A Ch'an̈ Schab'l Libro Samuel 1 - Chuj San Sebastian Bible

Yab'jnac David to chamnc Saúl

¹ Chamnc xo Saúl yic 'ix ya'n ganar David eb' amalecita 'a owal. Xlajw cha, 'ix meltzj David, axta 'ix jaw 'a Siclag.

² Ax 'a schab'jial 'ix c'och jun winc 'a David cha, ata xcot win 'a 'aj 'e'nc scamplamento Saúl. Caw jatquixtac spichul, 'ay q'ue lum 'a scal xil sjolom yic tzch'oxn 'eli chajtlto 'ay scusc'ojlal. Ax yic xc'ochi, 'ix 'em n̈ojnjoc 'a yojltac David.

³ 'Ix sc'anb'n David 'ixtc 'a 'a: —¿'Ajtil tzach coti? xchi. —In cot 'elc 'a scamplamento eb' soldado israel, xchi winac.

⁴ —¿Tas 'ix uj ta jun? Al jac wab'i', xchi David cha. —A eb' soldado israel, 'ix 'at eb' 'elc 'a owal, caw niwn pax eb' xchami. 'Ixta pax Saúl yet' win Jonatán atn jun yunnal, 'ix cham pax eb', xchi winac.

⁵ 'Ix sc'anb'n pax David 'ixtc 'a win quelm 'et'jnac jun 'ab'x cha: —¿Tas xotj ojcan pax ach tic, chajtlto xcham Saúl yet' Jonatán? xchi David.

⁶ 'Ix ta'w win quelm cha, xyaln 'ixtic: —C'uxn wal 'ayn 'ec' 'a lum jolm witz tzcuch Gilboa, ax xwilni n̈ojn xo q'ue Saúl chi 'a yib'n̈ slanza, tza'n pax sjaw eb' 'ajc'ojl chi yet' scaruaje yic owal, yet' eb' 'ay q'ue 'a yib'n̈ chej.

⁷ 'Ix yiln 'at 'a spatic, ax 'ix yilni to lin̈n in 'ec' ta'. Yajn̈j wal cha, in yawtn cot 'a stz'ey. 'Ix in c'anb'n 'ixtc 'a 'a: ¿Tas tza nib'j 'ayin? xin chi.

⁸ ¿'Ajtil tzach coti? xchi 'ayin. 'Aj Amalec in, xin chi 'a 'a.

⁹ Yuj cha, 'ix yaln 'ayn 'ixtic: Tzin tew wal 'ayach, to tza nitz cot a b'a 'a in tz'ey, tzin a wach' miln can chamoc, yujto tox x'och in yailal, palta pitzn in, xchi.

¹⁰ Yuj cha, xin nitzn 'och in b'a 'a stz'ey, 'ix in wach' miln can chamoc, sec wach' matz yab' syal si'mb'il. 'Ix wila to yowlal 'oj chamn̈ej, yujto tox 'ix lajwi. A yic chamnc xo cha, xwi'n 'el scorona 'a sjolom, yet' jun brazalete 'aych 'a sc'ab' yic tzwi'n cot 'aych ach wajlil, xchi winac.

¹¹ A yic xyab'n David jun cha, 'ix stzilnjat spichl yet' eb' ajun yet'oc, yic tzch'oxn 'el eb' scusc'ojlal.

¹² Caw x'oc' eb' yuj schamlil Saúl yet' Jonatán, an̈jtona yujto xlajw 'el eb' soldado israel 'a owal, atn eb' schon̈b' Jehová. 'Ix 'och pax eb' 'a c'ajb'c'ojlal masnto 'a yic xq'uic'b' 'ejm 'a yic jun c'u cha.

¹³ Xlajw cha, 'ix sc'anb'n David 'ixtc 'a win quelm chi 'et'jnac jun 'ab'x cha: —¿Mach 'aych yic ach tic? xchi. —Yunnaln jun win chuc chon̈b'al, jun win 'aj Amalec, xchi winac.

