A Ch'an̈ Schab'il Libro Yic Yab'ixal Eb' Rey 9 - Chuj San Sebastian Bible

Sic'b'il 'och Jehú reyl 'a Israel

¹ A Eliseo win schecb' Dios, 'ix yawtj cot win jun win quelm 'a scal eb' schecb' Dios, 'ix yaln 'a 'ixtic: —'Ac' lista a b'a, ax a 'ati. 'Ij 'at jun aceite tic yet' yet'ul. Tzlajw cha, tzach 'at 'a chon̈b' Ramot 'a yol yic Galaad.

² A yic 'oj a c'och ta', tza sayn 'ec' Jehú yunnal Josafat yixchicn Nimsi. Tzach 'och 'a 'aj 'ayq'ui, tze'n 'el 'a scal eb' yitb'eym 'ayc' yet' cha, tze'n 'at 'a junc xo cuarto.

³ Tzlajw cha, tze'n cot jac aceite cha, tza secn q'ue 'a sjolom, tzaln 'a 'ixtic: 'Ixtc 'ix yutj Jehová yalni: An tzach in si'cn 'eli yic tzach 'och reyl 'a chon̈b' Israel, xchi Dios, xa chi. Tzlajw cha, tza jacn̈ pax te puerta chi muc'uc, tzach 'at 'eloc, man̈ ach 'och wa'an, xchi Eliseo chi 'a jun win quelm cha.

⁴ Yuj cha, 'ix 'at jun quelm schecb' Dios chi 'a chon̈b' Ramot 'a yol yic Galaad cha.

⁵ A yic 'ix c'och ta', wocn 'ejm smasnil eb' scapitan̈il eb' soldado. Xlajw cha, 'ix yaln 'ixtic: —'Ay wal jab' tas tzin nib'j tzwal 'aych ach in capitan̈, xchi win quelm cha. —¿Mach junc on̈ 'aj 'oj a paxtin cha? xchi Jehú. Atn 'aych ach in capitan̈, xchi 'a Jehú cha.

⁶ Yuj cha, 'ix q'ue wan Jehú 'ix 'och 'a yol n̈a. Xlajw cha, ax jun schecb' Dios cha, 'ix secn q'ue jun aceite chi 'a sjolm winac, 'ix yaln 'a win 'ixtic: —'Ixtc 'ix yutj Jehová yalni, atn qui Diosalec: An tzach in si'cn 'eli, yic tzach 'och reyl 'a chon̈b' Israel, atn in chon̈ab'.

⁷ Ach 'oj a satl smasnil eb' yin̈tl ajlil Acab. 'Ixtnta 'oj wutc wa'n spac schamlil eb' in checab', yet' eb' yalmal 'el in paxti; yujto 'elnc schic'l eb' yuj 'ix Jezabel.

⁸ Smasnil yin̈tl Acab 'oj a satli, smasnil eb' winc 'aych mosoal to man̈ yico'oc sb'a, yet' eb' mun yic sb'a, 'oj satl eb' 'a scal chon̈b' Israel, man̈x 'a junc 'oj can 'a pitznal.

⁹ 'Ixtc 'oj wutc yin̈tl Acab 'icha wutjnac yin̈tl Jeroboam yunnal Nabat, 'icha pax wutjnac yic Baasa yunnal Ahías.

¹⁰ Ax pax yuj 'ix Jezabel, a no tz'i 'oj chinc 'ejm 'ix 'a yol yic Jezreel, man̈x 'a mach 'oj mucnoc, xchi Jehová, xchi jun schecb' Dios cha. Ax yic xlajw yaln jun tzo'n̈ tic, xlajwn̈ej cha, 'ix sjacn spuertail jun n̈a cha, 'ix 'at 'eloc.

¹¹ A yic 'ix 'elx c'ochx Jehú 'a 'aj yamn eb' yit capitan̈il yic win rey cha, 'ix sc'anb'n eb' 'ixtc 'a 'a: —¿Tas xchi, wach' ama? ¿Tas yuj tzach wul yil jun tzcot 'a sjolm cha? xchi eb'. —Ax tic eyojc winac, eyojc xon tas tzyaln̈j eb' schecb' Dios cha, xchi Jehú.

¹² —Ma'ay, man̈ cojcoc on̈, al 'ayn̈ on̈ tas chi xwul yala', xchi eb'. —'Ixtc ab' 'ix yutj Jehová yalni: An tzach in si'cn 'eli yic tzach 'och sreyloc chon̈b' Israel, xchi ab'i', xchi Jehú 'a eb'.

¹³ Xlajw cha, junjn eb' 'ix yij cot eb' spotil, 'ix ya'n 'ejm eb' 'a yaln̈ yoc Jehú 'a yib'n̈ jun tzo'n̈ b'achctac tz'at 'a cha'an̈. 'Ix yutz'n eb' sch'ac no mam calnelu, 'ix yaln eb' 'ixtc 'a caw 'ip: ¡A win Jehú, rey xo win ticnec! xchi eb'.

