A Ch'an̈ Schab'l Libro Samuel 7 - Chuj San Sebastian Bible

Jun strato Dios yet' David

¹ A yic 'ayx 'och rey David 'a sdespacho, yic tox xya'ch Jehová junc'ojlal 'a scal Israel yet' smasnil eb' 'ajc'ojl oyn 'och 'a 'a,

² 'ix yaln David 'ixtc 'a win Natán atn win schecb' Dios: —'In tzela, to nab'a c'ute stel watut 'aj cajn in 'eq'ui, ya' sb'a ax te scaxail strato Dios, ata 'aych te 'a yol jun mantiado, xchi.

³ —B'o smasnil tas tza nib'j a b'o', yujto tzcolwjn̈ej Jehová et'oc, xchi Natán.

⁴ Palta xpaxtin Jehová 'a Natán 'a jun 'ac'wl cha, xyaln 'ixtic:

⁵ 'Ixic, 'at al 'a in checb' David, to an Jehová in, an tzwal 'a 'ixtic: Man̈oc ach 'oj a b'o chan̈ junc watut 'aj 'oj in can cajan.

⁶ Yictax wi'n 'elt eb' e mam eyichm 'a Egipto, masnto 'a jun c'u tic, may xon 'ajtil in 'aj 'a yol junc n̈a, palta to an̈j 'a yoltc mantiado tzin 'eq'ui.

⁷ A jantc tiempo in b'eyc' yet' eb' in chon̈ab', may 'ajtil waljnac 'a eb' syajlil eb' tz'i'n b'eyoc, to tzb'o eb' junc watut nab'a c'ute tz'och 'a 'a, xchi Jehová, xa chi 'a 'a.

⁸ Tzaln pax 'a jun in checb' David cha, chajtlto an Jehová in tzta'n̈j wuj smasnil, an tzwal jun tic 'ixtc 'a 'a: An ach wij 'el 'a spatc no calnelu, yic tzach wa'n 'och syajlilc in chon̈b' Israel.

⁹ Tzann̈j 'ajtil ach 'eq'ui, caw 'aynn̈ej 'och et'oc, in satjnac 'el smasnil eb' 'ajc'ojl yajch 'ayach, xwi'n q'ue'ch a b'inab'ilal, 'icha sb'inax eb' niwc winc 'a yolyib'n̈q'uinl tic.

¹⁰ An̈jtona', in b'ojnac jun e lugar 'aj wach' tzex can cajn ax in chon̈b' ex tic. Man̈x 'a b'a'n̈ 'ay mach 'oj eyi'n 'el 'a 'a, man̈x 'a eb' tu snab'en 'oj eyixtn 'icha 'a yictax pecti',

¹¹ yic xwa'n 'och eb' eyajlil ex 'i'n b'eyoc. An 'oj wic' 'ejm smasnil eb' 'ajc'ojl yajch 'ayex. An Jehová in, tzwa'cn ojcoc to 'oj wa'chn̈ej yopiso eb' en̈til.

¹² A yic 'oj lajwc c'och a q'uinal, yic 'oj a chami, an 'oj wa'ch junc eb' onnal reyl a jeloc, ax wa'n yic' yip yopiso cha.

¹³ A 'oj b'onc chan̈ junc watut yic 'emmquilal cha, ax eb' yin̈tl 'oj ya'n̈j yajlil 'a sdespacho 'a smasnil tiempo.

¹⁴ An 'oj woch mamb'il-l 'a 'a, ax 'oj 'och 'unnab'ilal 'ayin. Toto 'ay 'aj 'oj 'och smul, 'oj wa'ch syailal, 'icha tzyac' junc mamb'il tz'a'n 'och tz'um 'a junc yunnal,

¹⁵ palta caw ma'oj wi'l in chamc'ojlal 'a jun cha. Ma'oj in b'o 'icha wa'jnac yet' Saúl, yic wi'n 'el 'a yopiso yic ach xo ach wa'cn 'och sjeloc.

