A Ch'an̈ Schab'il Libro Yic Yab'ixal Eb' Rey 24 - Chuj San Sebastian Bible

¹ A 'a yol stiempoal Joacim 'ix cot Nabucodonosor sreyl Babilonia yet' eb' soldado, yic tzya'n eb' owl yet'oc. 'Ix 'och 'a yol nacion̈ cha, ax Joacim 'oxe ab'il 'ix syiclj tas xyal win Nabucodonosor cha. Palta yajn̈ej sjeln snab'en, 'ix meltzj 'och 'ajc'ojlal 'a 'a.

² Palta 'ix chec cot Jehová eb' soldado 'aj Babilonia atn eb' caldeo, eb' sirio, eb' moabita, yet' eb' amonita yic tzwul yelc'noc eb' tas 'ay 'a chon̈b' Judá, sec wach' tzjuw 'el yuj eb', 'icha yaj yaln can eb' schecb' Dios.

³ Wal yel 'ix jaw jun tic 'a yib'n̈ Judá, yujto a Jehová 'ix alni, sec tz'elch can eb' israel 'a yojltac yuj smasnil smaysch'olnil 'ix 'el sb'on win Manasés,

⁴ yet' yuj eb' 'anma may smul 'ix yac' milxoc 'a Jerusalén. Yuj cha, man̈xtoc 'ix yac' Jehová niwnc'ojlal.

⁵ Ax jantc to yab'xil Joacim yet' smasnil tas 'ix 'el sb'oni, ata tz'ib'b'il can 'a ch'an̈ libro 'aj tz'ib'b'il can yab'xil eb' sreyl Judá.

⁶ A yic 'ix cham Joacim, ata 'ix mucx 'a 'aj mucn eb' smam yicham, ax jun yunnal tzcuch Joaquín, a 'ix 'ochcn reyl sjeloc.

⁷ Man̈xtoc 'ix 'elt sreyl Egipto yet' eb' soldado 'a yol snacion̈, yujto a sreyl Babilonia 'ix 'i'n can 'ec' smasnil tas 'ic'b'il 'ec' yu'uj, tzchaj cot 'a sch'olnal yic Egipto masnto 'a a niwn a Éufrates.

'Ijxnac 'at Joaquín 'icha presoal

⁸ Wajxclajn̈e ab'il sq'uinl Joaquín yic 'ix schan 'el yich ya'n reyal. 'Oxen̈ej 'uj 'ix yac' reyl 'a Jerusalén. A snun Nehusta sb'i, yisl win Elnatán 'aj Jerusalén.

⁹ Caw maysch'olnil x'el sb'on 'a sat Jehová, lajn 'icha sb'ojnac smam cha.

¹⁰ A 'a yic jun tiempoal cha, 'ix cot eb' soldado win Nabucodonosor sreyl Babilonia yac' owl 'a Jerusalén, 'ix 'och oyn eb' 'a jun chon̈b' cha.

¹¹ Wanto ya'n eb' owal, 'ix jaw rey Nabucodonosor.

¹² Yajn̈ej 'ix ya'n 'och sb'a Joaquín sreyl Judá yet' snun, yet' eb' yit yajlil, yet' eb' schecb' 'a yol sc'ab' win rey cha. 'Ix ya'n win rey chi yamchjoc eb'. 'Ix uj jun tic 'a yic swajxquil xo ab'il yoch win Nabucodonosor reyl 'a Babilonia.

¹³ Xlajw cha, xya'n win 'ijxoc 'elt smasnil q'uen tumn 'ay 'a yatut Jehová yet' 'a sdespacho win rey Joaquín cha. Caw choc' 'ix yutj sma'n poj jun tzo'n̈ yamc'ab' to nab'a oro b'ob'il can yuj Salomón sreyl chon̈b' Israel, jun tzo'n̈ 'ayc' 'a yatut Jehová. 'Ix 'el'ch jun tic 'icha yaj yaln can Jehová.

¹⁴ 'Ix ya'n win 'ijxoc 'at smasnil eb' cajn 'a Jerusalén, eb' 'aych yajlil, eb' soldado to caw wal jelan, eb' josmte' yet' eb' tenm q'ue'en. Lajn̈e mil eb' x'ijx 'at 'icha presoal yu'uj. Cojxn̈ej eb' meb'a xcan 'a jun nacion̈ cha.

¹⁵ 'Ix ya'n pax win 'ijxoc 'at win rey Joaquín yet' snun, yet' eb' yistzil, yet' eb' 'aych 'a yopiso yet'oc, yet' pax eb' niwn yel'ch 'a jun nacion̈ cha. 'Ix 'ijx 'at eb' 'a Babilonia cha.

¹⁶ Uque mil eb' soldado jeln ya'n owal, jun mil eb' tenm q'ue'en, yet' eb' josmte', 'ix 'ijx 'at eb' 'icha presoal.

¹⁷ Ax win sreyl Babilonia cha, a 'ix 'a'n 'och Matanías yu'tac smam Joaquín chi reyl 'a Judá, 'ix sjeln win sb'i winac, 'ix ya'n sb'ic Sedequías.

Ya'jnac Sedequías reyal

¹⁸ Junschawinc ab'il sq'uinl Sedequías yic 'ix schan 'el yich ya'n reyal; uxlche ab'il 'ix yac' reyl 'a Jerusalén: Ax snun Hamutal sb'i, yisl Jeremías 'aj Libna.

¹⁹ Caw maysch'olnil x'el sb'on 'a sat Jehová, 'icha wal sb'ojnac Joacim.

²⁰ Yuj cha, 'ix cot yowl sc'ojl Jehová 'a Jerusalén yet' 'a Judá, masnto 'ix yij 'el eb' 'a yojltac. 'Ix meltzj 'och Sedequías 'ajc'ojlal 'a sreyl Babilonia.