Chamnc Joram sreyl Israel yuj Jehú

¹⁴ A win Jehú yunnal Josafat yixchicn Nimsi, caw tu 'ix sna 'a spatquil win rey Joram. A win rey cha, xit'c yet' eb' yit israelal yic tzcolx 'el chon̈b' Ramot 'a yol yic Galaad 'a yol sc'ab' win Hazael sreyl chon̈b' Siria yalni.

¹⁵ 'Ayx am sjayloc c'u smeltzj 'a Jezreel yic tzyan̈tn sb'a 'aj 'ix lajw yuj eb' sirio, yic 'ix 'och owl yet' Hazael cha. 'Ix yaln Jehú 'ixtc 'a eb' yitb'eym ajun yet'oc: Toto caw yel tze nib'j tzin 'och e reyloc, may cab' junc mach tz'el 'a yol chon̈b' tic, sec wach' may mach tz'at alnoc 'a eb' 'aj Jezreel yuj jun 'ab'x tic, xchi Jehú.

¹⁶ Xlajw cha, 'ix 'och Jehú 'a yol scaruaje yic owal, 'ix 'at 'a Jezreel 'a 'aj wan yan̈tn sb'a rey Joram. Ata 'ayc' pax Ocozías sreyl Judá.

¹⁷ Ax win stan̈mal chon̈b' Jezreel 'ayc' 'a storreal chon̈b' cha, 'ix yiln winac to wan sjaw Jehú yet' nan̈l eb' soldado, 'ix 'el yaw, 'ix yaln 'ixtic: —¡Wan sjaw nan̈l eb' soldado! xchi winac. Xlajw cha, 'ix yaln rey Joram chi 'ixtic: —Checc 'at junc soldado 'a yib'n̈ chej 'at yil mach jun tzjaw cha, tzc'anb'n 'a 'a, man̈toc am 'a'j owl tzjawi, xchi.

¹⁸ 'Ix 'at jun soldado yet' schej chi 'at yila', 'ix yaln 'a 'a: —A win rey tzin checn cot wul in c'anb'c 'ayach, man̈toc am 'a'j owl tzach jawi, xchi 'a winac. 'Ix ta'w Jehú, 'ix yalni: —Ach tic may aln ec 'a jun tic. ¡Cojn to tzach 'och tza'n wu'uj! xchi. Xlajw cha, 'ix yaln win stan̈mal chon̈b' 'ixtic: A win checb' cha, 'ix c'och 'a 'aj tzjaw eb' cha, palta mantzac 'ilx smeltzj winac, xchi winac.

¹⁹ Yajn̈j cha, 'ix schecn 'at win rey junx soldado 'a yib'n̈ chej, 'ix c'och 'a eb', 'ix yaln 'ixtic: —A win rey tzin checn wul in c'anb'c 'ayach, man̈toc am 'a'j owl tzach jawi, xchi. —Ach tic, may aln ec 'a jun tic. ¡Cojn to tzach 'och tza'n wu'uj! xchi Jehú cha.

²⁰ 'Ix yaln pax win stan̈mal chon̈b' chi jun 'ejm xo: —An̈jtona junx win cha, 'ix c'och 'a 'aj tzjaw eb' cha, palta mantzac 'ilx smeltzji. A jun mach tzjaw 'a yol caruaje, coyn wal to 'a Jehú yixchicn Nimsi, yujto yet' smasnil yip tzjaw 'icha xon sb'eyb'al, xchi winac.

²¹ Xlajw cha, 'ix yaln win rey Joram chi 'ixtic: —¡'A'c 'och no chej 'a in caruaje yic owal! xchi winac. A yic wach'x yaj scaruaje rey Joram yet' pax rey Ocozías, 'ix 'at eb', junjn eb' yet' scaruaje yic owal. 'Ix 'at schanc eb' Jehú 'a 'aj 'ay lum slum can Nabot win 'aj Jezreel, ata schaj sb'a eb'.

²² A yic schan sb'a rey Joram chi yet' Jehú, 'ix yaln 'a 'ixtic: —¿Junc'ojlal am tzach jaw Jehú? xchi. 'Ix ta'w Jehú 'ixtic: —¿'Aj 'oj ec' junc'ojlal, ya' sb'a a 'ix a nun Jezabel an̈j 'ijnoc yoch 'ix 'emmquilal 'a jun tzo'n̈ comn dios yet' sb'alwjumal? xchi Jehú.

²³ Xlajw cha, 'ix meltzj rey Joram, 'ix 'at 'eloc. 'Ix 'awj to can 'at 'a rey Ocozías, 'ixtic: —¡Chaml jun tic Ocozías! xchi.

