A Ch'an̈ Schab'il Libro Yic Yab'ixal Eb' Rey 14 - Chuj San Sebastian Bible

'Ochnc Amasías sreyloc Judá

¹ A yic schab'l xo ab'il yoch Joás yunnal Joacaz reyl 'a chon̈b' Israel, 'ix schan 'el Amasías yunnal Joás ya'n reyl 'a Judá.

² A Amasías cha, 25 ab'il sq'uinal yic schan 'el yich ya'n reyal. 29 ab'il 'ix yac' reyl 'a Jerusalén. Ax snun, Joadán sb'i, 'aj Jerusalén 'ix.

³ A smasnil tas x'el sb'on Amasías cha, tojl 'a sat Jehová, palta matz c'och 'icha wal yic David, atn smam yicham. Lajn xyutj sb'eyb'al 'icha yic smam, atn Joás.

⁴ Ma'ix yij pax 'el jun tzo'n̈ macsej 'a yet'l 'a jolmctac witz, an̈ja to ya'n eb' 'anma xajmb'al, tzn̈usntz'a pax eb' incienso ta'.

⁵ A yic 'ix yi'n wal Amasías yip 'a yopiso, 'ix smiln cham eb' winc 'aych 'a yopiso, atn eb' miljnac cham smam Amasías cha.

⁶ Palta ma'ix smil cham yunnal eb' xcham cha, yujto tz'ib'b'il can 'a ch'an̈ libro yic ley Moisés, 'a 'aj tzyal Jehová 'ixtic: A eb' mamb'il, matz tac' smilx cham eb' yuj smul yunnal, an̈jtona', matz tac' pax smilx cham eb' 'unnab'il yuj smul eb' mamb'il, palta junjn mach mun tzcham yuj smul, xchi.

⁷ 'Ix smil cham pax Amasías lajn̈e mil eb' edomita 'a owal, 'a lum tzcuch span̈nil yic 'atz'am. 'Ix 'ajx ganar chon̈b' Selá yu'uj, 'ix ya'n can scuch Jocteel.

⁸ Xlajw cha, schecn 'at Amasías schecb' 'a Joás sreyl chon̈b' Israel, yunnal win Joacaz, yixchicn Jehú. 'Ix yaln 'at 'a 'ixtic: Cotan̈, ca'lc qui b'a ca'n owal, xchi.

⁹ Palta ax win Joás cha, xya'n 'at spac 'ixtc 'a Amasías cha: 'Ix yalb't jun te sac q'uix 'a te c'ute 'ay 'a Líbano: 'Ac' 'ix esl yistzilc win wunnal, xchi te'. Palta ax e no chiwjum noc' 'ix 'ec' ta', 'ix ste'n can 'ejm e no te sac q'uix cha.

¹⁰ Wal yel 'ix eyac' ganar eb' edomita cha. 'Ij cab' chan̈ a b'a a' atut cha, palta man̈ e' chan̈ a b'a 'ayin. ¿Tas yuj cob' tza nib'j ac' 'owl wet'oc? Ton̈j 'oj cot 'a eb'n̈ yet' eb' et' chon̈b' cha, xchi Joás.

¹¹ Palta ax Amasías ma'ix schaj xon yab'i'. Yuj cha, 'ix cot Joás sreyl chon̈b' Israel yet' eb' soldado, ax Amasías yet' eb' soldado 'ix 'at eb', axta 'ix schaj sb'a eb' 'a Bet-semes 'a yol yic Judá.

¹² 'Ix 'ajx ganar eb' soldado yic Judá yuj eb' soldado Israel. Junjn eb' 'el-lal xoj x'aj eb' spax 'a yatut.

¹³ 'Ix yamchj Amasías yuj Joás 'a scal owl 'a Bet-semes. Xlajw cha, 'ix cot Joás yet' eb' soldado 'a Jerusalén, 'ix wul sma'noc can 'ejm lan̈chjoc eb' 180 metro smuroal chon̈b' Jerusalén, 'ix schaj 'at 'a spuertail yic Efraín masnto 'a spuerta'il yisquinyoal.

¹⁴ 'Ix yi'n 'at smasnil q'uen oro yet' q'uen plata, yet' smasnil jun tzo'n̈ yamc'ab' 'ay 'a yatut Jehová, yet' smasnil tas 'ay 'a sdespacho win rey. 'Ix yi'n 'at pax win jun tzo'n̈ eb' 'anma 'aj Jerusalén 'a chon̈b' Samaria, yic tzya'n pural yochx can Amasías 'a wach'c'ojlal yet'oc.

