A Ch'an̈ Schab'il Libro Yic Yab'ixal Eb' Rey 7 - Chuj San Sebastian Bible

¹ Xlajw cha, 'ix yaln Eliseo 'ixtic: —'Ab'c wal spaxti Jehová. 'Ixtc 'ix yutj yalni: Yab'n 'icha hora tic q'uic'an, a 'a sti spuertail chon̈b' Samaria tic, a junc 'almu 'ixm harina mto chab'oc 'almu 'ixm cebada, jun jab' yune tumn plata 'oj stojloc, xchi Dios, xchi.

² 'Ix ta'w win tztan̈wni win rey chi 'ixtc 'a win schecb' Dios cha: —Wach'xam tzjac Jehová sventnual satcha'an̈, palta ma'oj 'el'choc 'icha tzal cha, xchi. —'Oj el jun chi yet' a sat, palta man̈x 'oj a wa 'ixim, xchi Eliseo cha.

³ A yic cha, 'ayc' chan̈wn̈ winc 'aych lepra 'a 'a, ata 'ayc' eb' 'a sti spuertail chon̈b' cha, 'ix laj yal-lanc eb' 'a junjn 'ixtic: —¿Tas tzwul qui b'oc 'a tic? Ton̈j chotn on̈c 'ec' qui tan̈wni qui chami.

⁴ Toto tzon̈ 'ochc 'a yol chon̈b' tic, 'oj qui chamc yuj wejl ta'. An̈jtona', toto tzon̈ canc pax chotn 'a tic, 'oj qui chamc xon paxi. A ticnec, coyc 'a scamplamento eb' sirio, toq'ue tzon̈ ya'c niwnc'ojlal eb', sec pitzn on̈ec. Toto tzon̈ smilc cham pax eb' jun, toxn to 'oj qui chamec, xchi eb'.

⁵ A yic 'ix 'em nummoc sq'uic'b'i, 'ix q'ue wan eb', 'ix 'at eb' 'a scamplamento eb' sirio cha. Ax yic 'ix c'och eb', 'ix yiln eb' man̈x 'a junc mach 'ayq'ui.

⁶ Yujto a Jehová 'ix 'a'n yab' eb' sirio 'a scamplamento, 'icha to xc'an̈ yec' jun tzo'n̈ caruaje yic owal, no chej yet' nan̈l soldado. Yuj cha, 'ix laj yal-lanc eb' 'a jun jun, to a sreyl chon̈b' Israel 'ix tojn win sreyl eb' hitita yet' win sreyl Egipto yic tzya'n eb' owl yet' eb' yalni.

⁷ Yuj cha, 'ix 'at eb' 'elc 'a 'ac'wal. 'Ix yactn can eb' scamplamento, smantiado, no chej yet' no b'uru. 'Ix 'at eb' 'eloc yic tzcoln sb'a eb'.

⁸ Ax yic 'ix c'och eb' 'aych lepra 'a sti camplamento cha, 'ix 'och eb' 'a yojl jun mantiado. 'Ix wa eb', 'ix yu'n eb' tas tzyuq'uej. 'Ix yi'n eb' q'uen plata, q'uen oro, yet' pichul, 'ix 'at sc'ub'nc can 'el eb'. 'Ix meltzj pax eb' jun 'ejm xo, 'ix 'och eb' 'a yojl junx mantiado. 'Ix yi'n 'elt eb' tastc 'ay 'a yojol, 'ix sc'ub'n can pax 'el eb'.

⁹ Yajn̈ej 'ix laj yal-lanc eb' 'a junjn 'ixtic: —Man̈ wach'c jun wan qui b'onec tic. A ticnec sc'ul wal qui'nec 'at wach' 'ab'ix, oc xo jun ton̈j sictac cajec. Toto tzqui tan̈wjec sacb'eli, 'ayt laj tas xcot 'a quib'n̈ec. Coyc ticnec, 'at calc 'a win rey 'a sdespacho, xchi eb'.

