A Ch'an̈ Schab'l Libro Samuel 6 - Chuj San Sebastian Bible

Schamlil win Uza

¹ Xya'n pax David syam sb'a smasnil eb' soldado to caw jeln 'a scal eb' yit israelal cha, 'ay lajn̈schawinc mil sb'isl eb'.

² Xlajw cha, 'ix 'at David 'a Baala 'a yol yic Judá, ajun smasnil eb' soldado yet'oc yic tz'at yi'noc cot eb' te scaxail strato Dios, atn jun 'aj tzb'inax sb'i Jehová tztac' yuj smasnil, jun 'ay sdespacho 'a snan̈l eb' querubín.

³ A 'a yatut win Abinadab, jun 'ayc' 'a tzalan, ata 'aycn scaxail strato Dios cha. Xya'n 'och eb' te 'a yol jun te careta caw wal 'a'to, xlajw cha, xyi'n cot eb'.

⁴ Ax win Uza yet' win Ahío, atn eb' yunnal win Abinadab, a eb' 'ajcuenta x'aj yi'n b'ey te careta cha. A win Ahío b'ab'l yuj te'.

⁵ Ax David yet' smasnil eb' chon̈b' cha, yet' wal 'a smasnil sc'ojl eb', tzq'ue b'atn̈joc eb' yuj tzaljc'ojlal sb'itn 'a yojltac Jehová yet' jun tzo'n̈ yamc'ab' yic b'it, atn arpa, salterio, pandero, castañuelas yet' platillo.

⁶ Ax yic xjaw eb' 'a jun 'amc' 'aj tzte'x strigo win Nacón, 'ix ya'n 'at Uza sc'ab' 'a te scaxail strato Dios, yic tzyamn 'och wan te snani, yujto xtelw e no mam wacx to'jnac te careta cha.

⁷ Yuj cha, xcot yowl Jehová 'a win Uza, yujto scomn yamj win te scaxail strato Dios, yuj cha, xchamcn win 'a stz'ey te caxa chi muc'uc.

⁸ Caw wal xcot yowl David yujto xcham Uza yuj Jehová, yuj cha, scuchn can jun lugar chi Peres-uzá, an̈ja 'ixta sb'i ticnec.

⁹ A wal 'a jun c'u cha, caw xiw David 'a Jehová, yuj cha, xyaln 'ixtic: ¿Tas to 'oj wutc wi'n 'at te scaxail strato Jehová tic 'a 'aj cajn in 'eq'ui? xchi.

¹⁰ Yujto man̈x 'ic snib'j David xyij cot te scaxail strato Jehová chi 'a yol chon̈ab', yuj cha, xya'n David 'ijxoc can 'at te 'a yatut Obed-edom, win 'aj Gat.

¹¹ 'Oxe 'uj xcan te 'a yatut winac, ax Jehová, a x'a'n syaxilal 'a yib'n̈ win Obed-edom cha, yet' 'a yib'n̈ smasnil eb' cajn 'a yol yatut winac.

Xjaw scaxail strato Dios 'a Jerusalén

¹² Ax yic 'ix alx yab' rey David chajtlto yujn̈ej wal te scaxail strato Dios cha, yuj cha, tzya'n Jehová syaxilal 'a yib'n̈ Obed-edom yet' 'a yib'n̈ smasnil tas 'ay 'a 'a, yuj cha, x'at yi'nc pax David chi te caxa chi 'a yatut win Obed-edom cha. Yet' wal tzaljc'ojlal xyi'n cot David chi te 'a yol schon̈ab'.

¹³ A yic jab'nant scot eb' 'et'jnac te cha, 'ix ya'n David jun no quelm wacax yet' jun no mam calnelu caw b'a'ch xajmb'alil.

¹⁴ Ax jun chaleco nab'a lino yic eb' ya'mal 'och sti eb' 'anma 'a Dios, a 'aych yuj David, caw wal tzb'atj chan̈ yet' smasnil yip yuj tzaljc'ojlal 'a yojltac Jehová.

¹⁵ 'Ixta sb'o David yet' smasnil eb' yit israelal. Caw wal niwquil tzaljc'ojlal x'ochi, yic xyi'n cot eb' te scaxail strato Jehová chi 'a Jerusalén, caw wal tzya'l eb' yaw, tzyutz'n pax eb' strompeta yuj tzaljc'ojlal.

¹⁶ A yic xjaw te scaxail strato Jehová chi 'a yol schon̈b' David, c'uxn wal q'ueln 'elt 'ix Mical 'ix yisl win Saúl 'a swentnual yatut, ax xyilni to a win rey David, caw wal tzb'atj chan̈ yuj tzaljc'ojlal 'a yojltac Jehová; yuj cha, schab'c'ojlan 'el 'ix win 'a spixan.

¹⁷ Ax yic xjaw te scaxail strato Jehová chi yuj eb', 'ix sb'on 'och eb' 'a yet'l 'a yol jun Mantiado b'ob'il yuj David cha. Xlajw cha, xya'n David tz'a no xajmb'al, yet' no xajmb'al yic junc'ojlal 'a yojltac Jehová.

¹⁸ Ax yic xlajw ya'n jun tzo'n̈ xajmb'al cha, 'ix yaln wach' paxti 'a yib'n̈ chon̈b' Israel 'a sb'i Jehová, jun tzta'n̈j yuj smasnil.

¹⁹ 'Ix ya'n junjn 'ixm pan, yet' jab' b'olb'il chib'ej, yet' junjn te tacn̈ uva 'a smasnil eb' yit chon̈b' cha, xyac' 'a eb' winac yet' 'a eb' 'ix 'ix. Xlajw cha, 'ix meltzj junjn eb' 'a yatut.

²⁰ An̈jtona pax David, 'ix meltzj can pax 'a yatut, yic tzyaln wach' paxti 'a yib'n̈ eb' 'ayc' 'a yol yatut cha. Ax yic xc'ochi, x'elt 'ix Mical chi wul scha', xyaln 'ix 'a win 'ixtic: —A ticnec ach sreyl chon̈b' Israel, am a nani to wach' xotj a b'a xa ch'oxn 'el wal a b'a 'a sat eb' 'ix schecb' ewin a checab', caw q'uixweltac xotj a b'a 'icha junc comn 'anma', xchi 'ix 'a winac.

²¹ 'Ix ta'w David 'ixtic: —Yeltoni, in b'atj cha'an̈ palta atn 'a yojltac Jehová, yujto a in si'n 'och syajlilc chon̈b' sjelc a mam, yet' pax sjelc smasnil eb' ecan. Yuj cha, 'oj in b'atjn̈ej chan̈ yuj tzaljc'ojlal 'a yojltac Jehová.

²² An tic 'oj in b'on̈j tas tzal cha, wach'xam caw man̈x 'a jac wel'ch 'a a sat mto 'a a nab'en, palta a 'a eb' 'ix 'ix tzal cha, caw wal 'ay wel'ch 'a sat eb' 'ix, xchi David.

²³ A 'ix Mical cha, may xon junc yune 'ix 'aljnac.