A Ch'an̈ Schab'l Libro Samuel 22 - Chuj San Sebastian Bible

Sb'it rey David yuj xyac' ganar owal

¹ 'Ix sb'itnej rey David jun b'it tic 'a Jehová, yic sc'ul xcolx 'el yuj Jehová 'a yol sc'ab' Saúl, yet' 'a yol sc'ab' jun tzo'n̈ xo eb' 'ajc'ojl yajch 'a 'a.

² 'Ix yaln 'ixtic: Mamin Jehová, 'icha to in n̈aq'uen aji, 'icha to in cuartel aji, in colmal ach.

³ Ach in Diosal, ach 'aych 'och yipc in c'ojol, a 'aych tzin col in b'a, in tan̈mal aji, in colmal ach, caw wal 'ay ep. Oj wali, yuj cha, matz in yamchj yuj eb' 'ajc'ojl yajch 'ayin. Ach in a col 'a mach xnib'n in satn 'eli.

⁴ Ach Jehová, smoj wal yalx wach' paxti 'ayach; a yic tzin 'awj 'ayach, yajn̈ej tzin a coln 'el 'a yol sc'ab' eb' 'ajc'ojl yajch 'ayin.

⁵ A chamel, 'ix 'ec' oyyoc 'a in patic; 'ix jaw xiwc'ojlal 'ayn yuj eb' milm 'anma'.

⁶ 'Icha to tox x'och sut'n 'ayn 'icha lasu; a jun xab' oln yic chamel, 'icha to in syalej 'a junc ya'al.

⁷ A yic 'ayn 'ec' 'a scal in somc'ojlal, xwaln in b'a 'a Jehová, xin c'ann scolwal in Diosal, 'ix yab'n yel waw yic 'ayc' 'a yol yatut, ¡'Ix c'och waw 'a schiquin!

⁸ Xlajw cha, 'ix 'ec' jun niwquil quixcab', 'ix 'ib'x smasnil sb'achnub'al satcha'an̈; 'ix tzicb'tan̈x wal si'mb'il yuj yowl sc'ojl Dios.

⁹ 'Ix 'elt tab' 'a yol sn̈i', ax 'a yol sti', 'ix 'elt jun c'ac' tzsatn 'el smasnil tas. 'Ix 'elt jupljoc stzac'ac' 'a yol sti cha.

¹⁰ Yajn̈ej 'ix cot 'a satcha'an̈, 'ix 'eml 'a tic, ¡ax jun q'uic' 'asn 'aych ste'nub'oc!

¹¹ 'Ix q'ue 'a yib'n̈ jun querubín, 'ix 'at jen̈n̈oc; 'ix 'at jen̈n̈oc 'a yib'n̈ 'ic'.

¹² Ax q'uic'q'uinal, a x'och oyn yen̈loc, 'ix sc'ub'j 'el sb'a 'a scal q'uic' 'asn 'aych yalil.

¹³ 'Ix laj 'eltoc raya 'a yojltac; 'ix chac'b' sc'a'l jun tzo'n̈ stzac'ac' yu'uj.

¹⁴ A Jehová caw niwn yel'chi, 'ix 'el yaw 'icha wal sc'an̈ c'u 'a satcha'an̈.

¹⁵ 'Ix sjuln cot sjul-lab', atn raya, ax eb' 'ajc'ojl yajch 'ayin, 'ix 'at eb' 'eloc, 'ix satl eb' yu'uj.

¹⁶ 'Ix checlj chan̈ yich a mar yu'uj, ax sb'achnub'al yaln̈ yolyib'n̈q'uinal 'ix 'ilxi, yujto caw ow 'ix 'awj Jehová, caw ow pax jun 'ic' 'ix ya' coti.

¹⁷ 'Ix sb'ach cot Dios sc'ab' 'ayn 'a satcha'an̈, 'icha to in yij q'uet yet' sc'ab' 'a xab'l yich a mar.

¹⁸ In scolcn 'el 'a yol sc'ab' eb' 'ajc'ojl yajch 'ayin, atn eb' matz in nib'ni, yel xo caw 'ay yip eb' 'a wib'an̈.

¹⁹ 'Ix 'och oyn eb' 'ayin, yic 'ayn 'och 'a 'ilc'ojlal, palta ax Jehová, a 'ix 'och wet'oc.

²⁰ In scolcn 'elta, in ya'n can 'a jun lugar caw lewan 'a 'aj may tzin 'i'ni, yujto tzin schamc'ojlej.

²¹ A Jehová, 'ix yac' spac wico', yujto wach' in b'eyb'al.

²² Tzin b'eylb'ej sb'eyb'al Jehová, may 'ajtil xwij 'el in b'a 'a stz'ey in Diosal yic tzin b'on stu'al.

²³ 'Ayc'n̈ej smasnil schecnb'il 'a in nab'en, may 'aj xwij 'el in nab'en 'a sley.

²⁴ Wach'n̈j xwutj in b'eyb'al 'a yojltac, yujto xwij 'el in b'a 'a maysch'olnil.

²⁵ Yuj cha, spactzan Jehová in tojlal, yujto wach' in b'eyb'al 'a yojltac.