²⁴ Palta ax Jehú tojl xyutj sjuln 'at sjul-lab' chi 'a rey Joram, ax wal 'a yich spatquil xc'ochi. 'Ix c'axw 'ec' 'a spixan, 'ix 'ec' telnjoc 'a yol scaruaje, 'ix chami.

²⁵ Xlajw cha, 'ix yaln Jehú 'ixtc 'a jun scapitan̈ Bidcar sb'i: —¡'Ij 'elta! Tzlajw cha, tz'at 'a julnc can 'el 'a sti 'el slum can Nabot win 'aj Jezreel cha. Yujto tzat in na coti to ach tic ajun ach wet'oc, yic tza'n on̈ 'a spatquil scaruaje Acab, atn smam jun winc tic, yic yaln can Jehová 'a yib'n̈ 'ixtic:

²⁶ 'Icha wal 'ix wil smilx cham Nabot yet' eb' yunnal 'ewi, 'ixta wal pax 'oj wutc wa'n spac 'aych 'a jun lugar tic, xchi Jehová. Yuj cha, 'ij 'elta, tz'at a julnc can 'at 'a lum slum can Nabot, yujto 'ixta yutjnac Jehová yalni, xchi Jehú.

Milb'il rey Ocozías yuj Jehú

²⁷ A yic 'ix yiln 'och Ocozías sreyl Judá tas 'ix uji, 'ix 'at 'eloc, ata x'atcn 'a sb'el Bet-hagan. Palta ax Jehú 'ix 'atn̈j 'a spatquil, 'ix yaln 'ixtic: —¡Milc pax chamoc! xchi. 'Ix yamchj yuj eb' 'a lum switzl Gur 'a sla'nil Ibleam. Ata xlajw yuj eb' 'a yol scaruaje, palta 'ix 'at 'elc 'a Meguido, axta xchami.

²⁸ Xlajw cha, 'ix 'ijx 'at yuj eb' schecb' 'a Jerusalén 'a yol jun caruaje, ata xmucx 'a 'aj mucn eb' smam yichm 'a Schon̈b' David.

²⁹ Yuxlchil ab'il yoch Joram yunnal Acab reyal, 'ix schan 'el yich Ocozías ya'n reyl 'a Judá.

Schaml 'ix Jezabel

³⁰ Xlajw cha, 'ix 'at Jehú 'a Jezreel. A yic 'ix yab'n 'ix Jezabel tas 'ix uji, 'ix sb'on̈n 'ix yol sat, caw wach' xyutj 'ix squichn sjolom, sec wach' yilx 'ix. Xlajw cha, 'ix 'elt t'an̈n 'ix 'a jun wentnu.

³¹ A yic 'ix c'och Jehú 'a sti spuerta'il chon̈b' cha, 'ix yaln 'ix 'a 'ixtic: —¿Wach'm a c'ojl Zimrí, ach 'ix a mil cham ajlil? xchi 'ix.

³² 'Ix q'ue q'ueln Jehú 'a jun ventnu cha, 'ix yaln q'ue 'ixtic: —¿Mach 'aych wet'oc? xchi winac. 'Ay chawn̈ 'oxwn̈ eb' 'ay yopiso 'a yatut 'ix, 'ix 'elt t'an̈n eb',

³³ 'ix yaln q'ue Jehú 'a eb' 'ixtic: —¡Ecc 'elt jun 'ix cha! xchi 'a eb'. Yuj cha, 'ix yecn 'elt eb' 'ix, 'ix tz'itj can 'och schic'l 'ix 'a sat yich n̈a, yic sma'n 'och sb'a yemta, ax no chej 'ix te'n ch'iychjoc 'ix.

³⁴ Xlajw cha, 'ix 'at Jehú wa'oc, 'ix yu'n tas tzyuq'uej. A yic xlajw swa Jehú, 'ix yaln 'ixtic: —'Iltec tas tzeyutj jun 'ix caw maysch'olnil cha, mucc 'ix, yujn̈ej to yisl rey 'ix, xchi 'a eb'.

³⁵ Palta ax yic x'at eb' 'at smucu', ax xyiln eb', cojxn̈ej sb'acl sjolom, yet' yoc yet' sc'ab' 'ayq'ui.

³⁶ Xlajw cha, 'ix meltzj eb' wul yal 'a Jehú, yuj cha, 'ix yaln Jehú 'ixtic: —Toxn yaljnac can Elías win schecb' Dios 'aj Tisbe, chajtlto a no tz'i 'oj chinc 'ejm sniwnal Jezabel 'a yol yic Jezreel.

³⁷ A sniwnal cha, sactzicnac 'oj 'ajcn 'icha tz'aj spuct stza no noc' 'a sat lum 'a yol yic Jezreel, sec wach' may junc mach 'oj stac' yaln 'ixtic: A 'a tic mucn 'ix Jezabel, man̈ xchioc, xchi Dios, xchi Elías cha, xchi Jehú.