¹⁵ Ax jantcto yab'xil Joás yet' smasnil tas 'ix 'el sb'oni, yic 'ix ya'n owl yet' Amasías sreyl Judá, ata tz'ib'b'il can 'a ch'an̈ libro 'aj tz'ib'b'il can yab'xil eb' sreyl chon̈b' Israel.

¹⁶ A yic 'ix cham Joás, ata 'ix mucx 'a 'aj mucn eb' smam yichm 'a chon̈b' Samaria, atn 'aj mucn eb' ya'jnac reyl 'a chon̈b' Israel. Ax jun yunnal tzuch Jeroboam, a 'ix 'ochcn reyl sjeloc.

¹⁷ Ax pax Amasías yunnal Joás sreyl Judá, olajn̈e to ab'il 'ix cancni yic 'ix cham Joás, atn win yunnal Joacaz sreyl chon̈b' Israel.

¹⁸ Ax jantc to yab'xil Amasías, ata tz'ib'b'il can 'a ch'an̈ libro 'aj tz'ib'b'il can yab'xil eb' sreyl Judá.

¹⁹ 'Ay jaywn̈ eb' 'aj Jerusalén 'ix 'och 'ajc'ojlal 'a Amasías, yuj cha, 'ix 'at 'elc 'a Laquis; palta 'ix 'at eb' 'ajc'ojl chi 'a spatquil, masnto 'a jun chon̈b' cha, ata 'ix smil cham eb'.

²⁰ Yajn̈j cha, 'ix yi'n cot eb' 'a yib'n̈ chej, 'ix smucn eb' 'a Jerusalén 'a 'aj mucn eb' smam yichm 'a Schon̈b' David.

²¹ Yuj cha, ax smasnil eb' 'aj Judá, 'ix ya'ch eb' Azarías reyl sjelc smam, atn Amasías. Waclajn̈e ab'il sq'uinl Azarías, yic 'ix 'och reyal.

²² A yic chamnc xo smam cha, xyi'n pax 'ec' chon̈b' Elot, sb'on pax chan̈ jun 'ejm xo, 'ix 'ochx can yico'oc Judá.

'Ochnc win schab'l Jeroboam*r* sreyloc Israel

²³ A yic olajn̈e xo ab'il yoch Amasías reyl 'a Judá, atn win yunnal Joás, a 'a jun tiempoal cha, 'ix schan 'el yich junx win Jeroboam ya'n reyl 'a chon̈b' Israel, atn win yunnal junx win Joás. 41 ab'il 'ix yac' reyl 'a chon̈b' Samaria.

²⁴ Caw maysch'olnil 'ix 'el sb'on 'a sat Jehová, ma'ix yactj can sb'eylb'an smasnil smul Jeroboam yunnal Nabat, atn jun xjucb'tzan eb' yit israelal 'a maysch'olnil yic 'ix 'och smul eb'.

²⁵ 'Ix yi'n can pax 'ec' Jeroboam smasnil lum slum chon̈b' Israel 'e'nc yuj jun tzo'n̈ xo nacion̈ 'a yaln̈taxi, schaj 'at 'a 'aj tzon̈ 'och 'a Hamat, masnto 'a a mar yic Arabá, 'icha yutjnac yaln Jehová sDiosal chon̈b' Israel 'a Jonás atn jun schecab', win yunnal Amitai 'aj Gat-héfer.

²⁶ Yujto 'ix yil Jehová to caw wal 'oltac tz'ec' smasnil eb' israel yab'n sya'il, eb' 'aych checb'al, yet' eb' mun yic sb'a. May junc mach tzcolwj yet' eb',

²⁷ yuj cha sc'anlb'an Dios win Jeroboam yunnal Joás, yic scoln 'el eb', yujto matz nib'j to satl chon̈b' Israel.

²⁸ Ax jantc to yab'xil Jeroboam yet' smasnil tas 'ix 'el sb'oni, ata tz'ib'b'il can 'a ch'an̈ libro 'aj tz'ib'b'il can yab'xil eb' sreyl chon̈b' Israel. Ata tzyal yab'xil smasnil owl 'ix yac'a', yic 'ix yi'n can pax 'ec' jun tzo'n̈ chon̈b' to yic xon Israel 'a yaln̈taxi, atn Damasco yet' Hamat.

²⁹ A yic 'ix cham Jeroboam, ata 'ix mucx 'a 'aj mucn eb' smam yicham, atn 'aj mucn eb' ya'jnac reyl 'a chon̈b' Israel. Xlajw cha, ax jun yunnal tzuch Zacarías, a 'ix 'ochcn reyl sjeloc.