A Ch'an̈ Schab'il Libro Yic Yab'ixal Eb' Rey 5 - Chuj San Sebastian Bible

B'oxnc sc'ojl Naamán yuj lepra

¹ 'Ay jun winc Naamán sb'i, scapitan̈il eb' soldado yic sreyl chon̈b' Siria. Caw wal xajn yuj syajlil, yujto yu'uj 'ix ya'n Jehová yac' ganar win sreyl chon̈b' Siria owal. A jun winc tic, caw jeln ya'n owal, palta 'aych jun yab'il tzcuch lepra 'a 'a.

² 'Ix checx 'at nan̈l eb' soldado sirio 'a slum eb' israel. Ax x'aji, 'ix yamchj jun 'ix cob's 'unn yuj eb', 'ix 'och 'ix ya'malc servil 'ix yistl win Naamán.

³ 'Ix yaln 'ix cob's 'unn chi 'a 'ix spatron̈ chi 'ixtic: —Comnoc tz'at win in patron̈ tic 'a jun win schecb' Dios 'ayc' 'a Samaria, toq'ue tzb'o jun lepra 'aych 'a win tic, xchi 'ix.

⁴ Yuj cha, 'ix 'at Naamán 'at yal 'a syajlil atn sreyl Siria, yuj tas 'ix yal 'ix cob's cha.

⁵ 'Ix yaln win rey chi 'a win 'ixtic: —Caw wach', 'ixc 'an, 'oj wa't junc carta 'a win sreyl chon̈b' Israel cha, xchi win rey cha. —Xlajw cha, 'ix 'at Naamán, 'ix yi'n 'at 30 mil q'uen tumn plata, waque mil q'uen tumn nab'a oro, yet' lajn̈e mojn pichul.

⁶ 'Ix yi'n pax 'at win jun ch'an̈ carta 'a win sreyl chon̈b' Israel cha, to tzyal 'a ch'an̈ 'ixtic: A yic tza chan jun carta tic, 'ojquej 'eli chajtlto an tzin checb't win in capitan̈ Naamán tic 'ayach, to tzan̈tj win in c'ana', yujto ya'ay win yuj lepra, xchi win rey 'a scarta cha.

⁷ Yajn̈j wal cha, 'ix yawtn win sreyl chon̈b' Israel ch'an̈ carta cha, 'ix tzilnjat spichul, 'ix yaln 'ixtic: —¿Tom an Dios in jun? ¿tom an tzwac' schamlil 'anma', yet' pax stzatzil, yuj cha, tzchecn cot win jun winc tic 'ayin, yic tzwi'n 'el lepra 'a 'a? Tzcham eyilni, tecn wan sayn eb' tas tznib'j tzin yutej, xchi win rey cha.

⁸ A yic 'ix yab'n Eliseo win schecb' Dios, chajtlto stziljat sreyl chon̈b' Israel spichul, 'ix 'at ya'nc alxc 'a win rey chi 'ixtic: ¿Tas yuj xa tziljat 'a pichul? Cot cab' jun winc chi 'ayn muc'uc, ax yojcan 'eli chajtlto 'ay schecb' Dios 'a qui chon̈b' Israel tic, xchi.

⁹ 'Ix 'at Naamán yet' scaruaje yet' pax schej, 'ix 'och lin̈n 'a sti spuertail yatut Eliseo.

¹⁰ Xlajw cha, schecn 'at Eliseo schecb' 'a Naamán yic tz'at alxc 'a 'ixtic: 'Ixc 'at b'icl a b'a uc 'ejmoc 'a a Jordán, ax sb'ox can a niwnal cha, xchi.

¹¹ 'Ix cot yowl Naamán 'ix 'ati. Xyaln 'ixtic: —A waln 'a yol wico', to 'oj 'el-loc mu'c wul in scha', axn lin̈n in 'ec' tic ax sleslwi 'a Jehová sDiosal, ax smasn 'ec' sc'ab' 'aj 'aych jun lepra tic 'ayin, ax yelcn walni.

¹² Man̈x jantcoc swach'l eb' a a 'ay 'a Damasco, atn a Abana, yet' Farfar. Yel xo wach' eb' a 'a yib'n̈ a a 'ay 'a yol yic chon̈b' Israel tic: ¿Tom matz tac' 'at in b'icn 'el in b'a 'a yojl eb' a', ax in b'ox cani? xchi Naamán. —Caw 'ay cot yowal 'ix pax yalni.

¹³ Palta ax eb' schecab', 'ix snitzn 'ochch sb'a eb' 'a stz'ey, 'ix yaln eb' 'ixtc 'a 'a: —Mamin, toto 'ay wal junc xo tas caw ya 'ix yal win schecb' Dios tic 'ayach, ¿tom ma'oj a b'o jun? Oc xo jun, cojn 'ix yala to tza b'icl a b'a, ax a b'ox cani, xchi eb' 'a 'a.

¹⁴ Xlajw cha, 'ix 'at Naamán, uc 'ejm 'ix 'ejm 'a yojl a Jordán, 'icha 'ix yutj Eliseo yalni. 'Ix b'ox can sniwnal, 'icha wal sniwnal junc quelm 'unin, caw sac 'ix 'ajcni.

