A Ch'an̈ Schab'il Libro Yic Yab'ixal Eb' Rey 16 - Chuj San Sebastian Bible

'Ochnc Acaz sreyloc Judá

¹ A yic yuclajn̈il xo ab'il yoch win Peka reyl 'a Israel, 'ix schan 'el yich Acaz yunnal Jotam ya'n reyl 'a Judá.

² Junc'l ab'il sq'uinl Acaz yic 'ix 'och reyal. Waclajn̈e ab'il 'ix yac' reyl 'a Jerusalén. Caw maysch'olnil 'ix 'el sb'on 'a sat Jehová, man̈ 'ichaoc sb'eyb'al David, atn smam yicham.

³ Palta an̈j sb'eyb'al eb' sreyl chon̈b' Israel 'ix sb'eylb'ej, 'ix sn̈ustz'a yunnal xajmb'alil. Lajn 'ix yutj sb'a 'icha stu sb'eyb'alil jun tzo'n̈ xo nacion̈ to pechb'il 'el yuj Jehová 'a 'aj c'ochnc eb' israel.

⁴ An̈jtona', 'ix yac' xajmb'al, 'ix sn̈usntz'a incienso 'a jun tzo'n̈ macsej 'ay 'a jolmctac witz, yet' 'a yich eb' te te pim xi'il.

⁵ A yic jun tiempoal cha, a Rezin sreyl chon̈b' Siria yet' Peka yunnal Remalías sreyl Israel, 'ix 'at eb' 'a Jerusalén, yic tzya'n eb' owl yet' Acaz, palta ma'ix 'ajx ganar yuj eb'.

⁶ An̈jtona', a yic jun tiempoal cha, a sreyl chon̈b' Edom a 'ix 'a'n ganar chon̈b' Elot, yic tz'ochcn yet' Edom cha; 'ix yi'n 'el eb' 'aj Judá cajn ta', ax eb' 'aj Edom cha, a eb' 'ix c'ochcn cajn ta'.

⁷ Xlajw cha, 'ix schecn 'at Acaz jaywn̈ eb' schecb' 'a Tiglat-pileser, atn sreyl chon̈b' Asiria, yic tz'at alxc 'a 'ixtc yu'uj: An a checb' in tic, tzwa'ch in b'a 'a yol a c'ab' 'icha junc onnal. Yuj cha, cotan̈ yic tzwul in a colnc 'a yol sc'ab' sreyl chon̈b' Siria, yet' 'a sreyl chon̈b' Israel, to tzyac' eb' owl wet'oc, xchi.

⁸ Yuj cha, 'ix yij 'elt Acaz q'uen plata, q'uen oro 'ay 'a yatut Jehová, yet' q'uen 'ay 'a sdespacho, 'ix siyn 'at 'a sreyl chon̈b' Asiria.

⁹ 'Ix syiclj sreyl chon̈b' Asiria sb'on tas 'ix yala, 'ix jaw yet' eb' soldado wul yac' 'owl yet' Damasco, 'ix smiln pax eb' win Rezin sreyl jun chon̈b' cha. Xyi'n 'at eb' soldado chi eb' 'anma cajn 'a jun chon̈b' cha, 'ix c'och eb' 'a chon̈b' Kir.

¹⁰ Xlajw cha, 'ix 'at rey Acaz 'a chon̈b' Damasco 'at scha win Tiglat-pileser sreyl chon̈b' Asiria. Ata 'ix yil jun yet'l xajmb'al. Xlajw cha, 'ix ya'n cot win yechl jun yet'l xajmb'al chi 'a win Urías ya'mal 'och sti eb' 'anma 'a Dios 'a Jerusalén, sec 'icha wal yaj jun cha, 'ixta tz'aj sb'o junc chi yuj winac.

¹¹ 'Ix sb'on chan̈ win Urías chi jun yet'l xajmb'al cha, 'icha wal yaj yechl 'ix ya' cot rey Acaz 'a chon̈b' Damasco; wach' xo yaji yic 'ix paxt win rey chi 'a Damasco cha.

¹² A yic 'ix jaw win rey 'a Jerusalén, 'ix yiln win jun yet'l xajmb'al cha, 'ix snitzn 'o'chch sb'a 'a stz'ey.

¹³ 'Ix ya'n tz'a win jun tzo'n̈ xajmb'al to tz'a'i. Xya'n pax win 'ixm trigo ofrendail. 'Ix secn q'ue yal uva ofrendail 'a yib'an̈, 'ix stzicn pax 'och schic'l no xajmb'al yic junc'ojlal 'a spatquil jun yet'l xajmb'al cha.

¹⁴ Ax pax jun yet'l xajmb'al to nab'a bronce 'ay 'a yojltac yatut Jehová, 'ix ya'n win rey Acaz 'ijxoc 'el jun chi 'a snan̈l jun 'a't yet'l xajmb'al yet' yatut Jehová, ax 'a stojlal norte 'a jun 'a't yet'l xajmb'al cha, ata 'ix yac' 'ejmi.

¹⁵ Xlajw cha, 'ix yaln win rey Acaz 'a win Urías chi 'ixtic: A ticnec, a smasnil no xajmb'al tz'ajx 'a sq'uin̈b'ial yet' yic yemc'ual yet' ofrenda 'a tas tzc'uxxi yet' yal uva, cojxn 'a yib'n̈ jun yet'l xajmb'al tic tz'ajxi. A jun tzon̈ xajmb'al yic eb' chonn̈ab' yet' wic an reyn tic, an̈j pax 'a yib'n̈ tz'ajxi. Tzicx pax 'och schic'l smasnil no xajmb'al 'a spatquil. Palta ax jun yet'l xajmb'al to nab'a bronce wic tz'ajcni, sec ata tzin c'anb'j in b'a 'a Jehová, xchi.

¹⁶ 'Ix syiclj win Urías sb'on smasnil tas 'icha 'ix yutj win rey yalni.

¹⁷ 'Ix ya'n win rey chi 'ijxc 'el smacl snan̈l yojl jun tzo'n̈ careta, 'ix 'ijx 'el jun tzo'n̈ palagan yet'l a 'a yib'n̈ jun tzo'n̈ cha, 'ix 'ijx pax 'el q'uen yechl mam wacx nab'a bronce 'aych 'a yaln̈ niwquil pila, ax 'a yib'n̈ q'uen q'uen 'ay 'a sat lum 'ix yac' 'ejmi.

¹⁸ Sec wach' tzcan win 'a sat win sreyl chon̈b' Asiria, 'ix yij 'el 'a yatut Jehová jun yet'l eb' rey yic sc'ul 'iljelal yaji, yet' spuertail 'aj tz'och eb' rey 'a yamq'uil yatut Dios.

¹⁹ Ax jantcto yab'xil Acaz yet' smasnil tas 'ix 'el sb'oni, ata tz'ib'b'il can 'a ch'an̈ libro yic yab'xil eb' sreyl Judá.

²⁰ A yic 'ix cham win rey cha, ata 'ix mucx 'a 'aj mucn eb' smam yicham, 'a Schon̈b' David. Xlajw cha, ax jun yunnal tzuch Ezequías, a 'ix 'ochcn reyl sjeloc.