A Ch'an̈ Schab'l Libro Samuel 11 - Chuj San Sebastian Bible

David yet' 'ix Betsabé

¹ Ax 'a junx ab'il cha, yic stiempoal s'at eb' rey 'a owal, 'ix schecn 'at David win Joab syajlil eb' soldado, yet' pax smasnil eb' soldado israel. 'Ix schecn win eb' yac' owl 'a Amón. 'Ix lajw can 'el eb' amonita chi yuj eb', 'ix yoyn sb'a eb' 'a chon̈b' Rabá. Palta ax win rey David, 'ix can win 'a Jerusalén.

^2-4 Ax x'aji 'ay jun yemc'ual, 'ix q'ue wan David chi 'a sat sch'at, 'ix q'ue 'a span̈nil yib'n̈ sdespacho b'eyc'oc. Axta 'ix yil sb'a 'a jun 'ix 'ix wan yachni yic tzsacb'tzan sb'a 'ix. Caw wal wach' yilx 'ix. Yajn̈j cha, 'ix ya'n David c'anb'xoc mach jun 'ix cha. 'Ix alx 'a 'a, to a 'ix Betsabé yisl win Eliam, 'ix yistzil win Urías hitita. 'Ix ya'n 'at David chi schecb' 'a 'ix yic tzcot 'ix ta'wc 'a winac. Ax yic xjaw 'ix, xway win yet' 'ix. 'Ix paxx 'ix 'a yatut.

⁵ A 'ix 'ix cha, 'ix yijcan 'ix yune yuj David, yuj cha, 'ix ya'n 'ix alxoc 'a winac.

⁶ Yuj cha, 'ix yaln 'at David 'a win Joab, to tzpaxt win Urías hitita. Yajn̈j cha, 'ix ya'n cot win Joab win Urías chi 'a David.

⁷ A yic xjaw winac, 'ix wul sch'oxnc sb'a win 'a yojltac win rey David, ax win rey cha, 'ix sc'anb'n winac, toto wach' sc'ojl Joab yet' eb' soldado, tas pax ya'n owl cha.

⁸ Xlajw cha, xyaln 'ixtc 'a win Urías cha: 'Ixc 'iljoc 'a atut, tza b'icn oc, xchi. Cojn wal x'elt win Urías chi 'a yol sdespacho win rey cha, 'ix 'at ya'nc win rey chi can tas tzc'ux win Urías cha, a tas tzc'ux win 'a smexa, a chi 'ix yac' win siylab'il 'a win yalni.

⁹ Palta ax win Urías cha, ma'ix 'at win 'a yatut. Ata xway win 'a yol sti spuertail yatut win rey. Ata 'ix 'ec' 'ac'wl yuj win yet' smasnil eb' soldado tan̈wjnac win rey cha.

¹⁰ 'Ix yaln eb' 'anma chi 'a David 'ixtic: A win Urías ma'ix xit' win 'a yatut, xchi eb'. Yuj cha, sc'anb'n David 'ixtc 'a winac: —¿Tas yuj ma ach xit' 'a atut, 'in 'ayx tiempo a 'at 'a 'aj ach xit' cha? xchi David.

¹¹ 'Ix ta'w win Urías 'ixtic: —Matz tac' in comn 'at 'a watut, yic tzin wa'i tzwu'n tas tzwuq'uej, tzin way yet' wistzil ya' sb'a a te scaxail strato Jehová, yet' eb' soldado quit israelal yet' eb' 'aj Judá, mantiado yaj yet'l eb', ax eb' a soldado yet' Joab, 'a'lic 'aj tzway eb'. Yuj cha, matz tac' in b'on 'icha tzal chi mamin rey, xchi winac.

¹² 'Ix yaln David 'ixtc 'a win Urías cha: —Cann̈ 'a junx 'ac'wl tic, ax q'uic'an tzach 'atxi, xchi. 'Ixta x'aj Urías scan 'a Jerusalén 'a junx 'ac'wl cha, masnto sacb'el 'a junx c'u.

¹³ Ax David cha, 'ix yawtj 'at win Urías chi wac yet' 'a yatut. 'Ix ya'n win David 'u'wc 'an̈ win si'mb'il. Ax 'a sq'uic'b'alil cha, 'ix 'elt win Urías 'a 'aj 'ay cha, ax yet' eb' soldado tan̈wjnac yatut win rey, ata 'ix wayx win yet' ewinac, ma'ix 'at 'a yatut.

