A Schab'il Carta San Pedro 1 - Chuj San Sebastian Bible

Tz'el yich scarta Pedro

¹ An tic Simón Pedro in, ya'mal in servil Jesucristo. Schecb' in paxi. Tic tzin tz'ib'j 'at jun in carta tic 'ayx tzeya'ch e c'ojl 'a Dios quet' on̈. Caw niwn swach'l eyic quet' on̈, yujto 'aych qui c'ojlec 'a 'a. 'Ixta tzon̈ 'ajec, yujto a qui Diosalec, atn qui Colmal Jesucristo, caw tojl snab'en.

² Ya' cab' Dios swach'c'ojlal yet' sjunc'ojlal 'ayx ta', yujto eyojc xo Dios cha, yet' Cajlil Jesucristo.

A sb'eyb'al eb' yic xo Dios

³ 'Ay jun tzo'n̈ tas 'ay tz'och cujec, yic tzqui chanec qui q'uinl 'a jun 'ejmn̈ej, yic tzca'nec pax 'och qui nab'en 'a Dios. Yujn̈ej spoder, c'uxn xyac' jun tzo'n̈ chi 'ayn̈ec, yujto xyac' cojcoquec 'el Jesucristo. A 'awtjnacn̈ec 'och yico'oc, yujto caw niwn yel'chi, man̈ jantcoc swach'il.

⁴ Yuj spoder cha, ya'jnac can sti 'ayn̈ec. A jun tzo'n̈ tas yaljnac can cha, caw niwn yel'chi, til wal swach'il. Yuj jun tzo'n̈ cha, tztac' tzon̈ colchjec 'el 'a yol sc'ab' jun tzo'n̈ maysch'olnil tznib'j 'och eb' 'anma 'a yolyib'n̈q'uinl tic. Toto 'ixta tzon̈ 'ajec, caw lajnn̈ej tz'aj qui nab'enec yet' Dios, yuj jun tzo'n̈ tas yaljnac can cha.

⁵ Yuj cha, man̈ cojnoc tzca'c 'och qui c'olj 'a 'a. Yowlal tzca'c pax 'ip qui tojlb'tzan qui b'eyb'al, caw qui cuyc sjelnal Dios.

⁶ Qui tenc 'och wan qui b'a 'a maysch'olnil. Caw te'n tzcutjec pax qui b'a. Cojxn 'a Dios tzca'c 'och qui nab'en.

⁷ Caw wach'n̈j tzcutjec pax qui nab'en 'a eb' quit creyenteal, tzqui chamc'ojlanec qui b'a yet' eb'.

⁸ Toto yel xo tzqui wach' b'ojec jun tzo'n̈ tic 'a junjn c'u, toto 'ixta', caw 'ay copisoec yuj Dios. Man̈ nab'an̈ejoc xcojquejec 'el Cajlil Jesucristo.

⁹ Palta a eb' matz b'on jun tzo'n̈ tic, 'icha to macn sat eb', mto matz tac' yiln eb' junc tas 'a najat, yujto man̈xtzac sna cot eb', chajtlto 'ic'b'il can 'el smul eb' 'a yic yaln̈taxi.

¹⁰ Yuj cha, ex wu'tac, ex wanab', caw tzca'c quip cojcan 'el si'mb'il, chajtlto caw yel 'awtb'iln̈ec yico'oc, sic'b'iln̈ec xo 'el yu'uj. Toto 'ixta tzcutjec qui b'a, may b'a'n̈ 'oj juwc 'el qui nab'enec.

¹¹ Toto 'ixta', caw yelc'ojlal 'oj qui chaxec 'och 'a yol sc'ab' Cajlil Jesucristo, atn qui Colmalec. Ata 'oj qui canc 'a jun 'ejmn̈ej.

¹² Yuj cha, wach'xam eyojc xon jun tzo'n̈ tic, wach'xam te'n ex xo 'a jun tzo'n̈ cuynb'il caw yel 'aj 'aych e nab'en, palta nachji, 'oj wac' e na coti.

¹³ Tzin na'a, wach' tzex in jucb'tzej, tzwa'n e na cot jun tzo'n̈ tic, ya' sb'a pitzn in to.

¹⁴ Yujto a Cajlil Jesucristo x'a'n nachjc 'el wu'uj, chajtlto man̈x najtloc wal 'ayn 'eq'ui.

¹⁵ Yuj cha, tzwac' 'ip, sec wach' 'oj stac' e nan cot jun tzo'n̈ cuynb'il tic 'a smasnil tiempo, yic tox in paxi.

A eb' yiljnac stzictznil Jesucristo

¹⁶ Caljnacx can 'ayx on̈, chajtlto caw 'ay spoder Cajlil Jesucristo, to yowlal 'oj jawc pax 'a scha'ejmal. Palta a jun tzo'n̈ cha, man̈ comn paxti'oc. Man̈ munoc xqui na 'a qui jolm on̈. Yujto a Cajlilec, caw quiljnac yet' qui sat on̈, chajtlto man̈ jantcoc swach'il.

¹⁷ Caw quiljnac on̈, yic ya'n qui Mam Dios stzictznil 'a 'a. Cab'n pax yaln Dios on̈, to caw niwn yel'ch Cajlilec cha. Yaln 'emt Dios 'ixtc 'a scal jun sniwn tzictznial: Atn jun tic, Wunnal, chamc'ojlb'il wu'uj, caw tzin tzalj yet'oc, xchi 'emta.

¹⁸ A jun paxti chi 'ochnc 'a satchan̈ cha, caw cab'jnac yet' qui chicn on̈, yujto xit'nc on̈ 'ec' yet' Cajlilec 'a jun tzaln chi 'on̈. Atn 'a jun tzaln chi 'aj wulnc 'emt Dios.

¹⁹ An̈jtona', 'aycto sjaw Cajlilec, stz'ib'n can eb' schecb' Dios yab'xil. An̈ja 'ayc' Ch'an̈ Un̈ chi ticnec. A tas tzyal Ch'an̈ Un̈ cha, caw yel. Caw wach' tzcutjec qui b'a, toto an̈ja ca'nec 'och qui nab'en 'a tas tz'ib'b'il can yuj eb' cha. Yujto a Ch'an̈ Un̈ cha, lajn 'icha junc cantil tzqui tzic 'a 'aj caw q'uic'q'uinal. Tzyac' yoc 'ayon̈, masnto yic wan sacb'i, yic tzq'uel jun niwquil chac c'anal. 'Icha jun c'anal cha, 'ixta 'oj 'aj Cristo yic 'oj jawc paxi, ax swach' 'a'n sacq'uinl 'a qui pixnec.

²⁰ A eb' schecb' Dios pecti', 'aycto stz'ib'n can eb' 'a Ch'an̈ U'un̈, yuj tastc 'oj jawoc. Palta yowlal tzcojquejec 'eli, to may junc mach tztac' scomn aln sch'ocoj, tas tzyal 'el'ch jun tzo'n̈ tz'ib'b'il can cha.

²¹ Yujto a eb' cha, may junc mun snajnac eb' 'a sjolom, stz'ib'n can eb'. Palta atn Dios si'jnac 'el eb'. Ax Yespíritu 'a'jnac nachjc 'el yuj eb', chajtl yutjnac eb' yaln can 'el spaxti cha, stz'ib'n can eb'.