A Ch'an̈ Schab'l Libro Samuel 17 - Chuj San Sebastian Bible

Juwnac nab'en xyac' Ahitofel yuj Husai

¹ Xlajw cha, xyaln win Ahitofel 'ixtc 'a Absalón: —Comnoc tzchaj a c'ojl tzin si'l lajchwe'oc mil ewin soldado, ax 'a jun 'ac'wl tic, tzin 'at yet' ewin 'a spatquil David.

² Ya' sb'a may yip yuj c'unb'lal, ax in c'och 'a 'a. Ax smasnil eb' 'anma ajun yet' cha, 'oj in xib'tc eb', ax s'at eb' 'eloc. Cojn win rey chi 'oj in mila'.

³ 'Ixta 'oj 'aj snan sb'a smasnil 'anma', ax sjaw eb' 'ayach. Yujto jun wal win 'oj a mil chamoc, ax smasnil eb' 'anma cha, 'oj jawc pax eb' 'ayach, ax a can yet' eb' 'a junc'ojlal, xchi winac.

⁴ A jun nab'en cha, caw wal wach' xyab' Absalón yet' smasnil eb' yichm wincal chon̈b' Israel.

⁵ Yuj cha, 'ix ya'n 'awtxoc cot win Husai arquita, yic tzya'n win junc snab'en cha.

⁶ A yic xc'och win 'a yojltac, 'ix yaln win Absalón 'ixtc 'a 'a: —Yaj jun nab'en xyac' Ahitofel. ¿Tom a jun tic 'oj qui b'o'ec mto ma'ay? ¿Tas pax xa chi ach tic? xchi 'a winac.

⁷ 'Ix ta'w win Husai 'ixtic: —A jun nab'en xyac' Ahitofel, caw man̈ wach'oc.

⁸ Ach tic, ojc wal si'mb'il to caw jeln win a mam chi yet' eb' 'anma ajun yet' cha. Ax ticnec, caw wal 'ayx cot yowl win 'icha junc no snun oso tz'ijx 'ec' yune 'a 'a. An̈jtona', a pax win a mam cha, caw wal c'aync win ya'n owal, may junc 'ac'wl ton̈j 'ayc' win 'a scal eb' 'anma'.

⁹ A ticnec 'ajm 'ayc' sc'ub'c 'el sb'a 'a yol junc n̈aq'ue'en, mto 'a junc xo lugar. An̈jtona', a yic tz'och owl cha, q'uinloc tzcham jaywn̈oc eb' a soldado tic muc'uc, ax yic 'ay eb' 'anma 'oj 'ab'noc, ax yaln eb' 'ixtic: A eb' 'anma tza'n 'och yuj Absalón 'ix lajw 'el eb', 'oj schic eb'.

¹⁰ Yuj cha, wach'xam 'ay eb' winc chi caw jelan, matz xiw 'icha no león, 'Oj schab'c'ojloc sb'a eb'; yujto smasnil eb' quit chon̈b'ec, yojc eb' to caw jeln a mam chi 'a owal, 'ixta pax eb' ajun yet' cha.

¹¹ Ax ticnec, tzwac' a nab'enoc, to tza yamb'tzej smasnil eb' soldado israel 'ay 'a Dan masnto 'a chon̈b' Beerseba, a eb' 'anma cha, man̈x b'ischjb'enoc eb' 'icha yarenail sti a mar, ach tza jucb'tzej eb', ax a 'at yet' eb' 'a owl cha.

¹² Tzlajw cha, tzon̈ 'at ca'c owl yet' a mam chi 'aj 'ayc' cha. Tzon̈ c'och lan̈njoc 'a yib'n̈ 'icha yem chicb'chan̈ 'a sat lum lum tic 'a 'ac'wal, c'uxn tzqui milc smasnil eb' ajun yet' cha, man̈x junc eb' tzcani.

¹³ Toxn̈ej tzc'ub'j 'el sb'a eb' 'a junc lum chon̈b' cha, ax qui masnil an̈ israel on̈ec tic, tzquijec qui lasu, tzqui to'nec lan̈chjoc jun chon̈b' cha, ax smasnil q'uen q'ue'en, man̈x 'a junc q'uen tzcan ta', c'uxn tzqui julc can 'at eb' q'uen 'a ch'olctac, xchi Husai.

¹⁴ Yuj cha, 'ix yaln Absalón 'ixtc yet' eb' yichm wincal chon̈b' Israel: A jun nab'en tzyac' Husai tic, yel xo wach' 'a yib'n̈ yic win Ahitofel, xchi eb'. (Yujto a Jehová, a 'ix 'a'n juwc jun snab'en win Ahitofel cha, sec tzjaw maysch'olnil chi 'a yib'n̈ win Absalón.)

¹⁵ Xlajw cha, xyaln win Husai 'ixtc 'a eb' ya'mal 'och sti eb' 'anma cha, atn win Sadoc yet' win Abiatar: 'Ixtc xyutj win Ahitofel ya'n snab'enoc win Absalón yet' eb' yichm wincal chon̈b' Israel, an xo tic, 'ixtc wal xwutj pax walni.

