1 Ts 4 - Chuj San Sebastian Bible

A jun wach' b'eyb'al 'a sat Dios

¹ Ex wu'tac, ex wanab', 'in 'ec' caljnacx 'ayx on̈, to wach' tzeyutj e b'eyb'al, sec tzalj Dios eyet'oc. Al ticnec, tzon̈ tew 'at 'ayx 'a sb'i Cajlil Jesús, tzcham wal caln 'at 'ayx on̈, to tze wach' yiclj jun checnb'il tic si'mb'il.

² Eyojc xo jun tzo'n̈ schecnb'il Cajlil Jesús 'ec' caljnac 'ayx on̈.

³ A jun tzo'n̈ tas 'oj walb't 'ayx tic, tznib'j Dios to tzqui yicljec. Yowlal caw an̈j 'a tzca'c 'och qui nab'en. Caw matz tac' qui b'onec 'ajmulal.

⁴ Ex wu'tac, junjn ex, yowlal tzeyojquej 'eli, to cojn wal 'a eyistl 'aj tzeya'ch e nab'en. Caw niwn cab' yel'ch eyistl 'a e sat junjn ex.

⁵ Matz tac' tzqui nib'jec 'och maysch'olnil yet' qui niwnal, 'icha eb' man̈ 'ojtnacoc Dios.

⁶ Caw man̈ quixtquec junc eb' quit creyenteal yet' jun tzo'n̈ tic. Xcham wal 'ec' calnc 'ayx on̈, toto 'ay eb' tzb'on jun tzo'n̈ maysch'olnil tic, caw 'oj yac' Dios syailal eb'.

⁷ Yujto a 'awtjnacn̈ec 'och yico'oc, sec caw wach' tzcutjec qui b'eyb'al. Man̈ yujoc qui b'onec maysch'olnil, on̈ yawtnec.

⁸ Toto 'ay mach tzchichn 'och 'a jun tzo'n̈ checnb'il tic, a 'a Dios wan schichn 'ochi, man̈oc 'a junc 'anma'. Palta atn Dios 'a'jnac 'och Yespíritu 'ayn̈ec.

⁹ Man̈ yowlalc an tzwalb't 'ayex, tze chamc'ojlan eb' eyit creyenteal. Yujto caw a Dios tz'a'n nachjc 'el eyu'uj, tas tzeyutj e chamc'ojlan e b'a.

¹⁰ 'In 'ixta wan eyutn e chamc'ojlan smasnil eb' eyit creyenteal 'a yol yic Macedonia. Palta ex wu'tac, ex wanab', tzon̈ tew 'at 'ayx on̈, sec tzwach' niwtj e chamc'ojlal ta'.

¹¹ Caw tzeyac' eyip, sec tzex can 'a junc'ojlal. Man̈ eyactc can e b'on e munljel junjn ex. Sayc munljoc e b'a 'icha yaj caln can 'ayx on̈,

¹² sec wach' 'ay eyel'ch 'a sat eb' comn 'anma'. Toto 'ixta tzeyutj e munlji, colb'il tzyab' e gasto.

A yab'xil yic 'oj jawc Cajlil

¹³ Ex wu'tac, ex wanab', tzqui nib'j on̈, caw tzeyojquej 'eli, tas wal yaj eb' creyente chamnc xo, sec matz ex cus yuj eb', 'icha tzcus eb' may tas tzya'ch yipc sc'ojol.

¹⁴ An̈ec xo tic, tzca'c 'och 'a qui c'ojol, chajtlto a Jesús 'ix chami, 'ix pitzw paxi. 'Ixta 'oj 'aj pax eb' creyente chamnc xo. A Dios 'oj 'a'nc pax cot eb' yet' Jesús.

¹⁵ A jun tzo'n̈ wan caln 'at 'ayx tic on̈, atn scuynb'il Cajlilec. A 'a yic 'oj jawoc, an̈ec pitzn on̈c to ta', ma'oj qui b'ab'ljec 'a eb' creyente chamnc xo, yujto junn̈j 'oj cajc qui 'at yet' eb'.

¹⁶ 'Oj 'awtxoc jun checnb'il yuj jun sat ángel, ax yoc' pax strompeta Dios. At wal ta 'oj 'emloc Cajlilec 'a satcha'an̈. Ax eb' creyente chamnc xo, 'oj b'ab'l pitzwc pax sniwnal eb'.

¹⁷ 'Oj lajwcn̈ej cha, an̈ec pitzn on̈c to ta', junn̈j 'oj 'aj quijxec chan̈ yet' eb'. Ax qui q'ue'chec 'a scal 'asn 'a snan̈l satcha'an̈, ax qui chanec sjaw Cajlilec ta'. 'Ixta to b'i'an, ax qui canc yet' 'a jun 'ejmn̈ej.

¹⁸ Yuj cha, junjn ex, tzlaj eya'lac e nab'enoc yet' jun tzon̈ cuynb'il tic.