A Ch'an̈ Schab'l Libro Samuel 12 - Chuj San Sebastian Bible

Stumnb'il David yuj Natán

¹ 'Ix schecn 'at Jehová win Natán 'a David. Ax yic xc'och win 'a David cha, 'ix yaln win 'ixtc 'a 'a: —'Ay chawn̈ winc 'a jun chon̈ab', jun winac caw wal rico, ax junx winac, caw wal meb'a'.

² A win rico cha, til wal scalnelu winac, 'ay pax swacax.

³ Palta ax win meb'a cha, teb'il wal 'ay jun c'otn̈ scalnelu manb'il yu'uj. A win 'ix q'uib'tzan no 'a yune'al. A 'a scal eb' yunnal 'ix q'uib' chan̈ no'. A tas tzc'uxu, yet' tas tzyu'j winac, a chi sc'uxu, ax 'a sn̈i sc'ojl win smec' way no'. 'Icha wal junc yisil, 'ixta xyutj schamc'ojlani.

⁴ Ax win rico cha, 'ay jun win b'eymal 'anma xjaw 'a winac, palta ma'ix yac' win rico chi schi win b'eymal 'anma chi junc scalnelu cha, mto junc swacax, sec tzwa win yet' winac, palta a no yic win meb'a chi 'ix yij 'eq'ui, 'ix sb'on schi win xjaw 'a win cha, xchi Natán.

⁵ Ax David, caw wal 'ix cot yowl 'a win 'ixta tzb'o cha, 'ix yaln 'ixtc 'a Natán: —'A sat Jehová tzwalni, a mach 'ixta tzb'o cha, smoj schami.

⁶ Chan̈wn̈ xo tzyutj stojn no yune calnelu cha, yujto tu tas sb'o'o, matz 'o'ch sc'ojl 'a junc yit 'anma'il, xchi.

⁷ Yuj cha, 'ix yaln Natán 'ixtc 'a David: —A jun winc tzwal cha, ach ton tic. 'Ixtc wal xyutj Jehová qui Diosal yaln 'ayach: An 'ix wac' q'ue aceite 'a a jolom yic ach in si'n 'och sreyloc chon̈b' Israel, ach in coln 'a yol sc'ab' Saúl.

⁸ 'Ix wa'n yatut winac, yet' eb' 'ix yistzil win ajlil chi 'ayach, ach wa'n 'och sreyloc chon̈b' Israel yet' Judá. Toto jab' wal jun tzo'n̈ tic tzela, tztac' pax wa'n nan̈locx 'ayach.

⁹ ¿Tas yuj ma'ix a yiclj in checnb'il an Jehová in? 'Ix a b'on wal tas maysch'olnil 'a in sat. 'Ix ac' milxoc win Urías hitita, ax eb' amonita 'ix miln win o'oj, 'ix e'nec' yistzil winac.

¹⁰ Yuj cha, may wal b'a'n̈ 'oj 'och wan stzu'x cham eb' en̈til, yujto in a patquilj can 'eli, yic 'ix e'n 'och 'ix yistzil win Urías estziloc.

¹¹ An Jehová in, an tzwalcni: A 'a scal eb' onnal, ata 'oj wac' pitzwoc chan̈ maysch'olnil. Q'ueln ach wal 'och 'a eb' 'ix estzil cha, ax wa'n eb' 'ix 'a junc xo win winac, ax sway win yet' eb' 'ix.

¹² Ach tic, c'ultacl xcob' a b'o jun cha, palta an xo tic, 'oj wac' 'el'choc jun chi 'a c'ual, yet' 'a sat smasnil eb' et israelal, xchi Jehová, xchi Natán 'a David.

¹³ Yuj cha, xyaln David 'ixtc 'a Natán: —Yel wal b'i'an, 'ix 'och in mul 'a Jehová, xchi. —A Jehová, 'ix 'a'n lajwoc a mul cha, ma'oj a cham yu'uj.

¹⁴ Palta yuj jun xa b'o tic, yuj cha, tu tas tzyal eb' 'anma 'ajc'ojl yajch 'a Jehová, atn yuj jun cha, ax scham win onnal tot x'alj cha, xchi Natán.

Schamlil win yune 'ix Betsabé

¹⁵ Xlajw cha, xpax win Natán 'a yatut. Ax Jehová 'ix 'a'n 'och syailal win nene 'unn yic David chi yet' 'ix yistzil can win Urías cha, caw wal ow x'ajch syailal win cha.

¹⁶ Yuj cha, syamn 'och David sc'an 'a Dios, sec tzb'ox sc'ojl win 'unn cha. 'Ix ya'n 'och sb'a 'a c'ajb'c'ojlal, ax 'a sat lum tz'ec' t'ocn sway 'a junjn 'ac'wal.

¹⁷ Ax eb' 'ichmtac winc tzmunlj yet' 'a sdespacho cha, 'ix c'och eb' 'a 'a, yic xcob' 'at yi'nc chan̈ eb' 'a sat lum cha, palta ma'ix schaj chan̈ sb'a, ma'ix yal sc'ojl xwa yet' eb'.

