A Ch'an̈ Schab'il Libro Yic Yab'ixal Eb' Rey 6 - Chuj San Sebastian Bible

A jun milagro yet' q'uen ch'acab'

¹ Ax eb' schecb' Dios 'ix aln 'a Eliseo 'ixtic: —'Ilto, a jun lugar 'aj cajn on̈c 'ec' tic, caw wal witz'an.

² Tzon̈ tew 'aych on̈, to tzon̈ a chaj 'at 'a sti a Jordán, tz'at qui ch'acnoc junjnoc qui patzb' on̈, ax qui b'on junc n̈a 'aj tzon̈ can cajn ta', xchi eb'. —'Ixquec 'an, xchi Eliseo.

³ Tzon̈ tew 'ayach, to tzach 'at quet' on̈, xchi jun win schecb' Dios chi 'a Eliseo. —Inye, 'oj in 'ati, xchi.

⁴ 'Ix 'at Eliseo tzu'j 'el te yet' eb' 'a sti a Jordán.

⁵ Ax x'aji, a yic wan stzu'w te eb' cha, 'ix 'el socnjoc sch'acb' jun winac, 'ix 'at 'a yol a', yuj cha, 'ix 'el yaw winac, 'ix yaln win 'ixtic: —'Oltacn ach in cuymal, a jun q'uen ch'acb' tic, majn yaj q'uen wu'uj, hierro pax q'ue'en, xchi winac.

⁶ —¿'Ajtil 'ix 'at q'ue'en? xchi win schecb' Dios cha. 'Ix sch'oxn win 'ajtil 'ix 'at q'ue'en. Xlajw cha, 'ix stzu'n 'elt Eliseo jun te te', 'ix scoln 'ejm jun te 'a yojl a', 'ix q'uel b'achchoc q'uen 'a yib'n̈ a'.

⁷ —'Ij q'uet q'ue'en, xchi Eliseo 'a winac. 'Ix ya'n 'at win sc'ab', 'ix yi'n q'uet win q'ue'en.

A Eliseo yet' eb' sirio

⁸ A sreyl chon̈b' Siria 'aych 'a owl yet' chon̈b' Israel, yuj cha 'ix smol aln yet' syajlil eb' soldado, 'ajtil 'oj sb'o chan̈ win camplamento.

⁹ Xlajw cha, 'ix ya'n win schecb' Dios alxoc 'ixtc 'a sreyl Israel: Tan̈wj a b'a, man̈ ach 'ec' 'a jun lugar cha, yujto a eb' 'aj Siria 'oj 'at eb' ta', xchi.

¹⁰ Xlajw cha, 'ix schecn 'at sreyl Israel yilmal jun lugar 'aj 'ix yal win schecb' Dios cha, ax x'aji 'ix yilni to caw yel jun cha, til wal 'ejm 'ixta 'ix yutj sb'a eb', yic tzya'n cuenta sb'a eb'.

¹¹ Ax sreyl chon̈b' Siria, caw 'ix somchj 'el snab'en yuj jun tic, yuj cha, 'ix yawtn cot smasnil syajlil eb' soldado, 'ix yaln 'a eb' 'ixtic: —Alc 'ayin, mach junc 'a qui calc tic 'aych yet' sreyl chon̈b' Israel, xchi 'a eb'.

¹² 'Ix yaln jun win schecb' chi 'a 'ixtic: —May mamin rey. Palta a Eliseo win schecb' Dios 'ayc' 'a chon̈b' Israel cha, a tzaln yab' win rey cha, yuj smasnil tas tzala, wach'xam c'ultacl tzal 'a yol atut, xchi 'a 'a.

¹³ Yuj cha, 'ix yaln win sreyl Siria chi 'ixtic: —'Ixquec, 'at 'iltec 'ajtil 'ay Eliseo cha, ax wa'n 'at jaywn̈oc eb' in soldado tic, yic tz'at yamchjoc coti, xchi win rey cha. Ax yic 'ix alx 'a 'a, to a 'a chon̈b' Dotán 'ayq'ui,

¹⁴ 'ix schecn 'at win rey chi nan̈l eb' soldado yet' eb' 'ay q'ue 'a yib'n̈ chej, yet' caruaje yic owal. 'Ix c'och eb' 'a 'ac'wl 'a Dotán, 'ix yoyn sb'a eb' 'a spatquil jun chon̈b' cha.

¹⁵ 'Ix seb' q'ue wan win schecb' Eliseo 'a sq'uin̈b'ial, ax yic 'ix 'elta, 'ix yilni man̈x jantcoc soldado oyn 'och 'a spatquil jun chon̈b' cha, yet' chej yet' caruaje yic owal; yuj cha, 'ix 'at win 'at yal 'a Eliseo 'ixtic: —'Oltacn̈ mamin, ¿tas 'oj cutc qui b'a? xchi win checb' cha.

¹⁶ —Man̈ 'ach xiwoc, caw niwn mach 'ayc' quet'oc, 'ec'b'al 'a yib'n̈ eb' 'ayc' yet' eb' cha, xchi Eliseo.

¹⁷ 'Ix leslwi Eliseo 'ixtic: Tzin tew 'aych Mamin Jehová, to tza jac sat win in checb' tic sec to 'oj yila', xchi. 'Ix sjacn Jehová sat win checb' cha, 'ix yiln winac to a 'a jolmctac witz, oyn cot eb' soldado, 'ay q'ue eb' 'a yib'n̈ chej yet' 'a yol caruaje to nab'a c'ac', oyn 'och eb' 'a Eliseo cha.

