A Ch'an̈ Schab'il Libro Yic Yab'ixal Eb' Rey 10 - Chuj San Sebastian Bible

Satl Jehú smasnil eb' yin̈tl Acab

¹ 'Ay 70 eb' yunnal Acab 'aycn 'a chon̈b' Samaria; 'ix stz'ib'j 'at Jehú jun sb'ab'l carta 'a eb' syajlil chon̈b' cha, yet' pax 'a eb' yichm wincal chon̈ab', yet' pax 'a eb' yilmal eb' yunnal Acab. 'Ix yaln 'at 'a ch'an̈ carta chi 'ixtic:

² A 'ayx cha, ata 'ayc' eb' yunnal win eyajlil yet' no schej winac, yet' pax scaruaje win yic owal. A jun chon̈b' cha, caw wach' yaj sb'o'i, 'aycn syamc'ab' win yic owal. Yuj cha, a yic 'oj c'och jun carta tic 'ayex,

³ tze si'l junc yunnal win eyajlil cha, caw wach' 'ay cab' sjelnal, tzeya'n 'och reyl 'a sdespacho smam, ax eya'n owl yuj yopiso jun eyajlil cha, xchi 'a eb'.

⁴ Palta caw 'ix xiw eb' si'mb'il, 'ix yaln eb' 'ixtic: 'Intax a chawn̈ eb' rey, man̈x 'ic stac' ste'wtzan sb'a eb' 'a yojltac winac, ocxo on̈c tic, ¿tas wal 'oj cutquec qui te'wtzanec qui b'a 'a yojltac? xchi eb'.

⁵ Ax jun smayltoma win rey 'a sdespacho, yet' jun sgobernadoral chon̈b' cha, yet' eb' yichm wincal chon̈ab', yet' pax eb' yilmal eb' yunnal Acab, 'ix 'at ya'nc eb' alxc 'a Jehú 'ixtic: An̈ tic on̈ a checb' caj on̈; 'oj qui b'o smasnil tas 'oj ala', palta may junc 'oj qui si'ch reyal. B'o tas 'icha tza nib'ej, xchi eb'.

⁶ 'Ix stz'ib'n pax 'at Jehú junx ch'an̈ carta 'a scha'ejmal. 'Ix yaln 'at 'ixtic: Toto tze nib'j tzex 'och wet'oc, ax eyiclni tas 'oj wala', to 'ixta', tzeyij cot sjolm eb' yunnal jun eyajlil chi 'ayn 'a Jezreel tic, 'a 'icha hora tic q'uic'an, xchi. Ax eb' 70 yunnal win rey cha, jun yaj eb' yet' eb' yichm wincal chon̈b' cha, atn eb' 'ix q'uib'tzan eb'.

⁷ A yic schan eb' 'ichm winc chi junx ch'an̈ carta cha, 'ix syamn ewin eb' yunnal win Acab cha, 'ix smiln cham ewin eb'. Xlajw cha, 'ix ya'n 'ejm ewin sjolm eb' chi 'a yol jun tzo'n̈ xu'uc, 'ix 'at ya'nc 'ajxoc can eb' 'a Jehú 'a Jezreel.

⁸ Ax yic 'ix c'och jun win checb' 'a Jehú, 'ix yaln jun winc chi 'ixtic: —Tic 'ix jaw sjolm eb' 70 yunnal win rey, xchi winac. —'A'c can 'ejm 'a sti spuerta'il chon̈b' tic, chac'aj tzeyutj 'eli, ata tzcancni masnto q'uic'an, xchi Jehú 'a win checb' cha.

⁹ Ax 'a junx c'u, 'ix 'elt Jehú, 'ix 'och lin̈n 'a sti puerta cha, 'ix yaln 'a smasnil eb' chon̈b' 'ixtic: —Ax tic may e mul. An xin mil cham qui reyal, yuj wi'n 'el 'a yopiso; palta ¿mach 'ix miln cham smasnil jun tzo'n̈ eb' tic?

¹⁰ A ticnec, tzcham wal eyojcan 'eli, to a smasnil tas yaljnac can 'el Jehová 'a yib'n̈ eb' yin̈tl Acab, may junc tas ma'oj 'el'choc. Wan yel'ch smasnil tas yaljnac can Jehová 'a sti jun schecab', atn Elías, xchi Jehú.

¹¹ Xlajw cha, 'ix swach' miln cham Jehú jaywn̈ xo eb' yin̈tl Acab 'a Jezreel cha, eb' niwn yel'chi, eb' to caw swach'c'ojl sb'a yet'oc, yet' eb' 'aych ya'malc 'och sti eb' 'a sdioal yu'uj, man̈x 'a junc eb' xcan 'a spitznal.