²⁶ Ach tic Mamin, tzac' 'el'choc a ti 'a eb' yiclum 'ayach, a mach wach' snab'en, wach' pax tzotj a nab'en 'a 'a.

²⁷ Wach' tzotj a b'a 'a eb' wach' tzyutj sb'a 'ayach, palta tza ch'ox a jelnal 'a yib'n̈ eb' jeln yixtn 'anma'.

²⁸ Yujto ach tza col eb' 'emmquilal yeq'ui, ax eb' b'an̈quintac, ach tzejcan 'ejm eb'.

²⁹ Mamin Jehová, ach ton sacq'uinl aj 'ayin; ach in Diosal, ach 'oj e'cn 'el q'uic'q'uinl 'ayin.

³⁰ Yet' 'a colwal ach in Diosal, ax wa'n owl yet' eb' soldado 'ajc'ojl yajch 'ayin, ax we'cn 'a yib'n̈ smuroal schon̈b' eb'.

³¹ Caw wal wach' sb'eyb'al Jehová Dios; a tas alb'il can yu'uj, smoj wal tzca'ch yipc qui c'ojol. Tzcolcn 'el smasnil mach to a Dios yipc'ojlal yaj yu'uj.

³² May junc xo Dios, cojxn Jehová. ¿Tom 'ay junc comn dios tztac' on̈ scoln 'icha qui Diosal?

³³ A Dios a tz'a'n wip, a tzb'on in b'eyb'al.

³⁴ 'Icha sjelnal sb'ey no c'ultquilchej, 'ixta in b'ey yu'uj, a tz'a'n wip yic tzin 'ec' 'a 'aj pa'ctac.

³⁵ A tzin cuyn wa'n owal, tzya'n wip yic tzin pacn in jul-lab' to nab'a bronce.

³⁶ Ach tzin a molo, tzin a coln paxi; a 'a wach' c'ab', a tzin yamn 'och wa'an, yuj a wach' nab'enal, wach' tzin 'el'chi.

³⁷ Caw wach' jun b'e 'aj tzin ej b'eyoc, sec wach' matz in tench woc.

³⁸ 'Ix in pech b'eyc'oc eb' 'ajc'ojl yajch 'ayin, 'ix yamchj eb' wu'uj, masnto xcham eb' wu'uj.

³⁹ ¡Choc' xwutj can eb'! Caw ch'iyquixtac xwutj can eb', sec wach' man̈xtzac niwtj pax chan̈ eb' jun 'ejm xo ¡'Ix telw can 'ejm eb' 'a scal woc!.

⁴⁰ Ach 'ix ac' wip yic xwa'n owal; a eb' 'ajc'ojl yajch 'ayin, 'ix 'ac' yic' 'ejm sb'a eb' 'a wojltac.

⁴¹ A eb' 'ajc'ojl yajch 'ayin, 'ix 'at eb' 'elc 'a wojltac. 'Ixtnta xwutj in satn 'el eb' matz in nib'ni.

⁴² 'Ix sc'an eb' colwal, palta may mach xcoln eb'; 'ix cob' yal sb'a eb' 'aych Mamin Jehová, palta toc ach ta'w 'a eb'.

⁴³ Caw choc' 'ix 'aj eb' wu'uj, 'icha wal lum pococ xwutj in te'n chojc eb', 'icha wal tz'aj ste'x lum b'i'ch 'a yol caye.

⁴⁴ In a colcn 'a yol sc'ab' eb' chon̈ab', in a'n 'och syajlilc niwc chon̈ab'. A eb' 'anma man̈ wojcoc, a eb' tzin 'a'n servil.

⁴⁵ A yic tzyab'n eb' wab'xil yiclum tzyutj sb'a eb' 'ayin, ax eb' chuc chon̈b'al, tzya'ch sb'a eb' in checb'oc.

⁴⁶ A eb' chuc chon̈b'al cha, xlaj xiw chan̈ eb', caw tz'ib'x eb' yic tz'elt eb' 'a yol yet'l 'aj tzcol sb'a.

⁴⁷ Mamin Jehová pitzn achn̈ej. Alx cab' wach' paxti 'aych ach in Colmal; 'ijx cab' chan̈ a b'i ach in Diosal, to in Colmal aji.

⁴⁸ Ach in Diosal tza pactzej 'a eb' tzin 'ixtni, tza'n can 'och jun tzo'n̈ chon̈b' 'a yol in c'ab'.

⁴⁹ Tzin a coln 'el 'a eb' 'ajc'ojl yajch 'ayin, yet' 'a eb' maysch'olnil sb'eyb'al. Mamin Jehová, ach tzin a col 'a eb' 'anma tzchichn 'och 'ayin.

⁵⁰ Yuj cha, tzwal in wach' paxti 'aych 'a scal eb' 'anma 'a junjn nacion̈, tzin b'itnan pax wal a b'i.

⁵¹ O'oj, tzwa'n ganar niwc owl an reyn tic, to sic'b'iln 'el o'oj. Yuj a chamc'ojlal, tzach 'och wet' an David in tic, yet' eb' win̈tl 'a smasnil tiempo, xchi David.