A Ch'an̈ Schab'l Libro Samuel 14 - Chuj San Sebastian Bible

'Ix meltzj pax Absalón yuj Joab

¹ A win Joab yune 'ix Sarvia, yojc wal si'mb'il to a win rey cha, tzcus win yuj win Absalón cha.

² Yuj cha, 'ix 'at ya'nc win Joab cot jun 'ix 'ix caw jeln snab'en 'a chon̈b' Tecoa. 'Ix yaln win 'ixtc 'a 'ix: —Tza tz'ac cus a b'a, tza'n 'och a pichl yic cusc'ojlal; man̈ a'ch pax perjuma 'ayach, 'icha wal junc 'ix to 'ayx tiempo yoch 'a cusc'ojlal yuj junc mach chamnc 'a 'a, 'ixta tzotj a b'a.

³ Tzlajw cha, tzach c'och 'a yojltac win rey, ax aln jun tzo'n̈ paxti 'oj wal 'aych tic, xchi. Xlajw cha, 'ix yaln Joab 'a 'ix tas jun tzo'n̈ paxti 'oj yal 'ix cha.

⁴ 'Ix jaw 'ix 'aj Tecoa chi 'a yojltac win rey cha, 'ix 'em n̈ojn 'ix 'a yojltac winac, yic tzch'oxn 'ix yemmquilal, 'ix yaln 'ix 'ixtic: —Colwjan̈ wet' mamin rey, xchi 'ix.

⁵ —¿Tas tzach 'i'n 'ach 'ix? xchi winac. 'Ix ta'w 'ix 'a win 'ixtic: —Caw yel in ch'ocjxoj, chamnc xo wichmil.

⁶ An a checb' in tic, 'ay chawn̈ wune', ax x'aji, 'ix 'at ewin munljoc. Ax 'a scal smunljel ewin chi 'ix yac' owal. Toc 'ay mach xpojn snan̈l eb', 'ix smil jun win chi win yu'tac cha.

⁷ Ax ticnec, smasnil eb' wican tz'och eb' 'ajc'ojlal 'ayin, tznib'n eb' to tzwac' win xmiln yu'tac chi 'a yol sc'ab' eb', ax eb' tzmiln win yuj schamlil win yu'tac cha. 'Ixta tznib'j eb', sec tzsat 'ejm win 'ay yaln yic yi'n can smacl smam cha. 'Ixta tznib'j eb' tzin 'ajcni, man̈x 'a yin̈tl win tzcani, sec tzsat 'ejm yalx win wichmil chi 'a sat lum tic, xchi 'ix.

⁸ Xlajw cha, 'ix yaln win rey chi 'a 'ix 'ixtic: —'Ixc 'a atut, 'oj wila' tas 'oj wutc colwjc in b'a 'aych yuj jun tzal 'ayn tic, xchi win rey cha.

⁹ 'Ix ta'w 'ix 'aj Tecoa chi 'ixtc 'a winac: —Mamin rey, toto 'ay mach 'aj tzcan jun mul chi 'a yib'an̈, a cab' 'a wib'n̈ tzcan yet' eb' wican, palta man̈oc cab' 'a eb'n̈ yet' opiso tzcani, xchi 'ix.

¹⁰ Ax win rey cha, xyaln win 'ixtic: —A mach tu tzaln 'ayach, 'ij cot 'ayin, sec man̈xtoc 'oj ach stzuntzoc, xchi winac.

¹¹ Palta 'ix 'och wal tecn 'ix 'a win rey cha, 'ix yaln 'ix 'ixtic: —Tzin tew 'och 'aych mamin rey, comnoc tza c'an 'a Jehová qui Diosalec, sec a jun wican tznib'j milwjc sb'a cha, comnoc matz niwtj scham 'anma yu'uj, yic tznib'n smil junx wune cha, xchi 'ix. 'Ix ta'w win rey chi 'ixtic: —Q'ueln 'och wal Jehová tzwalni, may wal jac tas 'oj 'i'nc win one cha, xchi winac.