Milb'il eb' yican Ocozías

¹² Xlajw cha, 'ix 'at Jehú 'a chon̈b' Samaria. A yic 'aych 'a yol b'e, 'ix c'och 'a jun n̈a 'aj tzjoxx no calnelu yuj eb' 'ilm calnelu.

¹³ Ata schaj 'el'ch sb'a yet' jun tzo'n̈ eb' yican Ocozías sreyl Judá, 'ix sc'anb'n 'a eb' 'ixtic: —¿Mach 'ayx yico'? xchi 'a eb'. —An̈ tic on̈, quican qui b'a yet' Ocozías on̈, to tzon̈ jaw wul cac' stzatzl sc'ojl eb' yunnal win rey, yet' eb' yune 'ix reina Jezabel, xchi eb'.

¹⁴ 'Ix yaln Jehú 'ixtc 'a eb' ajun yet'oc: —Yamc eb' 'a spitznal, xchi 'a eb'. Xlajw cha, x'ijx 'at eb' 'a spitznal. 'Ix milx cham eb' 'a sti a 'uc'b'il a 'a jun n̈a 'aj tzjoxx no calnelu cha. 42 sb'isl eb' 'a smasnil. Man̈x 'a junc eb' xcan 'a spitznal.

¹⁵ A yic x'atx Jehú ta', schan sb'a yet' Jonadab, yunnal Recab, a yic tox xlajw yajx stzatzl sc'ojol, 'ix yaln Jehú 'a 'ixtic. —¿Wach' am ya'n a nab'en 'ayin, 'icha swach'l ya'n in nab'en 'ayach? xchi 'a winac. —N', wach', xchi Jonadab. —Toto 'ixta', 'a' cot a c'ab' 'ayin, xchi Jehú. 'Ix ya'n 'at Jonadab sc'ab' 'a 'a, 'ix sto'n q'ue Jehú yet' 'a yol scaruaje,

¹⁶ 'ix yaln Jehú 'a 'ixtic: —Con̈ wet'oc, 'oj el wal chajtl tzwutj wa'n wip 'a tas 'ix yal Jehová, xchi 'a 'a. Yuj cha, 'ix yi'n 'at yet' 'a yol scaruaje cha.

¹⁷ A yic 'ix 'och 'a yol chon̈b' Samaria, 'ix smiln cham Jehú smasnil eb' yin̈tl Acab, atn eb' 'ix can to 'a spitznal. 'Ix satl eb' smasnil, 'icha yutjnac Elías yaln can yuj Jehová.

Satb'il 'el 'emmquilal tz'och 'a Baal

¹⁸ Xlajw cha, 'ix ya'n Jehú syam sb'a smasnil chon̈ab', 'ix yaln 'ixtic: —A Acab jab' wal 'ochnc 'emmquilal 'a Baal, palta an xo, caw wal niwn 'oj woch 'emmquilal 'a 'a.

¹⁹ Yuj cha, 'awtjec cot smasnil mach to schecb' yaji, yet' smasnil eb' to ya'mal 'och sti eb' 'anma yaj 'a 'a, may junc mach tzyac' palta, yujto 'ay jun in niwquil xajmb'al to yic Baal yaj wu'uj, tzann̈j mach tzyac' palta sjawi, 'oj milxoc chamoc, xchi. Palta a Jehú ton̈j 'ix yal jun tic, yujto yojc xoni, to 'oj milxoc cham eb' tz'och 'emmquilal 'a Baal cha.

²⁰ Yuj cha, 'ix ya'n Jehú alxc 'eli to tzchax sq'uin̈l Baal yuj yijx chan̈ sb'i, 'ixtnta x'aj sb'o'i.

²¹ Xlajw cha, schecn 'at Jehú schecab' yic tz'at alxc 'el 'a smasnil yol yic chon̈b' Israel, smasnil eb' tz'och 'emmquilal 'a Baal, yowlal tzc'och eb' 'a yatutal. May junc eb' ma'ix c'ochi, 'ix 'och eb' 'a yol yatutal cha, caw wal sin̈mtac x'aji.

²² 'Ix yaln Jehú 'a jun mach 'aj cuenta smoln pichul: 'Ac' 'elt jun tzo'n̈ pichl tzya'ch eb' 'anma tz'och 'emmquilal 'a Baal, xchi. 'Ix ya'n 'elt win jun tzo'n̈ pichl cha, 'ix ya'n 'och eb' 'anma cha.

