A Ch'an̈ Schab'il Libro Yic Yab'ixal Eb' Rey 21 - Chuj San Sebastian Bible

'Ochnc Manasés reyl 'a Judá

¹ Slajchwil ab'il sq'uinl Manasés yic schan 'el yich ya'n reyal; 55 ab'il 'ix yac' reyl 'a Jerusalén. A snun Hépsiba sb'i.

² Palta caw maysch'olnil x'el sb'on 'a sat Jehová, yujto 'ix sb'eylb'ej smasnil stu b'eyb'alil jun tzo'n̈ nacion̈ yijnac 'el Jehová 'a yojltac eb' israel.

³ Yujto sb'o chan̈ jun tzo'n̈ macsej 'a jolmctac witz jun 'ejm xo, atn jun tzo'n̈ satb'il 'el yuj Ezequías, atn smam, jun tzo'n̈ yic Baal, yet' jun sch'oxnb'il comn dios tzcuch Asera, 'icha sb'ojnac Acab sreyl chon̈b' Israel. 'Ix ya'n̈j pax 'ejm sb'a Manasés chi 'a jun tzo'n̈ c'anal 'a satcha'an̈.

⁴ An̈jtona', sb'on pax chan̈ jun tzo'n̈ xo yet'l xajmb'al yic eb' comn dios 'a yol yatut Jehová. Palta yuj jun lugar tic yaln can Jehová 'ixtic: A jun tic in cajnub' tz'aj 'a Jerusalén yic tzex 'och 'emmquilal 'ayin, xchi.

⁵ 'Ay wal jun tzo'n̈ xo yet'l xajmb'al 'ix yac' b'o Manasés cha 'a chab' yamq'uil yatut Jehová cha, yic tz'och win 'emmquilal 'a jun tzo'n̈ c'anal.

⁶ Xya'n win tz'a yunnal xajmb'alil, scuyn sb'a win 'a jun tzo'n̈ xo b'eyb'al tic; atn wayjlil, 'ajchumal, tzc'umn win spixn eb' chamnac. Yel xo caw tu 'ix 'el sb'on 'a sat Jehová, caw 'ix tzuntzj cot yowl sc'ojl Dios chi 'a yib'an̈.

⁷ An̈jtona', xya'n 'och jun yechl Asera chi 'a yol yatut Jehová. Atn yuj jun tic yalnc can Jehová 'ixtc 'a David yet' 'a yunnal, atn Salomón: A Jerusalén tic, xin si'cn 'el 'a scal smasnil schon̈b' eb' yin̈tl Israel sec ata tzb'o watut 'aj tzex 'och 'emmquilal 'ayn 'a smasnil tiempo.

⁸ Toto 'oj eyiclc e b'on smasnil tas 'ix wac' e b'o', atn smasnil in checnb'il 'ix wac' yal in checb' Moisés 'ayex, ma'oj ex wi'l 'a sat lum lum 'ix wac' 'a eb' e mam eyicham, xchi Dios.

⁹ Palta ma'ix schaj xon eb' yab'i'. A wal Manasés 'ix jucb'tzan eb' sb'on maysch'olnil, yel xo 'ec'b'al stul 'a yib'n̈ sb'eyb'al jun tzo'n̈ xo nacion̈ satjnac 'el Jehová.

¹⁰ Yuj cha, yaln Jehová 'a eb' schecab'

¹¹ to a Manasés sreyl Judá, caw yel xo 'ec'b'al maysch'olnil x'el sb'on 'a yib'n̈ eb' amorreo, atn eb' 'e'nc 'a yaln̈taxi, ax xjucb'tzan eb' yit chon̈b' chi 'a maysch'olnil, yic tzya'n 'ejm sb'a eb' 'a jun tzo'n̈ yechel.

¹² Yuj cha, yaln Jehová sDiosal Israel 'ixtic: An wal 'oj wi' cot yailal 'a yib'n̈ Jerusalén, yet' 'a yib'n̈ Judá tic, caw 'oj tac sc'ojl eb' 'oj 'ab'noc yab'xil.

¹³ 'Oj wa'ch yailal 'a yib'n̈ Jerusalén tic, 'icha 'ix wutj chon̈b' Samaria yet' eb' yin̈tl Acab. 'Oj wi'l eb' 'anma 'ay 'a 'a, lajn 'oj 'ajcn 'icha junc plato, a yic tzlajw sb'icxi tzn̈ojltax cani.

¹⁴ Ax jaywn̈ xo eb' in chon̈b' tic, 'oj wactc can eb', ax wa'n can 'och eb' 'a yol sc'ab' eb' 'ajc'ojl yajch 'a 'a, sec wach' 'oj 'ijxoc can 'ec' smasnil tas 'ay 'a eb'.

¹⁵ Yictax xwi'n 'elt eb' smam yichm eb' 'a Egipto, stzuntzj cotn̈ej eb' yowl in c'ojol, yuj tas maysch'olnil sb'o eb' 'a wojltac, xchi Dios.

¹⁶ Caw 'ix 'och smul smasnil eb' 'aj Judá yuj jantcn̈ej maysch'olnil sb'o Manasés 'a sat Jehová; til wal 'anma may smul 'ix ya' milxoc, 'ix b'ey schic'l eb' 'anma chi 'a smasnil yol yic Jerusalén.

¹⁷ Ax jantc to yab'xil Manasés, yet' jantcn̈ej smul 'ix 'ochi, ata tz'ib'b'il can 'a ch'an̈ libro 'aj tz'ib'b'il can yab'xil eb' sreyl Judá.

¹⁸ A yic 'ix chami, ata 'ix mucx 'a scal jun tzo'n̈ te 'awb'ente 'a sti sdespacho, atn 'a scal 'awb'ente yic Uza. Xlajw cha, ax jun yunnal tzcuch Amón, a 'ix 'ochcn reyl sjeloc.

'Ochnc Amón sreyloc Judá

¹⁹ A Amón cha, 22 ab'il sq'uinal yic schan 'el yich ya'n reyal; chab' ab'il xyac' reyl 'a Jerusalén. A snun Mesulemet sb'i, yisl Haruz 'aj Jotba.

²⁰ Palta caw maysch'olnil x'el sb'on 'a sat Jehová, 'icha yic Manasés, atn smam.

²¹ A sb'eyb'al smam chi sb'eylb'ej, 'ix ya'n 'och sb'a 'emmquilal 'a jun tzo'n̈ yechl 'aj tz'och smam chi 'emmquilal.

²² 'Ix yactj can win Jehová, atn sDiosal eb' smam yicham, ma'ix sb'eylb'ej win schecnb'il Jehová.

²³ Ax eb' 'aych yajlil yet' Amón cha, 'ix meltzj 'och eb' 'ajc'ojlal 'a 'a, 'ix smiln cham eb' 'a yol sdespacho.

²⁴ Palta ax eb' 'anma 'ay 'a yol chon̈b' cha, a eb' xmiln cham smasnil eb' xmiln rey Amón, ax jun yunnal tzcuch Josías, a 'ix ya'ch eb' reyl sjeloc.

²⁵ Ax jantcto yab'xil Amón yet' jantcn̈ej tas 'ix 'el sb'oni, ata tz'ib'b'il can 'a ch'an̈ libro 'aj tz'ib'b'il can yab'xil eb' sreyl Judá.

²⁶ Ata 'ix mucx 'a scal 'awb'ente yic Uza. Ax Josías cha, a 'ix 'ochcn reyl sjeloc.