¹² —Mamin rey, tzin tew 'och wal 'ayach, comnoc tza chaj wal ab' junc xo paxti'al, xchi 'ix. —Al cab'noc, xchi winac.

¹³ 'Ix yaln 'ix 'ixtic: —¿Tas yuj 'icha wal tz'aj yoch eb' wican chi 'ajc'ojlal 'ayin, tas yuj 'ixta tzach 'aj 'och 'ajc'ojlal 'a eb' schon̈b' Dios? Yujto a tas tzal 'a yib'n̈ eb' wican chi mamin rey, locn ach 'oj jawc 'a eb'n̈ yu'uj, yujn̈ej to matz a chaj meltzjoc win onnal 'aycn 'at 'eloc.

¹⁴ Yujto an̈ 'anman̈ tic, toxn 'oj qui chami. Lajn on̈ 'icha a a tztob' 'a sat lu'um, man̈xtzac stac' smolb'tzaxi. Ax pax Dios jun, may mach tzyij 'ec' sq'uinal, a yico', to tzsay tas tz'aj smeltzj junc mach to 'aycn 'at 'elc 'a 'a.

¹⁵ A ticnec mamin rey, in jaw wul wal jun tzo'n̈ tic 'ayach, yujto a eb' 'anma tzin xib'tn cha'an̈. Yuj cha, tzwa'n 'och 'a in c'ojl wul walnc jun tzo'n̈ tic 'ayach, lemb'il tza chaj ab' tas tzwul wal 'ayach.

¹⁶ Yuj cha, mamin rey, tza na'a tas tzotj in a coln 'el 'a yol sc'ab' eb' tznib'j in satnc 'el yet' wune 'a sat lum lum xyac' Dios qui macloc tic.

¹⁷ An a checb' in tic mamin rey, 'oj in tan̈woc tas spac 'oj ac' 'ayin sec 'oj wic' sniwnal in c'ojol, yujto ach tic mamin rey, ojc wal tzotj a b'eyc'ojlwi 'a tas wach' yet' 'a tas tu', lajn ach wal 'icha junc yángel Dios. A cab' Jehová qui Diosalec, a tz'och et'oc, xchi 'ix 'a win rey David.

¹⁸ 'Ix ta'w win rey chi 'a 'ix 'ixtic: —A ticnec, tzin tew 'och 'ayach, tzin nib'ej to may tas 'oj a c'ub'c 'el 'ayin, yuj tas 'oj in c'anb'c 'ayach, xchi winac. Xta'w 'ix 'a win 'ixtic: —Al mamin rey, tas tza nib'j a c'anb'oc, xchi 'ix.

¹⁹ 'Ix yaln win rey chi 'ixtc 'a 'ix: —¿Man̈oc am Joab tz'a'n al jun tzo'n̈ tic 'ayin? xchi winac. 'Ix ta'w 'ix 'a winac: —Yel tzal mamin rey. Matz ach satc' a sayn 'ec' jun tic, a tas 'ix ala, caw wal yel. Atn win a checb' Joab, a win tzwul 'a'nc wal jun tzo'n̈ tic 'ayach.

²⁰ 'Ix sna chan̈ win a checb' Joab sb'on jun tic, sec toq'ue tza jel a nab'en 'a yib'n̈ tas alb'ilx o'oj. Palta ach xo mamin rey, caw wal jeln a nab'en 'icha junc yángel Dios, yuj cha, ojc smasnil tas tzb'o 'a sat lum lum tic, xchi 'ix.

²¹ Yuj cha, 'ix yaln win rey chi 'ixtc 'a Joab: —A ticnec, 'ix in na'a to tzwac' 'el'choc 'icha tas xa na'a. 'Ixic 'at 'ij meltzjoc ni quelm Absalón cha, xchi.