²³ 'Ix 'och Jehú yet' Jonadab yunnal Recab 'a yol yatutal Baal cha, 'ix yaln Jehú 'a eb' 'ayc' chi ta 'ixtic: —Cham wal eyilni, may cab' junc eb' tz'och 'emmquilal 'a Jehová 'ayc' 'a e cal tic, palta cojn eb' tz'och 'emmquilal 'a Baal, xchi 'a eb'.

²⁴ A yic 'ix 'och eb' 'a yol Baal yatutal cha, 'ix ya'n eb' jun tzo'n̈ xajmb'al to tz'a smasnil, yet' jun tzo'n̈ xo xajmb'al. Ya' sb'a cha, 'ix ya'n 'och Jehú 80 eb' soldado stan̈wc 'a sti puerta cha, 'ix yaln 'a eb' 'ixtic: Tzann̈j mach tzchan 'el junc eb' tox xwa'ch 'a yol e c'ab' tic, a tzcham sjelc eb', xchi.

²⁵ A yic 'ix lajw ya'n eb' jun tzo'n̈ xajmb'al to tz'a smasnil cha, 'ix yaln 'ixtc 'a eb' tztan̈wni eb' cha, yet' 'a eb' capitan̈: —¡'Ochn̈ec, milc cham eb'! ¡May junc eb' tz'elcni! xchi. Ax eb' soldado Jehú, 'ix syamn 'och eb' smiln cham eb' yet' espada, 'ix 'ijx 'elt eb' xcham chi 'a sti yuj eb'. Xlajw cha, 'ix 'och eb' 'a yet'l Baal 'a yol yatutal cha,

²⁶ 'ix yi'n 'elt eb' jun tzo'n̈ yechel, 'ix sn̈usntz'a eb'.

²⁷ 'Ix sma'n poj eb' yet'l xajmb'al yet' yatutal cha. Yet'l chuljub' xoj x'ajcni, masnto ticnec.

²⁸ 'Ixtnta 'ix 'aj satn 'el Jehú 'emmquilal tz'och 'a Baal 'a chon̈b' Israel.

²⁹ Palta ma'ix satl jun 'emmquilal 'ix 'elcn yich yuj Jeroboam yunnal Nabat, atn jun xjucb'tzan eb' yit israelal 'a maysch'olnil, yuj 'emmquilal tz'och 'a jun tzo'n̈ yechl wacx to nab'a oro 'a Bet-el yet' 'a Dan.

³⁰ 'Ix yaln Jehová 'a Jehú 'ixtic: Yujto tojl tas 'ix a b'o 'a wojltac, 'ix a yiclj a satn 'el eb' yin̈tl Acab, 'icha wal yaj in nani, yuj cha, a eb' en̈til, 'oj 'ochn̈j eb' reyl 'a sdespacho chon̈b' Israel, masnto 'a schan̈ macn̈ 'in̈tal, xchi Dios.

³¹ Wach'xam to 'ixta', palta ma'ix ya'ch wal Jehú chi 'a sc'ojl syiclni sley Jehová sDiosal yet' eb' yit israelal, 'a smasnil sc'ojol, yujto ma'ix yij 'el sb'a 'a sb'eyb'al Jeroboam, win xjucb'tzan eb' yit israelal 'a maysch'olnil.

Chamnc win Jehú

^32-33 A 'a yic jun tiempoal cha, 'ix syamn 'och Jehová yi'n 'ec' slum chon̈b' Israel. A win Hazael 'ix c'och to yi'n 'ec' slum eb' israel 'ay 'a sc'axpil 'ec' a Jordán 'a stojlal 'aj tzq'uel c'u, atn 'a lum yic eb' yin̈tl Gad, Rubén yet' eb' yic Manasés, tzcotn̈j 'a chon̈b' Aroer 'a sti a Arnón, tz'ec' 'a Galaad masnto 'a Basán.

³⁴ Ax jantcto yab'xil Jehú yet' smasnil tas sb'ojnac, ata tz'ib'b'il can 'a ch'an̈ libro 'aj tz'ib'b'il can yab'xil eb' sreyl chon̈b' Israel.

^35-36 A Jehú 28 ab'il 'ix yac' reyl 'a yib'n̈ eb' yit israelal 'a chon̈b' Samaria. Ax yic xcham winac, ata 'ix mucxi, ax jun yunnal tzcuch Joacaz, a 'ix 'ochcn reyl sjeloc.