A Ch'an̈ Schab'l Libro Samuel 10 - Chuj San Sebastian Bible

'Ajxnac ganar eb' sirio yet' eb' amonita

¹ A yic x'ec' jun tiempoal cha, 'ix cham win Nahas sreyl eb' amonita, ax jun yunnal tzcuch Hanún, a 'ix 'ochx can reyal.

² 'Ix yaln David 'ixtic: A ticnec 'oj in ch'ox in wach'c'ojlal 'a win Hanún 'icha yutjnac win smam win chi 'in schamc'ojlani, xchi. 'Ix schecn 'at David jaywn̈ eb' schecb' 'at yac' sniwnal sc'ojl Hanún chi yuj schamlil smam cha. Palta ax yic xc'och eb' schecb' David chi 'a schon̈b' eb' amonita,

³ ax eb' yajl yaj 'a jun chon̈b' cha, 'ix yaln eb' 'ixtc 'a win Hanún, win sreyl eb': ¿Tom tza chaj ab'i', to a ewin schecb' David cha, to yet' smasnil sc'ojl winac, tzwul ya'nc win 'ajxoc sniwnal a c'ojl yuj schamlil a mam cha? A win David cha, 'ix ya' cot win eb' schecb' tic, yic tzwul smaclnoc eb' yila', tas yaj yol qui chon̈b'ec tic, ax wul satnc 'el winac, xchi eb' 'a winac.

⁴ Yuj cha, 'ix ya'n win Hanún chi yamchjoc eb' schecb' David cha, 'ix ya'n win joxxoc 'el c'axp xil sti eb', 'ix ya'n win lot'xoc 'el sti spichl eb', masnto xq'ue'ch 'a sti syop eb'. Xlajw cha, schecn meltzjoc win eb'.

⁵ A yic xyab'n sb'a David to 'ixta x'aj eb', 'ix ya'n 'at schamal eb' 'a yol b'e, yujto caw q'uixweltac yilx eb'. 'Ix yaln win rey cha, to ata tzcan eb' 'a chon̈b' Jericó, at tzq'uib'x xil sti eb' cha, 'ixta to b'i'an tzjapx eb' 'a Jerusalén.

⁶ Ax eb' amonita, 'ix nachj 'el yuj eb' to tu tas sb'o eb' 'a sat David, yuj cha, 'ix 'at stojnc eb' junc'l mil eb' soldado sirio xcot 'a chon̈b' Bet-rehob, yet' 'a chon̈b' Soba, yet' jun mil eb' soldado xyac' win sreyl Maaca, yet' lajchwe mil pax eb' xcot 'a chon̈b' Is-tob.

⁷ Ax David 'ix yab' sb'a 'a tas wan sb'on eb' cha, yuj cha, schecn 'at Joab yet' smasnil eb' soldado caw jeln 'a owal.

⁸ A eb' soldado amonita cha, 'ix 'el-l eb' 'a yol sti spuertail schon̈b' cha, yic tz'och eb' 'a owal, ya' sb'a ax eb' soldado sirio 'ay 'a Soba, 'a Rehob, eb' xcot 'a Is-tob yet' eb' xya' cot win sreyl Maaca, 'ix can eb' 'a snajtil 'el sti chon̈b' cha, axta stojlb'tzej sb'a eb', yic tz'och eb' 'a owal.

⁹ A yic xyiln sb'a Joab, to 'ay eb' soldado chi 'ayx 'ec' 'a yojltac eb', 'ay pax eb' 'ayc' a spatquil 'el eb', yuj cha, 'ix si'n 'el eb' soldado israel caw jeln 'a owal, 'ix ya'n lista sb'a yic tzya'n owl yet' eb' sirio cha.

¹⁰ Ax nan̈l xo eb' soldado cha, 'ix can eb' yuj 'a yol sc'ab' win Abisai yu'tac Joab cha, sec ax win tz'a'n owl yet' eb' amonita.

¹¹ 'Ix yaln Joab 'ixtic: Toto a eb' sirio yel xo jeln 'a wib'an̈, tzach 'at colwjc wet'oc, toto a pax eb' amonita yel xo jeln 'a eb'n̈ ach tic, 'oj in cot colwjoc pax et'oc.

¹² Caw te'n tzotj a b'a, ca'c quip qui colnec qui nacion̈, atn eb' chon̈b' yic qui Diosalec. B'o cab' 'icha tas tznib'j Jehová, xchi Joab.

¹³ 'Ix 'at Joab yet' eb' soldado, xya'n eb' owl yet' eb' soldado sirio cha, palta ax x'aji, 'ix 'at eb' sirio chi 'elc yuj Joab.

¹⁴ A yic xyiln eb' amonita cha, to x'at eb' sirio chi 'eloc, yuj cha, 'ix 'at pax eb' 'elc 'a yojltac Abisai. 'Ix 'och eb' sc'ub'c 'el sb'a 'a yol chon̈b' cha. Yuj cha, 'ix 'och wan Joab ya'n owl yet' eb' amonita, 'ix pax 'a Jerusalén.

¹⁵ 'Ix yiln eb' sirio cha, to xlajw 'el eb' yuj eb' israel, yuj cha, 'ix syamn pax sb'a eb' jun 'ejm xo.

¹⁶ Ax win Hadad-ezer, 'ix 'at ya'nc win cot eb' sirio cajn 'a sc'axpil 'ec' sti a niwn a Eufrates. 'Ix cot eb', axta xjaw eb' 'a chon̈b' Helam. A win Sobac, a win b'ab'l yuj eb', yujto syajlil eb' soldado win Hadad-ezer chi yaj winac.

¹⁷ Palta 'ix alx pax yab' David, chajtlto 'ay tas wan sb'on ewin 'a spatic. Yuj cha, 'ix ya'n pax syam sb'a smasnil eb' soldado israel, 'ix 'ec' eb' 'a yojl 'a Jordán, 'ix c'och eb' 'a chon̈b' Helam. Axta ste'wtzej sb'a eb' sirio chi ya'n owl yet' David.

¹⁸ Ax x'aji, 'ix 'atx eb' sirio chi 'elc 'a yojltac eb' israel cha. A eb' xcham yuj David 'a owl cha, uque ciente eb' 'aych 'a yol caruaje yic owal yet' chawinc mil eb' soldado sirio 'ay q'ue 'a yib'n̈ chej. 'Ix smiln pax David win Sobac, atn win syajlil eb' soldado cha, 'ix chamcn win ta'.

¹⁹ Ax xyiln eb' rey 'aych colwjoc yet' win Hadad-ezer, to xlajw 'el eb' yuj eb' israel, 'ix yaln eb' to tz'och eb' 'a junc'ojlal yet' eb'. Yuj cha, xcan eb' 'a yaln̈ schecnb'il David. Ye'n̈j cha, man̈x 'a 'aj xcolwj eb' sirio chi 'a eb' amonita cha, yujto xiwcn 'el eb'.