²² Ax Joab, 'ix 'em n̈ojn 'a sat lum 'a yojltac win rey cha, yic tzch'oxn 'el syiclumal, 'ix yaln swach' paxti 'ixtc 'a winac: —A ticnec mamin rey, 'ix wojquej 'eli to 'ay wel'ch 'ayach, yujto 'ix a chaj ab' tas tzin nib'j wal 'ayach, xchi winac.

²³ Xlajw cha, 'ix 'at Joab 'a chon̈b' Gezur, 'ix 'at yi'nc paxt win Joab chi win Absalón yic tzjapx win 'a Jerusalén.

²⁴ Palta xyaln win rey chi 'ixtic: C'ax'e'l cab' tzc'och ni Absalón chi 'a yatut, matz in nib'j to 'oj jawc ni 'a wojltac, xchi. Yuj cha, c'ax'e'l 'ix c'och Absalón chi 'a yatut, ma'ix yil xon sb'a yet' win rey cha.

²⁵ A 'a scal eb' israel, may wal junc mach lajn yilx 'icha Absalón, caw wal wach' yilx sniwnal smasnil. Caw b'inab'il 'a scal eb' 'anma cha, yujto may tas palta 'a sniwnal.

²⁶ At 'a yab'lil, tzjoxx 'el xil sjolm Absalón, yujto caw wal 'al tzyab'i. Yuj cha, a yic tzya'n joxxoc 'el xil sjolom, chan̈e libra yal-l xil sjolm cha. 'Ixta tz'aj yechtax 'a yechtab' eb' rey tzc'ana.

²⁷ 'Ay 'oxwn̈ yunnal Absalón, jun pax yisil, a 'ix yisl win cha, Tamar sb'i 'ix, caw wach' yilxi.

²⁸ 'Ayx schab'l ab'il sjaw Absalón 'a Jerusalén, palta matz tac' sc'och 'a yojltac win rey cha.

²⁹ Yuj cha, 'ix ya'n Absalón chi cot win Joab yic tzchecx 'at yuj win 'a win rey cha, palta ma'ix yal sc'ojl xcoti. 'Ix 'at ya'nc win cot 'a scha'ejmal, palta ma'ix schaj pax cot sb'a.

³⁰ Xlajw cha, xyaln 'a eb' schecb' chi 'ixtic: —'Ixquec 'a 'aj 'ay 'ixm yawb'en cebada win Joab 'a stz'ey wico'; a yic tzex c'ochi, tzeya'n 'och sc'aq'uil, xchi Absalón chi 'a eb'. 'Ix 'at eb' schecb' cha, ax yic xc'och eb', 'ix ya'n 'och eb' sc'a'l 'ixm cebada cha.

³¹ Yajn̈j wal cha, 'ix c'och Joab 'a yatut Absalón, 'ix yaln 'ixtic: —¿Tas yuj 'ix ya'ch eb' a checb' sc'a'l in munljel 'a 'aj 'ay? xchi.

³² 'Ix ta'w Absalón 'ixtc 'a Joab: —Ach 'at wa' cotoc, sec tz'at a c'anb'c 'a win rey tas yuj in 'at paxtc 'a chon̈b' Gezur. Q'uinloc ma'ay, yel xo am wach' ata 'ayn 'ec' ta'. A ticnec tzin nib'j wil in b'a yet' win rey, toto 'ay mach 'aj 'ay in mul, tztac' cab' in chami, xchi winac.

³³ Yuj cha, 'ix c'och win Joab chi sc'umc win rey cha, 'ix yaln winac tas xyutj Absalón chi yaln 'a 'a. Xlajw cha, 'ix 'at ya'nc win rey chi cot win Absalón cha. Ax yic 'ix c'och 'a yojltac winac, 'ix 'em n̈ojn win 'a sat lu'um. Ax pax win rey cha, to 'ix stz'ub' 'elt win sti jun yunnal cha.