A Ch'an̈ Schab'il Libro Yic Yab'ixal Eb' Rey 12 - Chuj San Sebastian Bible

¹ A yic yucl ab'il xo yoch Jehú reyl 'a israel, 'ix 'och Joás reyl 'a Judá; chawinc ab'il 'ix yac' reyl 'a Jerusalén. A snun, Sibia sb'i, 'aj Beerseba.

² A tas 'ix sb'o Joás, caw wach' 'a sat Jehová, ya' sb'a 'ix cuyx yuj Joiada ya'mal 'och sti eb' 'a Dios.

³ Palta b'i'an, ma'ix 'ijx 'el jun tzo'n̈ macsej 'a yet'l 'a jolmctac witz yu'uj, an̈ja to ya'n eb' 'anma xajmb'al, tzn̈usntz'a eb' incienso ta'.

^4-5 'Ay jun c'ual, 'ix yaln Joás 'a eb' ya'mal 'och sti eb' 'anma 'a Dios 'ixtic: —Tzeyac' syam sb'a q'uen tumin, q'uen ofrenda tzwul 'ajxoc can 'a yatut Jehová, 'icha q'uen to yowlal tzyac' junjn eb' 'anma', yet' jantcn̈ej q'uen ofrenda to tz'el 'a sc'ojl eb' 'anma ya'ni. Junjn ex 'oj eyac' q'uen tumn chi 'oj e cha yuj sb'omb'il yatut Dios 'a 'aj juwnac, xchi Joás 'a eb'.

⁶ Palta a yic 'oxeschawinc ab'il xo yoch Joás reyal, mant 'a xon jac tas juwnc 'a yatut Dios chi tox xb'o yuj eb' ya'mal 'och sti eb' 'anma cha.

⁷ Yuj cha, 'ix yawtn cot rey Joás win Joiada, yet' jun tzo'n̈ xo eb' ya'mal 'och sti eb' 'anma cha, 'ix yaln 'a eb' 'ixtic: —¿Tas yuj mant 'a xon jac jun tzo'n̈ juwnc 'a yatut Dios tic tze b'o'o? Ax ticnec yic 'oj b'ey 'a cojltac tic, man̈x oquex 'oj e cha q'uen tumn 'a eb' 'anma', ax jantc xo q'uen 'ayc' 'ayex, yowlal 'oj eyac' 'elt q'ue'en, yic tzb'o jun tzo'n̈ juwnc 'a jun yatut Dios tic, xchi.

⁸ Ax eb' ya'mal 'och sti eb' 'anma cha, caw schaj sc'ojl eb', yujto man̈x 'oj scha eb' q'uen tumn 'a eb' 'anma', man̈x 'a pax yaln eb' yic sb'on jun tzo'n̈ juwnc 'a jun yatut Dios cha.

⁹ Xlajw cha, 'ix yi'n cot win Joiada te caxa cha, 'ix sb'on win yolnil smacul, 'ix 'at ya'nc 'och win te 'a stz'ey yet'l xajmb'al. Tzcan te caxa chi 'a qui wach' c'ab' yic tzon̈ 'och 'a yol yatut Jehová. Ax eb' ya'mal 'och sti eb' 'anma tztan̈wni spuertail, ata 'ix yac' 'ejm eb' smasnil q'uen tumn tzchaj eb' 'a eb' 'anma tzc'och 'a yatut Jehová cha.

¹⁰ A 'a yic junjn 'ejem yic tzb'ut'j te caxa cha, tzc'och jun yajtz'ib' win rey yet' win sat ya'mal 'och sti eb' 'anma 'a Dios, tzb'isn ewin q'uen tumn cha, xlajw cha, tzmoln ewin q'uen 'a yol coxtal, tzpixn ewin sti'.

¹¹ 'Ix ya'n ewin q'uen 'a eb' 'ajcuenta yiln sb'o munljel 'a yatut Jehová, yic tztojx eb' josmte', eb' tzch'oxn tas tz'aj sb'o yatut Jehová,

¹² eb' albanil, eb' b'om q'ue'en. 'Ix manx pax te te', yet' q'uen q'uen to mac'b'ilx pojoc, yic tz'och 'a yatut Jehová 'aj juwnc cha. 'Ix c'anx pax q'uen tumn chi 'a jun tzo'n̈ xo tas xmanxi, to tzc'anx 'a jun munljel cha.

¹³ Palta a jun tzo'n̈ q'uen tumn 'ix wul 'ajxoc 'a yatut Jehová cha, ma'ix c'anx q'uen 'a yic tzb'o jun tzo'n̈ vaso to nab'a plata, q'uen tz'i'n 'el stan̈il mecha, niwc vaso, yet' q'uen trompeta. Ma'ix c'anx pax q'uen 'a jun tzo'n̈ xo yamc'ab' to oro yet' plata.

¹⁴ Yujto 'ix 'ajx q'uen 'a eb' 'ajcuenta sb'on munljel, atn tas juwnc 'a yatut Jehová cha.

¹⁵ Palta ma'ix c'anx 'ilxoc scuenta eb' 'aj 'ix 'ajx q'uen tumn yic tztojx eb' munljum cha, yujto caw wach' snab'en jun tzo'n̈ eb' molm tumn cha.

¹⁶ Ax pax q'uen tumn yuj stojx lajwc mul, yet' q'uen yic tz'ajx lajwc mul, ma'ix 'ijx'at q'uen 'a yatut Jehová, yujto yic eb' ya'mal 'och sti eb' 'anma 'a Dios yaj q'ue'en.

¹⁷ A 'a yic jun tiempoal cha, a Hazael sreyl chon̈b' Siria, 'ix yac' owl yet' chon̈b' Gat, 'ix 'ajx ganar Gat chi yu'uj. Xlajw cha, 'ix 'at ya'nc owl yet' Jerusalén.

¹⁸ Palta ax Joás sreyl Judá, 'ix ya'cn syam sb'a smasnil jun tzo'n̈ ofrenda caw niwn yel'ch ya'jnac eb' smam yicham, atn rey Josafat, rey Joram yet' rey Ocozías, atn eb' sreyl Judá; yet' pax yic ya'jnac, yet' smasnil q'uen oro 'ayx 'ec' 'a yatut Jehová, yet' smasnil tas 'ay 'a yatut. A smasnil jun tzo'n̈ cha, 'ix ya't 'a Hazael sreyl chon̈b' Siria, sec wach' man̈xtzac jaw wul yac' owl yet' Jerusalén cha.

¹⁹ Ax jantc to yab'xil Joás yet' smasnil tas 'ix 'el sb'oni, ata tz'ib'b'il can 'a ch'an̈ libro 'aj tz'ib'b'il can yab'xil eb' sreyl Judá.

²⁰ 'Ix smol aln eb' 'aych yajlil yet' Joás, yuj tas tzyutj eb' smiln chamoc, yuj cha, axta smil cham eb' 'a yatut 'ay 'a Milo, jun 'ay 'a sti b'e tz'eml 'a chon̈b' Sila.

²¹ A Josacar yunnal Simeat, yet' Jozabad yunnal Somer, a eb' xmiln cham Joás, ata 'ix mucx 'a 'aj mucn eb' smam yichm 'a Schon̈b' David. Xlajw cha, ax jun yunnal tzcuch Amasías, a 'ix 'ochcn reyl sjeloc.