¹⁰ Xlajw cha, 'ix 'at eb'. Ax yic xc'och eb', 'ix 'awj eb' 'a eb' tztan̈wni spuertail chon̈ab', 'ix yaln eb' 'ixtic: —An̈ tic on̈, on̈ xit'c 'a scamplamento eb' sirio on̈. Man̈x 'a junc mach 'ayq'ui, man̈x 'a junc mach tzcab' spaxtini. Cojxn̈ej no chej, no b'uru pixn cani, ax scamplamento eb', yajn̈j yaj 'icha xon yaj sb'on chan̈ eb', xchi eb'.

¹¹ 'Ix yawtn eb' tztan̈wni spuertail chon̈b' chi eb' tztan̈wni pax sdespacho win rey.

¹² Xlajw cha, 'ix q'ue wan win rey 'a 'ac'wl cha, 'ix yaln win 'ixtc 'a eb' schecab': —'Oj wal 'ayex tas wal tznib'j eb' sirio tzon̈ yutej. Yojc eb' chajtlto tzon̈ chamc yuj wejel, yuj cha, 'ix 'el eb' 'a scamplamento, 'ix 'at sc'ub'nc 'el sb'a eb' 'a scalte', sec tzon̈ syamc eb' 'a qui pitznal. Toto tzon̈ 'elc 'a yol chon̈b' tic, ax yoxt can eb' 'a yol qui chon̈b'ec tic, xchi win rey cha.

¹³ Xlajw cha, 'ix ta'w jun 'a eb' schecb' chi 'ixtic: —'At cab' jaywn̈oc winc 'at yila', yet' own̈oc no chej 'ix can 'a chon̈b' tic, ax quilni tas jun 'ix 'uj cha, tom 'oj meltzjoc to eb', mto man̈xo. Yujto lajan, 'ay smay 'a 'aj tz'at eb' cha, 'ixta an̈ tzon̈ canc 'a tic, xchi winac.

¹⁴ Yuj cha, 'ix si'n 'elt eb' chab' caruaje yet' no chej. 'Ix checx 'at eb' tz'i'n b'ey caruaje chi yuj win rey 'a scamplamento eb' sirio. 'Ix yaln win 'a eb' 'ixtic: 'Ixquec, 'at 'iltec quila', xchi winac.

¹⁵ 'Ix 'at eb' 'a spatquil eb' sirio, masnto 'ix c'och eb' 'a a Jordán. Ax 'ix yiln eb', lan̈n can spichl eb' 'a yol b'e sjuln can 'eli yet' tastc 'ay 'a eb', yuj s'at eb' 'eloc. Yajn̈ej 'ix meltzj eb' checb' chi wul yac' yojcoc 'el win rey tas chi xit' yil eb'.

¹⁶ Xlajw cha, 'ix 'elt smasnil eb' 'anma', 'ix 'at yi'nc eb' smasnil tastc 'ay 'a yol scamplamento eb' sirio. 'Ix 'el'ch 'icha 'ix yutj Jehová yalni, to tztac' smanx junc 'almu 'ixm harina mto chab'oc 'almu 'ixm cebada yet' junc tumn plata.

^17-18 'Ix yaln win rey 'a win tztan̈wni winac; to tzcan win stan̈wc spuertail chon̈ab'; palta ax eb' 'anma', 'ix telw 'at eb' 'a yib'n̈ winac, 'ix chami. 'Ix 'el'ch 'icha 'ix yutj win schecb' Dios yaln 'a 'a, yic xit'c win rey paxtinc yet'oc yic yaln 'ixtic: A 'a sti spuertail chon̈b' Samaria, yab'n 'icha hora tic q'uic'an, 'oj manxoc junc 'almu 'ixm harina, mto chab'oc 'almu 'ixm cebada, yet' junc tumn plata xchi.

¹⁹ Palta ax jun stan̈mal win rey cha, 'ix ta'w 'ixtc 'a win schecb' Dios: Wach'xam to tzjac Jehová sventnual satcha'an̈, palta ma'oj 'el'chc 'icha tzotj aln cha, xchi. 'Ix ta'w Eliseo chi 'ixtic: 'Oj el jun chi yet' a sat, palta man̈x 'oj a wa 'ixim, xchi.

²⁰ 'Ix 'el'ch ton wal 'ixta', yujto a eb' 'anma 'ix ecn can telwc 'a sti spuertail chon̈ab', yuj cha, 'ix cham winac.