¹⁴ —¿Tas yuj 'ix a te'wtzej a b'a a miln cham win rey sic'b'il 'och yuj Jehová? xchi David.

¹⁵ Xlajw cha, 'ix yawtn cot David chi jun winc 'a scal eb' ajun yet' cha, 'ix yaln 'ixtc 'a 'a: —¡Mil cham jun winc tic! xchi. Yuj cha, smiln cham win jun win quelm cha.

¹⁶ A yic wan smilx scham win cha, ya' sb'a cha, xyaln David 'a win 'ixtic: —Mun ach 'ix ej cot chaml 'a eb'an̈, yic 'ix alni chajtlto ach 'ix a mil cham jun win rey sic'b'il 'och yuj Jehová, xchi.

B'it yic cusc'ojlal

¹⁷ Xlajw cha, sb'itnan David jun b'it tic yuj schamlil Saúl yet' yuj Jonatán.

¹⁸ 'Ix yalni to yowlal tzcuyx eb' 'aj Judá 'a jun b'it tic. A jun b'it tic, ata tz'ib'b'il can 'a ch'an̈ un̈ yic Jaser, 'aj tzyal 'ixtic:

¹⁹ Ach chon̈b' Israel, caw 'oltac wal x'aj sat 'ejm a b'inab'ilal 'a eb' lum jolmctac witz. ¡Tas wal x'aj yem ewin caw wal jelan!

²⁰ Man̈ eyal yab' eb' 'ay 'a chon̈b' Gat, man̈ eyal-l jun 'ab'x chi 'a yoltc scayeal chon̈b' Ascalón, sec wach' ma'oj tzaljoc chan̈ eb' 'ix filistea, sec wach' ma'oj b'atjoc chan̈ eb' 'ix chuc chon̈b'al chi yuj tzaljc'ojlal.

²¹ Man̈x cab' 'em n̈ab' yet' chicb'chan̈ 'a yib'n̈ eb' lum switzl Gilboa, man̈x 'a tas 'oj 'awxoc yic tz'ajx ofrendail. Man̈x 'oj stac' yawx eb' lu'um yujto ata x'och chamel. Ata xte'x can 'ejm jun tzo'n̈ tas tzmacn sat jul-lab' 'a eb' syajlil chon̈b' Israel. Ata 'ix can stzictznil jun q'uen tzmacn sat jul-lab' tzc'anlb'ej Saúl.

²² Caw may 'aj ton̈j 'ix meltzj Saúl yet' Jonatán 'a 'ichn̈jta 'a owal. A yico', to xb'on̈xn̈ej yespada yet' sjul-lab' 'a scal schiq'uil yet' 'a xepual eb' 'ajc'ojl caw jeln cob' 'a owl cha.

²³ Ach Saúl yet' 'ach Jonatán, caw chamc'ojlb'ilx wu'uj, caw nib'b'ilx paxi, junn̈j eyec' 'a yic pitzn ex to, junn̈j ex 'aj pax e chami. 'Ec'b'al sjelnal e b'ey 'icha no salt'iw. Yel xo 'ec'b'al eyip 'a e no león.

²⁴ ¡Ex 'ix 'aj Israel, 'o'n̈ec yuj Saúl! atn jun man̈x jantcoc sja'l ex spichn yet' e pichul, xya'n pax 'och q'uen oro yelwnub'loc e pichl cha.

²⁵ A wal ewin caw jelan, ¡tas wal x'aj ewin yem 'a scal owal! ¡Tas yuj xmilx cham Jonatán 'a lum jolm witz cha!

²⁶ Caw wal 'ayn 'och 'a cusc'ojlal oj wu'tac Jonatán. Caw niwn a wach'c'ojlal a'jnac 'ayin. A wal a chamc'ojlal a ch'oxjnac 'ayin, 'ec'b'al xo 'a yib'n̈ schamc'ojlal eb' 'ix 'ix.

²⁷ ¡A wal ewin caw jelan, tas wal x'aj ewin yemi! ¡A syamc'ab' ewin yic owal, caw wal choc' x'ajcn smasnil! xchi David 'a sb'it.