A Ch'an̈ Schab'il Libro Yic Yab'ixal Eb' Rey 1 - Chuj San Sebastian Bible

Schaml Ocozías

¹ A yic tox 'ix cham Acab, 'ix yi'n 'el sb'a Moab 'a yaln̈ schecnb'il chon̈b' Israel.

² Ax Ocozías sreyl Israel 'ix 'elt pichnjoc 'a sventnual schab'l piso 'a sdespacho 'ay 'a chon̈b' Samaria, caw niwquil x'aj slajwi. Yuj cha, 'ix yaln 'a eb' schecb' chi 'ixtic: 'Ixquec, 'at c'anb'jec eyab' 'a Baal-zebub sdiosal eb' 'aj Ecrón, toto 'oj b'oxc to in c'ojl 'a jun in yailal tic, xchi.

³ Xlajw cha, 'ix yaln jun yángel Jehová 'ixtc 'a Elías 'aj Tisbe: 'Ixc muc'uc, 'at 'ilt eb' schecb' win sreyl chon̈b' Samaria, tzaln 'a eb' 'ixtic: ¿Tom may Dios 'a qui chon̈b' Israel, yuj cha, at 'a Baal-zebub sdiosal Ecrón ata tz'at e c'anb'c e b'a? xa chi 'a eb'.

⁴ Tzaln paxi, chajtlto an Jehová in, an tzwal 'a jun rey chi 'ixtic: Man̈x 'oj a q'ue wan 'a a waynub' 'aj t'ocn ach 'eq'ui, cojn to 'oj a chami, ma'oj 'ec'oc, xchi Dios, xa chi, xchi jun ángel cha. Xlajwn̈ej cha, 'ix 'at Elías, syiclj tas 'ix alx 'a 'a.

⁵ Yuj cha, 'ix meltzj eb' checb' chi ta', ax yic xjaw eb' 'a yojltac win rey, sc'anb'n win 'a eb' 'ixtic: —¿Tas yuj ex meltzj muc'uc? xchi winac.

⁶ 'Ix ta'w eb' 'ixtc 'a winac: —Yujto 'ay jun winc 'ix qui chaj qui b'a yet' 'a yol b'e on̈, a 'ix aln 'ixtc 'ayn̈ on̈: Meltzjan̈c 'a win rey ex checn coti, tzeyaln 'a win to a Jehová tzyaln 'ixtic: ¿Tom may Dios 'a chon̈b' Israel, yuj cha, ax 'a Baal-zebub sdiosal Ecrón ata tz'at ac' c'anb'xoc? Yuj wal jun cha, man̈x 'oj a q'ue wan 'a a waynub' 'aj t'ocn ach 'eq'ui, cojn to 'oj a chami, ma'oj 'ec'oc, xchi Dios, xchi jun winc chi 'ayn̈ on̈, xchi eb'.

⁷ Xlajw cha, 'ix sc'anb'n win rey chi 'ixtic: —¿Tas wal yilx jun winc 'ix e chaj e b'a yet' cha, jun 'ix aln jun tzo'n̈ paxti tic 'ayex? xchi winac.

⁸ —A jun winc cha, 'aych jun spichl to patztac xil sat, 'aych pax jun tz'um jal-l 'a snan̈al, xchi eb'. —A jun winc cha, atn Elías 'aj Tisbe, xchi win rey cha.

⁹ Yajn̈j cha, 'ix schecn 'at win rey chi jun scapitan̈ yet' 50 soldado yic tz'at 'ijxoc cot Elías, ax yic xc'och eb' 'a 'a, chotn 'ec' 'a jun tzalan. Yuj cha, 'ix yaln jun capitan̈ chi 'ixtc 'a 'a: —Ach schecb' Dios, 'ix yal win rey tolab' tzach pax 'ejmi, xchi 'a 'a.

¹⁰ 'Ix ta'w Elías 'ixtic: —Toto schecb' in Dios an tic, cot cab' c'ac' 'a satcha'an̈, ax a tz'a yet' 50 a soldado tic, xchi. Yajn̈ej 'ix cot c'ac' 'a satcha'an̈, 'ix tz'a win capitan̈ yet' eb' 50 soldado cha.

¹¹ Xlajw cha, 'ix schecn pax 'at win rey chi junx scapitan̈ yet' junx 50 soldado. 'Ix 'at yalnc 'a Elías 'ixtic: —Ach schecb' Dios, tolab' tzach pax 'ejm muc'uc, xchi win rey, xchi.

¹² 'Ix ta'w Elías 'ixtc 'a 'a: —Toto schecb' in Dios an tic, cot cab' c'ac' 'a satcha'an̈, ax a tz'a yet' 50 a soldado tic, xchi. 'Ix tz'a win capitan̈ yet' eb' 50 soldado cha.

¹³ Xlajw cha, 'ix schecn pax 'at win rey chi junx scapitan̈ yet' junx 50 soldado 'a yox'ejmal. Palta ax jun yoxl capitan̈ cha, 'ix q'ue'ch 'a 'aj 'ayc' Elías cha, 'ix 'em cumn 'a yojltac, 'ix tew 'och 'a 'a, 'ix yaln 'ixtic: —Ach schecb' Dios, tzin tew 'ayach, niwn cab' yel'ch in q'uinl 'a a sat yet' eb' 50 soldado a'mal servil tic.

¹⁴ 'In to a chawn̈ eb' capitan̈ yet' eb' soldado 'ix b'ab'l wulc' 'ayach, 'in 'ix tz'a eb' yuj c'ac' xcot 'a satcha'an̈. Tzin tew 'aych ticnec, 'o'ch cab' a c'ojl 'ayin, xchi.

¹⁵ Xlajw cha, 'ix yaln jun yángel Jehová 'a Elías 'ixtic: —'Ixc yet' winac, man̈ ach xiwoc, xchi. 'Ix q'ue wan Elías, 'ix pax 'emt yet' jun capitan̈ cha. Xlajw cha, x'at yilnoc jun rey cha.

¹⁶ 'Ix yaln 'ixtc 'a 'a: —'Ixtc 'ix yutj Jehová yalni: Yujto 'ix a checb't eb' a checb' 'a Baal-zebub sdiosal Ecrón, yic tz'at a c'anb'noc a b'a 'a 'a, 'icha to may Dios yet' spaxti 'a a chon̈b' Israel tic, yic tza c'anb'n a b'a 'a 'a. Yuj cha, man̈x 'oj a q'ue wan 'a a waynub', palta to 'oj a chami, ma'oj 'ec'oc, xchi Dios, xchi Elías.

¹⁷ Ax x'aji, 'ix cham win rey, 'icha 'ix yutj yaln Elías yuj Jehová. Yujto may xon junc yunnal, yuj cha, a jun yu'tac tzcuch Joram, a 'ix 'ochcn reyl sjeloc, atn 'a yic schab'l xo ab'il yoch Joram yunnal Josafat reyl 'a Judá.

¹⁸ A jab'x yab'xil win rey Ocozías yet' smasnil tas 'ix 'el sb'oni, ata tz'ib'b'il 'a ch'an̈ libro 'a 'aj tz'ib'b'il yab'xil eb' sreyl chon̈b' Israel.