A Ch'an̈ Schab'il Libro Yic Yab'ixal Eb' Rey 2 - Chuj San Sebastian Bible

'Atnc Elías 'a satcha'an̈

¹ A yic jab'xoj sc'och sc'ul yijx 'at Elías yuj Jehová 'a satchan̈ 'a scal jun chacxuxm'ic', a yic cha, 'ix cot win yet' Eliseo 'a Gilgal.

² 'Ix yaln 'ixtc 'a Eliseo: —Cann̈ 'a tic, yujto tzin checx 'at yuj Jehová 'a Bet-el, xchi Elías. —Tzwac' in ti 'a yojltac Jehová to tzin 'at et'oc, xchi Eliseo cha. Xlajw cha, 'ix 'at eb' schawn̈il 'a Bet-el cha.

³ 'Ix 'elt eb' schecb' Dios 'ay 'a Bet-el cha, yic tzwul schaxoc eb', 'ix yaln eb' 'a Eliseo 'ixtic: —¿Ojc ama to 'oj yi'l Jehová win a cuymal tic 'a a tz'ey ticnec? xchi eb' 'a 'a. —N', wojc xo, man̈ eyal 'ayin, xchi.

⁴ Xlajw cha, 'ix yaln pax Elías 'ixtc 'a Eliseo cha: —Cann̈ 'a tic, yujto tzin checx 'at yuj Jehová 'a Jericó, xchi Elías. —Tzwac' in ti 'a yojltac Jehová to tzin 'at et'oc, xchi Eliseo. Xlajw cha, 'ix 'at eb' schawn̈il 'a Jericó.

⁵ 'Ix 'elt eb' schecb' Dios 'ay 'a Jericó cha, yic tzwul schaxoc eb', 'ix yaln eb' 'a Eliseo 'ixtic: —¿Ojc ama to 'oj yi'l Jehová win a cuymal tic 'a a tz'ey ticnec? xchi eb'. —N', wojc xo, man̈ eyal 'ayin, xchi.

⁶ Xlajw cha, 'ix yaln pax Elías 'a Eliseo 'ixtic: —Tzin tew wal 'ayach, cann̈ 'a tic, yujto tzin checx 'at yuj Jehová 'a a Jordán, xchi Elías. —Tzwac' in ti 'a yojltac Jehová to tzin 'at et'oc, xchi Eliseo cha. Xlajw cha, 'ix 'at eb' schawn̈il.

⁷ Palta 'ay 50 eb' schecb' Dios 'ix jaw 'a yojltac 'at eb', najt 'ix cancn lin̈n eb' yilni. Ax eb' schawn̈il, 'ix c'och lin̈n eb' 'a sti a Jordán cha.

⁸ Xlajw cha, 'ix spacn Elías te spotil, sma'n 'ejm 'a yib'n̈ a', yuj cha, chab' x'el a'. 'Ixta to b'i'an 'ix 'ec' eb' schawn̈il 'aj xtacj can lu'um.

⁹ Ax yic tox 'ix c'axw 'ec' eb', 'ix yaln Elías 'a Eliseo 'ixtic: —Al 'ayin tas tza nib'j tzwac' 'ayach, ya' sb'a mantzac in 'ijx 'el 'a a tz'ey, xchi Elías. —Tzin tew 'ayach, comnoc cha'ejm tzotj a'n can espíritu yic opiso 'ayin, 'icha to a b'ab'l 'unnal tzin 'ajcn a jeloc, xchi Eliseo cha.

¹⁰ 'Ix yaln Elías 'a 'ixtic: Caw 'ajltac jun tza c'an tic 'ayin, toto 'oj el tas 'oj waj wijx 'el 'a a tz'ey, toto 'ixta', 'oj 'ajxoc 'ayach. Palta toto ma'oj ela', toto 'ixta', ma'oj 'ajxoc 'ayach, xchi Elías cha.

¹¹ Ya' sb'a wan sb'ey eb', wan pax spaxtin eb', yajn̈j wal cha, 'ix checlj q'ue wan jun caruaje c'ac' yilxi, toc'b'il yuj chawn̈ chej c'ac' pax yilxi. A x'i'n 'el Elías chi 'a stz'ey Eliseo, 'ix 'ijx 'at win 'a satchan̈ 'a scal jun chacxuxm 'ic'.

¹² A yic 'ix yiln Eliseo jun cha, 'ix 'el yaw, 'ix yaln 'ixtic: Mamin, mamin 'icha wal soldado caw 'ay yip, 'ixta aj 'a qui cal an̈ israel on̈ tic, xchi 'a 'a. Ye'xn̈ej xyilcn Eliseo win Elías cha. Xlajw cha, 'ix yi'n 'el Eliseo spotil 'ix stzilnjat yuj scusc'ojlal.

