1 Ts 5 - Chuj San Sebastian Bible

¹ Palta ex wu'tac, ex wanab', man̈ yowlalc tzwalb't 'ayex, 'aja tiempoal 'oj jawc Cajlilec.

² Yujto eyojc xo si'mb'il, 'icha junc 'elc'm tzjaw 'a 'ac'wal, may mach 'ojtnac, janc' tzjawi, 'ixta 'oj jawc sc'ul sjaw Cajlilec.

³ A 'a yic jun tiempoal cha, 'oj cob' yal eb' 'anma 'ixtic: An̈ec tic, caw wach' cajec, toc 'ay tas tzqui na'ec, 'oj schic cob' eb'. Palta yajn̈j wal cha, ax satx can 'ejm eb'. 'Icha tz'aj sjaw syailal junc 'ix tz'alj yune', 'ixta 'oj 'aj sjaw syailal eb' cha. Wal yel, may junc eb' 'oj colchjoc can 'el 'a jun syailal cha.

⁴ Palta ex wu'tac, ex wanab', man̈ on̈ 'ayc 'ec' 'a q'uic'q'uinal, yujto tznachj 'el jun tzo'n̈ tic cujec. Yuj cha, wach'xam 'oj jawc jun c'u chi 'icha sjaw junc 'elc'um, palta lista xon cajec.

⁵ Yujto an̈ec tic, sacq'uinl xo yaj qui pixnec, yic on̈c xo c'ual. Yel man̈ q'uic'q'uinloc yaj qui pixnec, man̈ on̈ yico'oc 'ac'wal.

⁶ Yuj cha, matz tac' lajn tzcutjec qui b'a 'icha jun tzo'n̈ xo eb' 'anma'. 'Icha to waync eb', yujto matz tan̈wj eb' sjaw jun c'ul cha. Yowlal tzon̈ macwjec, te'n tzcutjec qui nab'en.

⁷ A eb' 'anma cha, 'icha to waync eb'. 'Icha to 'u'm 'an̈ eb', yujto yic 'ac'wl yaj eb', q'uic'q'uinl to yaj spixn eb'.

⁸ Palta an̈ec tic, yic on̈c xo c'ual. Yuj cha, caw te'n tzcutjec qui nab'en. Yowlal tzqui wach' 'a'jec 'och Cristo 'a qui c'ojol. An̈jtona', 'ay cab' pax qui chamc'ojlalec. Toto 'ixta', lajn on̈c 'icha eb' soldado tzcol sb'a yet' sq'uen pichl 'aych 'a sn̈i sc'ojol. Yowlal tzca'c 'och yipc qui c'ojol, to colchjnacn̈ec. Toto 'ixta', lajn on̈c 'icha eb' soldado c'oxb'il sq'uen xumpiln yu'uj. 'Ixta tzcutjec qui coln qui b'a.

⁹ Yujto a Dios, man̈ yujoc ya'n qui yailal, on̈ spojnec 'eli. On̈ spojc 'eli, yic tzqui chanec qui colnb'il 'a Cajlil Jesucristo.

¹⁰ A Cristo 'ix cham qui jelquec. Yuj cha, toxn̈ej pitzn on̈ec, toxn̈ej chamnc on̈ xo, ax sjawi, palta junn̈j 'oj cajc yet' qui masnil.

¹¹ Yuj cha, tzlaj eya'lac e tzaljc'ojlal junjn ex. Tzlaj e wach' 'a'nc pax e te'nal, 'icha xon wan e b'oni.

Tzajx snab'enoc eb' creyente

¹² Ex wu'tac, ex wanab', 'ay eb' tzmunlj 'a e cal yuj Cajlilec, wan ex ya'n cuenta eb', wan swach' 'a'n eb' e nab'enoc. Tzon̈ tew 'at 'ayx on̈, nachj cab' 'el eyu'uj, to 'ay yopiso eb' yuj Dios.

¹³ Yowlal niwn yel'ch eb' 'a e sat, tze chamc'ojlan pax eb', yujto tzmunlj eb' 'a Cajlilec. Caw junc'ojlal tzlaj eyutc e b'a e masnil ta'.

¹⁴ Ex wu'tac, ex wanab', tzcham wal caln 'at 'ayx on̈, to tze xib'tj chan̈ eb' matz nib'j sb'o smunljel. Tzeya'n pax sniwnal sc'ojl eb' 'ay scusc'ojlal. Tzeyac' ste'nal eb' mant 'a yip 'a screyenteal. Caw niwn tzeyutj e c'ojl 'a eb' smasnil.

¹⁵ A eb' maysch'olnil tzyutj sb'a 'ayex, caw man̈ e pac e b'a 'a eb'. Smasnil tiempo, caw wach' tzlaj eyutc e b'a 'ayx junjn ex, yet' 'a eb' 'anma smasnil.

¹⁶ Tzaljan̈c 'a smasnil tiempo.

¹⁷ Leslwan̈ec, man̈ eyactc can e leslwi.

¹⁸ Caw tzlaj eya'n̈j yuj diosal 'a Dios, yaln̈ej tas tzjaw 'a eyib'an̈. 'Ixta tznib'j Dios tzqui b'o'ec, yujto yic on̈c xo Cristo Jesús.

¹⁹ Man̈ e tench wan Yespíritu Dios 'aych 'ayx junjn ex.

²⁰ A eb' tz'ajx yal-l spaxti Dios 'ayex, man̈ cot eyowl 'a tas tzyal eb'.

²¹ Jantcn̈ej jun tzo'n̈ cuynb'il tzalx 'ayex, cham wal e nani, toto yel, mto ma'ay. A wal 'a jun tzo'n̈ yel, ata tzeya'ch e nab'en.

²² Smasnil tas maysch'olnil, caw man̈ e cha eyab'i'.

²³ A Dios 'a'm junc'ojlal. Tzqui nib'j on̈, a tzex wach' 'i'n 'och yico'oc si'mb'il. Tzqui nib'j pax on̈, a tz'a'n cuenta e pixan, e nab'en, yet' pax e niwnal, sec may jac e mul ax sjaw Cajlil Jesucristo.

²⁴ A jun si'jnacn̈ec 'eli, caw tz'el'chn̈ej tas tzyala. A 'oj 'a'n 'el'choc jun tzo'n̈ tic smasnil.

Tz'ajx 'at stzatzl sc'ojl eb'

²⁵ Ex wu'tac, ex wanab', caw tzex leslwi cuj ta 'on̈.

²⁶ A yic tzlaj e chanc e b'a, tzlaj eya'lac stzatzl e c'ojol, yujto yic ex xo Dios.

²⁷ A 'a sat Cajlilec, tzcham waln 'at 'ayex, to tzeyawtj jun in carta tic 'a scal eb' creyente smasnil ta'.

²⁸ Tzqui nib'j on̈, a Cajlil Jesucristo, tzyac' swach'c'ojlal 'ayx ta'. [Ya' cab'i'.]