A Ch'an̈ Schab'il Libro Yic Yab'ixal Eb' Rey 3 - Chuj San Sebastian Bible

'Ochnc win Joram reyl 'a Israel

¹ A yic swajxclajn̈il ab'il xo yoch Josafat reyl 'a Judá, 'ix chan 'el Joram yunnal Acab ya'n reyl 'a chon̈b' Israel, lajchwe ab'il 'ix yac' reyl 'a Samaria.

² Caw maysch'olnil 'ix 'el sb'on 'a yojltac Jehová, palta matz q'ue'ch wal smul 'icha yic smam snun, yujto a x'i'n 'el jun q'uen q'uen yic Baal, jun sb'ojnac can smam.

³ Wach'xam 'ixta', palta 'ix sb'eylb'ejn̈ej smaysch'olnilal win Jeroboam yunnal Nabat, atn jun xjucb'tzan eb' yit israelal 'a maysch'olnil, yic 'ix y'an yajlil.

'Ix yalcn 'el Eliseo yuj Moab

⁴ A win Mesá sreyl Moab, cajm calnelu win yet' smasnil eb' 'anma cajn 'a jun chon̈b' cha. Yowlal tzyac' win stojlb'al 'a win sreyl chon̈b' Israel, 100 mil no quelm calnelu, yet' slanail 100 mil no mam calnelu tzyac' a' junjn ab'il.

⁵ Palta ax yic 'ix cham win Acab sreyl Israel, 'ix yi'n 'el sb'a sreyl Moab 'a yaln̈ schecnb'il winac.

⁶ Xlajw cha, 'ix 'elt Joram 'a Samaria, 'ix ya'n syam sb'a smasnil eb' soldado yic chon̈b' Israel.

⁷ Yajn̈ej x'at ya'nc alxc 'ixtc 'a Josafat sreyl Judá: 'Ix yij 'el sb'a sreyl Moab 'a yaln̈ in checnb'il. ¿Tzam yal a c'ojl tzach 'at wet'oc, yic tzca'n owl yet'oc? xchi. 'Ix ta'w sreyl Judá 'a 'ixtic: 'Oj in 'at yet' eb' in soldado yet' e no 'in chej.

⁸ Palta b'i'an, ¿tas b'el 'aj tzon̈ 'ati? xchi. 'Ix ta'w Joram, 'ix yaln 'ixtic: Ata tzon̈ 'at 'a sb'el cusltac lu'um, 'a yol yic Edom, xchi.

⁹ Xlajw cha, 'ix 'at sreyl chon̈b' Israel, yet' sreyl chon̈b' Judá, yet' pax sreyl chon̈b' Edom, uque c'u 'ix b'ey eb', yujto 'ix yoymtej eb' lum cusltac lu'um. 'Ix lajw 'ejm yal eb' soldado tzyuq'uej, yet' yic no schej eb' ajun yet'oc.

¹⁰ Xlajw cha, 'ix yaln win sreyl chon̈b' Israel 'ixtic: —A ticnec, 'icha to on̈ smolb'tzejc Jehová an̈ 'oxwn̈ rey on̈c tic, yic tzon̈ ya'nec 'och 'a yol sc'ab' eb' moabita, xchi.

¹¹ 'Ix yaln Josafat 'ixtic: —¿May am junc schecb' Jehová 'ayc' 'a tic, yic tzc'anb'n 'a Jehová cujec? xchi. 'Ix ta'w jun 'a eb' soldado sreyl chon̈b' Israel, 'ix yaln 'ixtic: —'Ayc' Eliseo 'a tic, win yunnal Safat, atn win 'ochnc schecb'oc Elías 'a yic yaln̈taxi, xchi.

¹² 'Ix yaln Josafat 'ixtic: A win cha a spaxti Jehová tzyal winac, xchi. 'Ix 'at sreyl chon̈b' Israel yet' Josafat, yet' pax sreyl chon̈b' Edom yic tz'at yilnc eb' Eliseo.

¹³ Xlajw cha, 'ix yaln Eliseo 'ixtc 'a win sreyl Israel: —¿Tas waln wic et'oc? Ata cab' tzach 'at a c'anb'c 'a eb' schecb' scomn diosal a mam a nun sayjnac, xchi Eliseo cha. —Ma'ay, yujto a Jehová on̈ yamb'tzan an̈ 'oxwn̈ reyn̈ tic on̈, yic tzon̈ ya'n 'och 'a yol sc'ab' eb' moabita, xchi 'a 'a.

¹⁴ 'Ix yaln Eliseo 'a 'ixtic: —Tzwac' in ti 'a yojltac Jehová jun tztac' yuj smasnil, jun 'aj 'ayn 'ec' 'a yojltac tic, toto may yel'ch Josafat 'a in sat, atn sreyl Judá tic, matz in chaj wab' tas tzala, matz in 'och xon q'ueln jac 'ayach.