Xcan Eliseo sjelc Elías

¹³ Yajn̈j cha, 'ix 'at si'nc chan̈ Eliseo te spotl Elías 'ix 'elcn cha, 'ix meltzj can pax 'a a Jordán, 'ix 'och lin̈n 'a sti a'.

¹⁴ 'Ix sma'n 'ejm jun spotl Elías chi 'a yib'n̈ a', 'ix yaln 'ixtic: ¿'Ajtil 'ay spoder Jehová sDiosal Elías? xchi. Wanto wal yejm te pichl chi 'a yib'n̈ a', ax x'aji, 'ix poj sb'a snan̈l a', 'ixta to b'i'an 'ix 'ec' Eliseo 'a yojl a'.

¹⁵ A yic 'ix yiln eb' schecb' Dios 'ayc' 'a Jericó cha, atn eb' najt xcan lin̈n yil eb', 'ix yaln eb' 'ixtic: A jun espíritu yic yopiso Elías a x'ochx can 'a Eliseo tic, xchi eb'. Xlajw cha, 'ix cot eb' wul scha', 'ix 'em n̈ojn eb' 'a yojltac.

¹⁶ 'Ix yaln eb' 'ixtic: —'Ilto, 'ay 50 eb' winc caw wal 'ay yip 'a qui cal an̈ a checb' on̈ tic. 'At cab' eb' 'at say win qui cuymal cha, toq'ue 'aj 'ix julx can 'at yuj Yespíritu Jehová 'a junc jolm witz mto 'a junc pan̈n 'a'lic, xchi eb'. Palta 'ix yaln 'a eb' 'ixtic: —May mach tz'ati, xchi.

¹⁷ Palta caw wal 'ix tew 'och eb' 'a 'a, sec tzchecx 'at eb' yu'uj, yuj cha, 'ix yalni to tz'at eb'. 'Ix 'at ewin 50 chi 'at say 'a 'oxe c'ual, palta may mach 'ix 'ilchj yuj ewinac.

¹⁸ Xlajw cha, 'ix meltzj eb' 'a Jericó, yujto ata 'aycn Eliseo. 'Ix yaln 'a eb' 'ixtic: —'In 'ix wal 'ayex, may mach tz'ati, xin chi, xchi 'a eb'.

B'onc a pac'b'a yuj Eliseo 'a Jericó

¹⁹ 'Ix yaln eb' 'anma cajn 'a jun chon̈b' chi 'a Eliseo 'ixtic: —'Ilto, a jun lugar 'aj 'ay jun chon̈b' tic caw wach', 'in tzel quet'oc, palta may tas tz'el 'a sat qui lu'um, yujto man̈ wach'c a a 'ay 'a 'a, xchi eb'.

²⁰ —Xlajw cha, 'ix yaln 'ixtc 'a eb': —'Ijec cot 'atz'm 'atz'm 'ayn 'a yol junc niwquil 'a't 'uc'ab', xchi. 'Ix yi'n cot eb' jun 'uc'b' 'atz'm chi 'a 'a.

²¹ Xlajw cha, 'ix 'at secnc 'ejm 'a yib'n̈ a spac'b'a cha, 'ix yaln 'ixtic: —'Ixtc 'ix yutj Jehová yalni: An 'oj in b'o jun a a tic, may b'a'n̈ to 'ay mach 'oj cham yuj a', may b'a'n̈ to may tas 'oj 'el 'a sat lum lum tic, xchi Jehová, xchi Eliseo.

²² 'Ix b'ocn a', 'icha 'ix yutj Eliseo yalni, masnto ticnec.

Eb' xb'ajn Eliseo

²³ Xlajw cha, 'ix 'at Eliseo 'a chon̈b' Bet-el. A yic wan sb'ey 'a jun b'e tzq'ue'ch 'a chon̈b' cha, 'ix 'elt jun tzo'n̈ quelmtac winc 'aj chon̈b' chi 'a sat, 'ix syamn 'och eb' sb'ajni, 'ix yaln eb' 'a 'ixtic: Q'uen̈ta ach wacal jolom, xchin̈j eb'.

²⁴ 'Ix meltzj 'at q'ueln 'a eb', 'ix scatb'tzan can eb' 'a sb'i Jehová. Yajn̈j wal cha, 'ix 'elt chawn̈ no oso 'a calte', scotc ch'iychtan 'at no 42 eb' quelmtac winc cha.

²⁵ Xlajw cha, 'ix 'at Eliseo 'a lum jolm witz yic Carmelo, 'ix pax 'a chon̈b' Samaria.