A Ch'an̈ Schab'il Libro Yic Yab'ixal Eb' Rey 22 - Chuj San Sebastian Bible

'Ochnc Josías sreyloc Judá

¹ A yic schan 'el Josías yich ya'n reyal, wajxque ab'il sq'uinal. 31 ab'il 'ix yac' reyl 'a Jerusalén. A snun Jedida sb'i, yisl win Adaía 'aj chon̈b' Boscat.

² Caw tojl tas 'ix 'el sb'on Josías 'a sat Jehová, 'ix sb'eylb'ej 'icha sb'eyb'al David, atn smam yicham. May xon 'aj 'ix yij 'el sb'a jac 'a sb'eyb'al David cha.

'Ilchjnac ch'an̈ libro yic ley

³ A yic swajxclan̈il xo ab'il yoch Josías reyal, 'ix schecn 'at Safán, yunnal Azalía, yixchicn Mesulam, 'aj tz'ib' yaj 'a yatut Jehová, 'ix yaln 'ixtc 'a 'a:

⁴ —'Ixc 'a Hilcías win sat ya'mal 'och qui ti 'a Dios, tzaln 'a 'a, to tzyac' syam sb'a q'uen tumn tzwul 'ajxoc 'a yatut Jehová, q'uen tzchaj eb' tztan̈w puerta 'aj tz'och eb' 'anma'.

⁵ Ya' cab' q'uen 'a yol sc'ab' eb' 'aych 'a yib'n̈ yiln snipx yatut Jehová, yic tztojx eb' tzmunlj cha:

⁶ atn eb' josmte', eb' albanil, yet' eb' tzch'oxn tas tz'aj sb'o jun munljel cha. Tzmanx pax te te', yet' q'uen q'uen tzeyb'il yuj snipx jun n̈a cha.

⁷ An̈jtona', tzaln pax 'a 'a, matz a c'an yun̈al q'uen tumn chi 'a eb', yujto caw wal wach' snab'en eb', xchi rey Josías.

⁸ Xlajw cha, 'ix yaln Hilcías sat ya'mal 'och sti eb' 'anma 'a Dios 'a win 'ajtz'ib' Safán, chajtlto 'ix chax ch'an̈ slibroal ley 'a yol yatut Jehová. 'Ix yac' Hilcías ch'an̈ 'a win Safán yic tzyawtni.

⁹ Yajn̈j cha, 'ix 'at Safán 'at yal jun tic 'a win rey, 'ix yaln 'ixtic: —Tox 'ix syam sb'a q'uen tumn yuj eb' a checab', 'ix yac' eb' q'uen 'a eb' 'aych 'a yib'n̈ yiln snipx yatut Jehová cha, xchi 'a 'a.

¹⁰ An̈jtona', 'ix yaln pax win 'ajtz'ib' Safán chi 'a win rey chajtlto a win Hilcías 'ix yac' win jun ch'an̈ libro 'a 'a. 'Ix yawtn win yab' win rey cha.

¹¹ A yic 'ix yab'n win rey tas tzyal ch'an̈ slibroal ley cha, 'ix stzilnjat win spichul.

¹² Yajn̈j cha, 'ix ya'n win rey 'awtxoc cot win Hilcías, win Safán 'ajtz'ib', yet' jun yunnal win tzcuch Ahicam, yet' win Acbor yunnal Micaías, yet' win Asaías, schecb' win rey. 'Ix yaln win rey chi 'a eb' 'ixtic:

¹³ —'Ixquec, 'at c'anb'jec 'a Jehová wu'uj, yuj eb' chon̈ab', yet' pax yuj smasnil eb' 'aj Judá, tas yel'ch tas tzyal ch'an̈ libro 'ix chax cha. Caw am 'ay cot yowl sc'ojl Jehová 'a quib'n̈ec, yujto ma'ix schaj eb' qui mam quichmec yab' tas tzyal ch'an̈, xchi winac.

¹⁴ Xlajw cha, 'ix 'at Hilcías chi yet' eb' tic, atn Ahicam, Acbor, Safán, yet' Asaías yic tz'at sc'umnoc eb' 'ix schecb' Dios, atn 'ix Huldá yistzil Salum, win yunnal Ticva, yixchicn Harhas. A Salum cha, a scuenta smoln pichl 'a yatut Jehová. Ax 'ix Hulda cha, ata cajn 'ix 'a jun macn xo q'ue'ch chon̈b' tot b'onc 'a Jerusalén cha. A yic 'ix paxtin eb' 'a 'ix,

¹⁵ 'ix ta'w 'ix 'a eb' 'ixtic: —'Ixtc 'ix yutj Jehová yalni, atn qui Diosalec an̈ israel on̈ec tic: Alc 'a jun winc chi ex checn cot wul e c'anb'c 'ayin,

¹⁶ to a Jehová a tzaln 'ixtic: An 'oj wa' cot yailal 'a yib'n̈ eb' 'anma cajn 'a jun chon̈b' tic, atn tas tzyal ch'an̈ libro 'ix yawtj jun sreyl Judá cha.

¹⁷ Yujn̈ej to in yactj can eb' in chon̈b' tic, 'ix sn̈usntz'a eb' incienso 'a jun tzo'n̈ comn dios, 'ix tzuntzj cot eb' yowl in c'ojol, yuj jun tzo'n̈ sdiosal eb' sb'ojnac; yuj wal cha, 'ix cot yowl in c'ojl 'a jun lugar tic, matz tup yowl in c'ojl cha.

¹⁸ Palta tzwal 'aych Josías yujto 'ix ab' tas tzyal ch'an̈ libro cha,

¹⁹ 'ix a'n 'och 'a a c'ojol, xe'n 'ejm a b'a 'a wojltac an Jehová in, 'ix 'a tzilnjat a pichul, ach 'oc' 'a wojltac, 'ix ab' tas xwala, to 'oj satl jun lugar tic, ax scatb'tzax eb' 'anma cajn 'a 'a. An̈jtona 'in, 'ix wab' tas 'ix ala, an Jehová in, an tzwal 'ayach.

²⁰ Yuj cha, 'oj a mucx 'a junc'ojlal 'a 'aj mucn eb' a mam echam, man̈x 'oj el smasnil yailal 'oj wa' cot 'a yib'n̈ jun lugar tic, xchi Dios, xchi 'ix Hulda cha. 'Ix meltzj eb' schecb' win rey cha, yic tzwul yalnoc eb' 'a winac tas chi xit' yab' eb'.