw eb' sirio 'ay 'a yol yic Damasco, yic tzwul colwjoc eb' yet' Hadad-ezer win sreyl Soba cha, palta xlajw 'el eb' sirio chi yuj David, 'ay chab'schawinc mil eb' xcham yu'uj.

⁶ Yajn̈j wal cha, xya'n 'och David eb' soldado yet' scamplamento 'a yol yic Damasco cha, 'ixta x'ajcn eb' sirio chi scan 'a yaln̈ schecnb'il David, syamn 'och eb' ya'n stojlb'al 'a 'a. Ax Jehová a tz'a'n yac' ganar David owal, yaln̈j 'ajtil tz'ati.

⁷ Xlajw cha, xyi'n can 'ec' David jun tzo'n̈ tzmacn sat jul-lab' nab'a oro 'a eb' soldado yic Hadad-ezer, 'ix yi'n cot 'a Jerusalén.

⁸ An̈jtona', caw wal niwn pax q'uen bronce, xyij 'ec' rey David 'a chon̈b' Betá yet' 'a Berotai, atn jun tzo'n̈ chon̈b' 'ay 'a yol smacb'en win rey Hadad-ezer.

⁹ Yuj cha, ax Toi win sreyl Hamat, a yic xyab'ni chajtlto 'ix lajw 'el smasnil eb' soldado yic Hadad-ezer yuj David,

¹⁰ 'ix schecn 'at jun yunnal tzcuch Jorám 'a rey David; xya'n 'at pax q'uen plata, q'uen oro, yet' q'uen bronce, yuj ya'n stzatzl sc'ojl David cha, yet' pax yuj yaln wach' paxti 'a 'a, yujto a Toi ya'jnac pax owl yet' Hadad-ezer cha.

^11-12 A smasnil q'uen schaj David 'a winac, 'ix yac' 'a Jehová, yet' pax q'uen x'e'cn 'a yic x'och owl yet' Hadad-ezer win yunnal Rehob sreyl Soba, 'icha ya'jnac yet' jun tzo'n̈ tas yijnac 'ec' 'a jun tzo'n̈ xo nacion̈ 'aj 'ix yac' ganar owal: Atn 'a Edom, 'a Moab, 'a Amón, 'a eb' filisteo, yet' 'a eb' amalecita.

¹³ Caw wal xb'inax David si'mb'il. Ax yic xmeltzj 'a yic xlajw ya'n owl yet' eb' 'aj Siria, 'ix smiln cham can pax wajxclajn̈e mil eb' edomita 'a lum pan̈n 'a'lic yic 'atz'am.

¹⁴ Yajn̈j wal cha, xya'n 'och David chi eb' soldado stan̈malc chon̈b' Edom, yuj cha, smasnil eb' edomita cha, 'ix 'ochcn eb' 'a yaln̈ schecnb'il. Ax Jehová, a tz'a'n ya'n̈j ganar, yaln̈j 'ajtil tz'ati.

Eb' soldado David

¹⁵ A David 'ix yac' reyl 'a yib'n̈ smasnil eb' yit israelal, wal 'a stojlal, yet' 'a swach'il. Wach' xyutj ya'n yopiso 'a yol schon̈ab'.

¹⁶ A eb' 'ix ya'n yajlil yet'oc, atn eb' tic: Win Joab yune 'ix Sarvia, a win syajlil eb' soldado, Josafat win yunnal Ahilud, a tz'ib'n yab'xil tas tzb'o win rey.

¹⁷ Sadoc win yunnal Ahitob, yet' Ahimelec win yunnal Abiatar, sat ya'mal 'och sti eb' 'anma 'a Dios yaj eb'; Seraía, 'ajtz'ib' yajch 'a win rey cha.

¹⁸ Benaía win yunnal Joiada, yajl yaj 'a eb' soldado tztan̈wni rey David, atn eb' quereteo yet' eb' peleteo. Ax eb' yunnal David cha, sat yajl yaj eb' 'a eb' yajl cha.