¹⁸ Ax eb' sirio cha, a yic wan ya'n lista sb'a eb' yoch 'a owl cha, 'ix leslwi Eliseo 'ixtic: —Mamin Jehová, tzin c'an 'ayach to tzac' somchjoc snab'en eb', sec man̈xtzac cab' stac' yiln eb' tic, xchi. Yuj cha, man̈x 'ic stac' yiln eb' yuj Jehová, 'icha 'ix yutj Eliseo sc'anni.

¹⁹ Xlajw cha, 'ix 'at Eliseo 'at yal 'a eb' 'ixtic: —Man̈oc jun b'e tic tze sayq'ui, yet' jun chon̈b' tic. 'Ochn̈ec tza'n wu'uj, ax ex wi'n 'at 'a 'aj 'ayc' jun winc tze sayc' cha, xchi 'a eb'. Axta xyij 'at eb' 'a Samaria.

²⁰ A yic 'ix c'och eb' 'a Samaria cha, 'ix leslwi pax Eliseo 'ixtic: Mamin Jehová, 'ac' b'oxc snab'en eb', sec to 'oj yilx eb', xchi. 'Ix sjacn Jehová sat eb', ax xyiln eb' to 'ayx 'ec' eb' 'a yol chon̈b' Samaria.

²¹ Ax xyiln 'och sreyl chon̈b' Israel eb', 'ix sc'anb'n 'a Eliseo 'ixtic: —¿Mamin, tzam ac' in mil cham eb'? xchi.

²² —Ma'ay, man̈ 'a mil cham eb'. Ach tic, ¿tom tza mil cham eb' tzyamchj oj 'a owal? A eb' tic, 'ac' wa eb', 'ac' pax tas tzyu'j eb'. Tzlajw cha, tza'n meltzjoc eb' 'a syajlil, xchi Eliseo 'a win rey cha.

²³ Xlajw cha, 'ix b'o wal tas wach' sc'uxxi, 'ix wa eb', 'ix yu'n eb' tas xyuq'uej, xlajw cha, 'ix checx meltzjc eb' 'a syajlil. Ye'xn̈ej chi ta', man̈x 'a 'aj 'ix comn 'och eb' soldado sirio 'a yol smacb'en eb' israel.

'Ix oyx Samaria

²⁴ 'Ix lajw ye'cn jun cha, ax win Ben-adad sreyl chon̈b' Siria, 'ix ya'n syam sb'a smasnil eb' soldado, 'ix 'at yoync 'och sb'a eb' 'a spatquil Samaria yic tzya'n eb' owl yet'oc.

²⁵ Yuj cha, 'ix jaw wal jun niwquil wejl 'a Samaria. 'Ix q'ue stojl smasnil tas. A junc no sjolm b'uru 80 q'uen tumn plata x'aj stojol, ax junc 'echb'al stza no parama, o'e q'uen tumn plata x'aj stojol.

²⁶ A yic wan sb'eyc' win sreyl chon̈b' Israel 'a yib'n̈ muro, 'ix 'awj 'at jun 'ix 'ix 'a 'a, xyaln 'ixtic: —¡Mamin rey colin! xchi 'ix.

²⁷ —Toto matz ach colx yuj Jehová, ¿tom an to wal 'oj stac' ach in colni? ¿Tom 'oj stac' wa'n trigo yet' yal uva 'ayach?

²⁸ ¿Tas pax tzach 'i'n jun? xchi win rey cha. 'Ix ta'w 'ix, xyaln 'ix 'ixtic: —'Ix yal jun 'ix tic 'ayin: Tzac' one tic qui chi ticnec, ax wic tic tzqui chi pax q'uic'an, xchi 'ix 'ayin.

²⁹ Yuj cha, 'ix in tz'an̈n in chi jun wune chi yet' 'ix, ax 'a junx c'u 'ix waln 'a 'ix to tzyac' 'ix yune chi in chi yet'oc, palta tox sc'ub'j 'el 'ix yune cha, xchi 'ix 'a winac.

³⁰ A yic 'ix yab'n win rey tas 'ix yal 'ix cha, 'ix stzilnjat win spichul. Yic wan tzb'eyc' win 'a yib'n̈ muro, ax xyiln eb' 'anma', to a te pichl n̈achtac sat 'aych yuj 'a yol spichl cha, yuj sch'oxn scusc'ojlal.

³¹ Xlajw cha, 'ix yaln win 'ixtic: ¡Cotcn cab' yowl sc'ojl Dios 'a wib'an̈, toto matz wac' 'ijxoc 'el sjolm Eliseo, yunnal Safat 'a jun c'u tic! xchi win rey cha.

³² Yuj cha, 'ix schecn 'at jun winc 'a 'a. Ax Eliseo chotn 'ec' 'a yatut yet' eb' yichm wincal chon̈ab', Palta yic mantzac c'och win checb' cha, 'ix yaln Eliseo 'ixtc 'a eb' 'ayc' yet' cha. —'Iltec, 'ix schec cot win ma'm cham 'anma jun schecab', yic tzwul yi'nc 'el in jolom. Palta sictac tzex 'aj eyab'n tas 'oj wala', a yic 'oj jawc win checb' cha, tze macn 'el te puerta 'a yojltac winac, wach' tzeyutj e macn can 'el te' sec matz 'ochta', 'oj eyab' nab'n sc'an̈ sjaw win syajlil win 'a spatic, xchi.

³³ Wanto wal spaxtin Eliseo yet' eb' cha, 'ix c'och win rey yet' win schecb' cha, 'ix yaln win rey 'ixtic: —Wal yel a jun tu tic, a 'a Jehová tzcoti. ¿Tas tzat in tan̈wj 'a 'a, yic tzon̈ scolni? xchi winac.