¹⁶ An 'oj wa'xcan 'och en̈tl a jelc reyl 'a yib'n̈ in chon̈b' 'a smasnil tiempo, xchi, xa chi 'a 'a, xchi Dios 'a win Natán.

¹⁷ 'Icha wal xyutj Natán yilni, yet' tas xyab' 'a 'icha waychil, 'ixta wal xyutj yaln 'a David cha.

A slesl David

¹⁸ Yuj cha, 'ix 'och rey David, 'ix 'em wocn paxtinc 'a yojltac Jehová xyaln 'ixtic: Mamin Jehová Wajlil, ¿tas wal wilx tzela? An̈jtona', ¿tas pax yilx eb' in mam wicham, yuj cha, in a'n 'och 'a jun niwquil 'opiso tic?

¹⁹ 'Ix alni tas 'oj 'aj 'el'ch eb' win̈tl b'aq'uin̈. A jun a ley tzal tic, yic eb' 'anma smasnil.

²⁰ Man̈x 'a tas tztac' waln 'aych Mamin Jehová Wajlil, yujto ach tic, ojtac tas 'ayc' 'a in nab'en an a checb' in tic.

²¹ Smasnil jun tzo'n̈ paxti satjub'tac tic, ach 'ix ac' wojcoc 'eli, a tzyal 'ixta tz'el 'a a c'ojol.

²² Mamin man̈x jantcoc a jelnal, yujto may junc 'anma tztac' slajb'tzan sb'a et'oc. Caw may junc xo Dios lajn et'oc, cojxn ach ton Dios ach, a tzyal 'ixta tzcutj cab'ni.

²³ A pax a chon̈b' Israel tic, may junc xo chon̈b' lajn yet'oc, caw cojn jun nacion̈ tic a coljnac 'el 'a sat lum tic 'a yol sc'ab' eb' 'ajc'ojol, yuj yochcn a chon̈b'oc. Caw satjub'tac tas xa b'o yuj eb' a chon̈ab', yic 'ix e'n 'elt 'a Egipto; 'ix e'n 'el pax jun tzo'n̈ nacion̈ yet' sdiosal 'a yojltac eb'. Yuj cha, caw wal tzb'inax 'a b'i yuj eb' 'anma',

²⁴ yujto ach a'jnacn̈ 'och a chon̈b'oc 'a jun 'ejmn̈ej, ach xo Mamin Jehová, ach 'ochcn qui Diosalc on̈.

²⁵ A ticnec Mamin Jehová, 'el'ch cab' tas aljnac 'a 'ayn an a checb' in tic, yet' 'a smasnil eb' win̈til,

²⁶ sec wach' niwn cab' yel'ch a b'i 'a jun 'ejmn̈ej. 'Oj alxoc chajtlto ach Jehová tztac' oj smasnil, qui Diosal ach an̈ israel on̈ tic on̈. Ax eb' win̈til, caw te'n 'oj yutc sb'a eb' 'a ojltac ya'n reyal.

²⁷ Mamin Jehová tztac' oj smasnil, ach qui Diosal on̈, ach 'ix al wab'i', chajtlto a eb' win̈til, caw 'oj 'ochn̈j eb' yajlil, yuj cha, tzin te'wtzan in b'a waln 'ayach.

²⁸ Ach tic Jehová Wajlil, ach ton tic Dios ach, caw yeln̈j tas tzala, caw wach' tas 'aj xac' a ti 'ayn an a checb' in tic.

²⁹ 'El cab' wal 'a a c'ojol, 'ac' a yaxilal 'a yib'n̈ eb' win̈til, sec wach' te'n cab' yaj eb' 'a ojltac 'a jun 'ejmn̈ej. Ach tic Mamin, ach wal 'ix alcn jun tic. Yuj a wach'c'ojlal cha, caw wach' 'oj 'ec' yuj eb' win̈tl 'a smasnil tiempo, xchi David.