¹⁸ Yucb'ixial syamchj win 'unn chi yuj yab'il cha, 'ix chami. Ax eb' ya'mal servil win David cha, caw tzxiw eb' yaln 'a winac, yujto xcham win 'unn cha. 'Ix laj sna eb' 'ixtic: A yic pitznto win 'unn tic, 'ay tas xlaj cob' ca'lc caln 'a David, palta ma'ix schaj yab' 'ayn̈ec, ¿ocxom wal tzcalc yab' yuj win 'unn xcham tic? 'Ay smay tasm tzyutj sb'a, xchi eb'.

¹⁹ Ax xyiln David, to tzlaj sajsni eb' schecb' cha; 'ix nachj 'el yu'uj, to chamnc xo win 'unn cha, 'ix sc'anb'n 'a eb' 'ixtic: —¿Tom xcham win 'unn cha? xchi. —'Ix cham winac, xchi eb'.

²⁰ Xyab'n David to x'och chamel, yuj cha, 'ix q'ue wan 'a sat lu'um. 'Ix 'achni, xya'n 'och perjuma 'a 'a. Sjeln spichul, 'ix 'at ya'nc 'emmquilal 'a yol yatut Jehová. Xlajw cha, 'ix japx 'a yatut, sc'ann tas tzc'uxu, 'ix wa'i.

²¹ Ax eb' schecb' cha, xyaln eb' 'a 'ixtic: —¿Tas wal yuj 'ixta tzotj a b'a? A yic pitznto win 'unn tic, 'ix a'ch a b'a 'a c'ajb'c'ojlal, ach 'oc' yuj winac; ax yic xcham winac, ach q'ue wan 'a et'ul, xlajw cha, ach wa'i, xchi eb' 'a 'a.

²² 'Ix ta'w 'a eb' 'ixtic: —Yujto pitznto win 'unn cha, yuj cha, in 'och 'a c'ajb'c'ojlal, in 'oc' yuj winac. 'Ix in nani, lemb'il tzyac' Dios niwnc'ojlal 'ayn yet' winac, sec matz chami.

²³ Palta ax ticnec xcham winac, ¿tas to wal yuj tzin 'och 'a c'ajb'c'ojlal? ¿tom 'oj pitzwcto pax winac? Cojn to an 'oj in 'at yet' winac, al wal sjapx win wet'oc, man̈ xo, xchi.

Yaljub'al win Salomón

²⁴ 'Ix ya'n David sniwnal sc'ojl Betsabé, 'ix wayx win yet' 'ix yistzil cha. Xlajw cha, x'alj junx yune 'ix yet' David, 'ix ya'n eb' sb'ic Salomón. Ax jun 'unn cha, caw wal chamc'ojlb'il yuj Jehová.

²⁵ Yuj cha, schecn pax cot Jehová win Natán wul yal 'a David, to chamc'ojlb'il jun 'unn chi yu'uj, yuj cha, to Jedidías tz'ajx sbic yuj David.

Xyac' ganar David owl 'a Rabá

²⁶ Ya' sb'a cha, ax Joab 'ix yac' owl yet' eb' amonita cajn 'a chon̈b' Rabá. A yic wan xo yoch 'a yol chon̈b' cha,

²⁷ 'ix wul ya'nc alxc 'a David 'ixtic: Wan woch 'a yol chon̈b' Rabá wac' owal. 'Ix wi'n 'ec' jun tzo'n̈ scuartel eb' soldado tztan̈wni a a tzc'an eb' 'anma'.

²⁸ Ax ticnec jun, yamb'tzej smasnil eb' soldado 'aycn et'oc. Tzach cot yet' eb' wul ac' owl 'a yol chon̈b' tic, tza macn can 'eq'ui. Q'uinloc an tzwac' owl 'a yol chon̈b' tic, tzwi'n 'eq'ui, ax am tz'aji, an tzin b'inax yu'uj, xchi Joab cha.

²⁹ 'Ix ya'n David syam sb'a smasnil eb' soldado cha, 'ix 'at yet' eb' yac' owl 'a chon̈b' Rabá. 'Ix ya'n ganar owl cha, 'ix yi'n can 'ec' jun chon̈b' chi yico'oc.

³⁰ Xlajw cha, xyi'n 'el scorona win sreyl jun chon̈b' chi 'a sjolom. Tecn 'ay junc 75 libra yalil, til wal jun tzo'n̈ q'uen wach' yilx 'aych 'a 'a. 'Ix 'och scoronaoc win rey David. Til wal jun tzo'n̈ xo tas chan̈ stojl xyij 'elt eb' 'a yol chon̈b' cha.

³¹ Xyi'n pax 'elt eb' 'anma xcan 'a yol chon̈b' cha, 'ix ya'n munljoc eb' yet' q'uen serucho, q'uen piyocha, q'uen ch'acab', 'ay pax eb' x'och n̈usj ladrillo 'a lum jorna. 'Ixtan̈ej x'aj eb' 'anma chi smasnil 'a junjn chon̈b'al eb' amonita cha. Xlajw cha, 'ix meltzj David 'a chon̈b' Jerusalén yet' smasnil eb' soldado cha.