¹⁵ A ticnec, 'ijec cot junc mach tztac' syucn te arpa 'ayin, xchi Eliseo. 'Ix yi'n cot eb' jun win tzyucn te arpa cha. Ya' sb'a wan syucn win te', 'ix 'eml poder Jehová 'a yib'n̈ Eliseo.

¹⁶ 'Ix yaln 'ixtic: —'Ixtc 'ix yutj Jehová yalni: B'oc nan̈loc c'ob'a 'a jun tzon̈ sb'e a tic;

¹⁷ wach'xam may 'ic', may pax n̈ab' 'oj eyil sjawi, palta 'oj b'ut'joc 'el jun tzon̈ sb'e a yuj a a', ax e yu'n a e masnil, yet' no e wacax, yet' pax no e chej.

¹⁸ Man̈ocn̈ej jun ch'oxnb'il tic 'oj in ch'oxo', toxn to 'oj wa'ch eb' moabita 'a yol e c'ab'.

¹⁹ Ax e ma'n 'ejm lan̈chjoc schon̈b' eb' to wach' yajch smuroal, yet' jun tzo'n̈ niwc chon̈b' to wach' yilxi, tze tzu'n 'ejm yawb'ente eb' to tzyac' sat, tze t'ocn lan̈chjoc smasnil 'aj tzpac' yal eb', yet' slum eb' 'aj tzmunlji, tze juln can 'at q'uen 'a sat slum eb' cha, xchi Dios, xchi Eliseo.

²⁰ Ax x'aji, a 'a junx sq'uin̈b'ial, 'a yorail yajx xajmb'al, ata 'ix pitzw cot a a 'a yol yic Edom, c'uxn 'ix b'ut'j 'el sat lum lum chi yuj a'.

²¹ A yic 'ix yab'n smasnil eb' moabita, chajtlto wan sc'och eb' rey yac' owl yet' eb', 'ix ya'n eb' 'awtxoc cot smasnil eb' quelem, yet' eb' 'ichmtac winac, eb' to smoj s'at soldadoil, 'ix 'och eb' smac 'a sti mon̈jon.

²² A yic 'ix q'ue wan eb' 'a sq'uin̈b'ial, caw wal tzictzni yilx yib'n̈ a a chi yuj yoc c'u, 'ix yiln 'at eb' moabita chi 'a najat, to caw chac yilx a 'icha chic'.

²³ Yuj cha, 'ix yaln eb' 'ixtic: A jun cha, coyn to chic'. Toplaj a eb' rey smil cham sb'a yet' eb' soldado. Coyec, 'at qui'c can smasnil tas xcan yuj eb', xchi eb'.

²⁴ Palta a yic 'ix c'och eb' 'a scamplamento eb' israel, ax eb' israel cha, 'ix 'elt eb' yac' owl yet' eb', 'ix 'at eb' moabita chi 'eloc. Palta 'ix 'at eb' israel 'a spatquil eb', 'ix milx cham eb' yuj eb'.

²⁵ Xlajw cha, 'ix sma'n 'ejm lan̈chjoc eb' schon̈b' eb', 'ix b'ut'j 'el sat slum eb' yuj q'uen q'uen 'aj tzb'o smunljel, 'ix st'ocn lan̈chjoc eb' israel smasnil a spac'b'a', 'ix stzu'n pax 'ejm eb' smasnil te 'awb'ente tzsatni. Cojxn̈ej chon̈b' Kir-hareset 'ix cani. Palta ax eb' tzjulwj yet' mejech', 'ix 'och oyn eb' 'a spatquil jun chon̈b' cha, 'ix sjuln 'at eb' q'uen 'a yib'an̈, yic tzlan̈chj 'ejm snan eb'.

²⁶ A yic 'ix yiln sreyl chon̈b' Moab, chajtlto 'ix 'ajx ganar eb' yuj owal, 'ix yi'n cot uque ciente eb' soldado to jeln ya'n owl yet' espada, 'ix sjacn eb' jun b'e 'aj 'ayc' sreyl chon̈b' Edom snani, palta ma'ix stac' yuj eb'.

²⁷ Xlajw cha, 'ix yi'n cot win rey chi jun sb'ab'l 'unnal, atn jun jab'xoj yochcn reyl sjeloc, 'ix ya'n xajmb'al-l 'a yib'n̈ smuroal chon̈b' cha. 'Ixta 'ix 'aj scot yowl eb' israel, 'ix yi'n chan̈ eb' scamplamento, 'ix meltzj eb' 'a chon̈ab'.