¹⁴ Ax yic sacb'el 'a junx c'u cha, 'ix stz'ib'n 'at win David chi jun scarta 'a win Joab, ax win Urías chi x'i'n 'at ch'an̈ yuj winac.

¹⁵ Tzyaln David 'a scarta 'ixtic: 'A'c 'och win Urías 'a 'aj caw ow ya'n owl cha. Tzeyi'n 'el e b'a 'a stz'ey, sec tzchami, xchi ch'an̈ carta cha.

¹⁶ Ax yic x'och oyn eb' soldado yuj Joab chi 'a jun chon̈b' cha, 'ix ya'n 'och Joab win Urías chi 'aj caw ow ya'n owl cha, yujto yojtac 'aj 'ay eb' soldado caw jeln cha.

¹⁷ At wal cha, 'ix 'elt eb' soldado tan̈wjnac jun chon̈b' cha. 'Ix ya'n eb' owl yet' Joab. Ax x'aji, 'ix cham jaywn̈ eb' soldado David, locn win Urías hitita 'ix cham yet' eb'.

¹⁸ Yuj cha, 'ix 'at ya'nc win Joab alxc 'a David, tas ya'n jun owl cha.

¹⁹ 'Ix yaln 'a win checb' chi 'ixtic: A yic tzlajw aln 'a win rey tas ya'n owl tic,

²⁰ lemb'il tzcot yowl win rey cha, tzc'anb'n win 'aych 'ixtic: ¿Tas yuj ex 'ochchi yic xeya'n owl 'a jun chon̈b' cha? ¿Tom man̈ eyojcoc to 'a eb' 'anma 'ay q'ue 'a yib'n̈ muro cha 'oj sjul 'emt eb' tas 'a eyib'an̈?

²¹ ¿Mach miljnac win Abimelec tzeyab'i, win yunnal Gedeón, man̈oc am jun 'ix 'ix 'ay q'ue 'a yib'n̈ muro 'ix juln 'emt q'uen sc'ab' cha 'a sjolm win 'a chon̈b' Tebes? ¿Tas yuj ex 'ochch 'a stz'ey smuroal jun chon̈b' cha? toto xchi, tza pacn 'a 'ixtic: An̈jtona', 'ix cham pax win a checb' Urías win hitita, xa chi, xchi Joab chi 'a winac.

²² Xlajw cha, 'ix cot win checb' cha, ax yic xjaw win 'a yojltac David, syamn 'och win yaln smasnil tas tz'ajx yal yuj Joab.

²³ 'Ix yaln win checb' chi 'ixtc 'a David: —Caw wal yet' eb' soldado chi yowal yic 'ix 'el-l eb' 'ayn̈ on̈, najt 'ix 'elt eb', palta 'ix techj pax qui pechn meltzjc eb' 'a spatquil on̈, masnto x'ochx can eb' 'a yol sti spuertail schon̈b' cha.

²⁴ Ax eb' soldado 'ay q'ue 'a yib'n̈ smuroal jun chon̈b' cha, sjuln cot eb' sjul-lab' 'a yib'n̈ eb' a soldado. Ax x'aji, 'ay jaywn̈ eb' xchami, locn win Urías hitita 'ix cham yet' eb', xchi win 'a David.

²⁵ 'Ix yaln David 'a win checb' chi 'ixtic: —Al 'a Joab to matz 'och st'uc yuj jun cha. 'Ixta xon ya'n owal, 'ay xon mach tzcham yuj owl cha. Ya' cab' 'ip ya'n owl 'a jun chon̈b' cha, masnto cab' tzlajw can eb' 'anma chi yu'uj. 'Ixta tzotj a'n ste'nal, xchi David cha.

²⁶ A yic xyab'n sb'a 'ix yistzil win Urías cha, to xcham yichmil 'ix, 'ix 'och 'ix 'a cusc'ojlal yuj win yichmil cha.

²⁷ Ax yic 'ix 'ec' scusc'ojlal 'ix cha, 'ix 'at ya'nc win David cot 'ix. 'Ix jaw 'ix 'a yatut win cha, 'ix 'och 'ix yistzilc winac. Xlajw cha, 'ix 'alj jun swinc 'unn 'ix. Palta a jun tas sb'ojnac David cha, caw wal maysch'olnil 'a sat Jehová.