¹⁵ Xlajw xoj cha, 'ix 'at yet' eb' ajun yet' chi 'a win schecb' Dios cha, atn Eliseo, 'ix c'och 'a yojltac winac, 'ix yaln Naamán 'ixtic: —¡A ticnec 'ix wojquej 'eli, chajtlto may junc xo Dios 'a smasnil yolyib'n̈q'uinl tic, palta cojn wal e Diosal ax israel ex tic, yuj cha, tzin tew 'ayach, to tza chaj jun in siylab' tic, xchi.

¹⁶ Palta 'ix ta'w Eliseo 'a 'ixtic: —Tzwac' in ti 'a yojltac jun mach 'aj 'ayn 'ec' tic, atn Jehová, to matz in cha'aj, xchi. —Wach'xam 'ix tew 'och Naamán yic tzchani, palta ma'ix yal xon sc'ojl schani.

¹⁷ Xlajw cha, 'ix yaln 'ixtic: —Toto 'ixta jun, tzin tew 'ayach, comnoc tz'el 'a a c'ojl a'n chawn̈oc chejl lum slum chon̈b' Israel tic 'ayin, yic tzwi'n 'at wet'oc, yic tzin b'on junc yet'l xajmb'al yic Jehová yet' lu'um, man̈x 'oj wac' in xajmb'al 'a jun tzo'n̈ comn dios, palta cojn 'a Jehová 'oj wac'a'.

¹⁸ A cab' Jehová tzin yac' niwnc'ojlal 'a jun tic; yujto a yic 'oj 'at win in reyl 'at yac' 'emmquilal 'a yol yatut sdiosal tzcuch Rimón, 'oj 'och yamn win 'a in c'ab', an̈jtona 'in, 'oj wem n̈ojn 'a yol yatut sdiosal chi yet'oc, ya' cab' Jehová niwnc'ojlal 'ayn yuj jun tic, xchi Naamán.

¹⁹ 'Ix yaln Eliseo 'a 'ixtic: —May cab' tas tza na'a, xchi 'a 'a. 'Ix 'at Naamán. Jab' nant wal 'ix b'ey'ti,

A Giezi yet' syab'il win Naamán

²⁰ ax win Giezi win schecb' Eliseo, 'ix snan 'ixtic: A win wajlil tic schaj 'at win Naamán 'aj Siria, toxn may jac schaj can win 'a jun tzo'n̈ yet' cha. Wal 'a sb'i Jehová tzin 'at 'a spatquil, yaln̈j tas 'oj wi'cn 'ec' 'a 'a, xchi.

²¹ 'Ix 'at Giezi 'a spatquil Naamán. A yic 'ix yiln 'at Naamán cha, to carela sc'och 'a spatquil, 'ix 'emt 'a yol scaruaje yic tzwul schanoc, 'ix yaln 'a 'a: —¿Tas junoc, mto 'ay tas xyac' palta? xchi 'a winac.

²² 'Ix ta'w Giezi 'ixtic: —Ma'ay, wach'n̈j yaji. A win wajlil tzin checn wul wal 'ayach: At wal sjaw chawn̈ eb' quelmtac winc schecb' Dios tic 'ayin, ata 'ix cot eb' 'a eb' lum jolmctac witz 'a yol yic Efraín, tzin tew 'ayach to tzac' 'oxe'oc mil q'uen tumn plata 'ayin, yet' chab'oc mojn 'a't pichul, xchi winac, xchi 'a 'a.

²³ 'Ix yaln Naamán 'ixtic: Tzin tew 'ayach, to tza chaj waque'oc mil q'uen tumn plata tic, xchi winac. Ya' sb'a wanto stew 'a 'a, 'ix ya'n 'ejm q'uen yet' chab' mojn 'a't pichl 'a yojl chab' coxtal, 'ix ya'n 'a chawn̈ eb' schecab', ax eb' 'ix 'i'n 'ati, 'ix 'at ya'nc eb' 'a yet'l Giezi.

²⁴ A yic 'ix c'och eb' 'a lum tzaln 'aj 'ayc' Eliseo cha, 'ix schan Giezi tastc chi yet' eb' schecb' Naamán, 'ix sc'ub'n can 'el 'a yol n̈a. Xlajw cha, schecn meltzjoc eb'.

²⁵ Yajn̈j wal cha, 'ix c'och 'a yojltac syajlil cha, 'ix sc'anb'n Eliseo 'a 'ixtic: —¿'Ajtil ach xit' Giezi? xchi. —An a checb' in tic, may 'aj in xit'q'ui, xchi Giezi cha.

²⁶ Palta 'ix 'och tecn Eliseo 'a 'a, 'ix yaln 'ixtic: —A yic 'ix 'emt jun winc chi 'a yol scaruaje, 'ix wul ach schanoc, ¿'icha to 'ayn 'ec' et' ta'? Man̈ smojc 'ixta tzcutj qui chan tumin, pichul, olivo, uva, calnelu, mam wacax, ewin checab', yet' eb' 'ix checab'.

²⁷ Yuj jun xa b'o tic, a slepra Naamán cha, a 'oj 'ochcn 'ayach, yet' 'a eb' en̈tl 'a smasnil tiempo, xchi Eliseo. Ax yic 'ix spojn can sb'a Giezi yet' Eliseo, 'ayx 'och lepra 'a 'a, caw sacwecnac yilx 'icha q'uen che'ew.