¹⁶ Yuj cha, 'at 'a'c alxoc mu'c 'a David, tzalx 'a 'ixtic: Man̈ ach can 'a jun 'ac'wl tic 'a lum ya'lical lum cusltac lum tic, palta to tzach 'e'x can 'a sc'axpil 'ec' a Jordán, sec ma'oj a cham yet' smasnil eb' 'anma ajun et'oc, xchi junc mach chi 'a 'a, xchi Husai cha.

¹⁷ Ax win Jonatán yet' win Ahimaas, ata 'ayc' eb' 'a sti jun a spac'b'a 'a En-rogel, sec may mach tz'iln ewin 'a yol chon̈b' cha, ax jun 'ix ya'mal servil eb' x'at alnc 'a ewinac. Yajn̈j wal cha, 'ix 'at ewin 'at yal jun 'ab'x chi 'a win rey David.

¹⁸ Palta 'ay jun win quelm 'ix 'iln ewinac, ax win quelm chi 'ix 'at alnc yab' Absalón cha. Yuj cha, xya'n eb' 'ip sb'eyi, axta xc'och eb' sc'ub'c 'el sb'a 'a yatut jun win 'aj Bahurim, a 'a yamq'uil sti n̈a cha, ata 'ay jun jul, axta sc'ub'j 'el sb'a eb' 'a yojol.

¹⁹ Ax 'ix yistzil win 'aj n̈a cha, 'ix slich'n 'at 'ix jun sábana 'a sti jun jul cha, 'ix secn 'ejm 'ix strigo tacjoc 'a yib'an̈. Toc 'ay mach 'ix 'ojcan 'eli, toto ata 'ay 'ejm ewinac.

²⁰ Yajn̈j wal cha, 'ix c'och ewin schecb' Absalón cha, sc'anb'n ewin 'a 'ix 'ix chi 'ixtic: —¿'Ajtil xc'och win Jonatán yet' win Ahimaas xe yila? xchi eb'. —At wal yec' ewin 'a tic, wan am sc'och ewin 'a sti a cha, xchi 'ix 'a ewinac. 'Ix 'at ewin sayc' cob' ewinac, palta ma'ix 'ilchj ewin yuj ewinac, xlajw cha, 'ix meltzj pax ewin 'a Jerusalén.

²¹ Xlajw spaxcn ewin cha, ax Ahimaas yet' Jonatán, 'ix q'ue paxt eb' 'a yol jul cha, 'ix 'at ewin 'at yal schecnb'il chi 'a rey David. 'Ix yaln ewin 'ixtc 'a 'a: Lem, 'ixquec muc'uc, tzeyac' 'ip e c'axw can 'ec' 'a yojl a Jordán. Yujto a win Ahitofel, 'ix yac' win sc'ojloc win Absalón yic tzwul ya'nc owl eyet' muc'uc, xchi eb'.

²² A yic xyab'n David jun cha, 'ix q'ue wan yet' smasnil eb' 'anma ajun yet' cha, caw ji'ltixn̈ej x'ec' eb' 'a yojl a Jordán. Ax yic sacb'el 'a junx c'u cha, man̈x junc eb' 'anma tzat c'axw 'ec' 'a yojl a'.

²³ Palta ax xyiln win Ahitofel to ma'ix 'och yopiso snab'en xyala, 'ix ya'n 'och stzum sb'uru, 'ix pax 'a schon̈b' 'aj 'ay yatut, 'ix laj sb'onc can yaj smasnil tas 'ay 'a 'a, xlajw cha, 'ix st'un̈n q'ue sb'a, 'ix chami. Axta 'ix mucx 'a 'aj mucn smam.

Xc'och David 'a chon̈b' Mahanaim

²⁴ Ax David ata xc'och 'a chon̈b' Mahanaim, ya' sb'a ax Absalón, 'ix sc'axptej 'ec' a Jordán yet' smasnil eb' soldado israel cha.

²⁵ A win Amasa, 'ix ya'ch Absalón syajlilc eb' soldado chi sjelc Joab. A win Amasa cha, yunnal jun win tzcuch Itra, yic eb' yin̈tl can Ismael. Xyi'n sb'a win yet' 'ix Abigail yisl win Nahas, 'ix snul'j 'ix Sarvia, snun win Joab.

²⁶ Ax Absalón, ata 'ix sb'o chan̈ scamplamento yet' eb' soldado israel chi 'a yol yic Galaad.

²⁷ Ax yic xc'och David 'a chon̈b' Mahanaim, 'ix 'elt jaywn̈ eb' winc wul scha': win Sobi yunnal Nahas 'aj Rabá yic eb' yin̈tl Amón; win Maquir yunnal Amiel 'aj Lodebar, yet' pax win Barzilai 'aj Rogelim 'a yol yic Galaad.

²⁸ 'Ix laj yi'nc 'at eb' ch'at, palagan yet' eb' lum chen, xyi'n pax 'at eb' 'ixm trigo, 'ixm cebada, harina, yet' jun tzo'n̈ tas b'olb'il, te garbanzo yet' te awatut.

²⁹ No yal chab', no queso yic wacax, no mantca' yet' pax no calnelu, atn jun tzo'n̈ tic xyij 'at eb' sc'ux David yet' eb' 'anma ajun yet' cha, yujto sna eb', to caw 'ay swejl eb' 'anma cha, tztacj sti eb', xc'unb' pax eb' sb'ey 'a lum cusltac lum cha.