1 Ts 3 - Chuj San Sebastian Bible

¹ Ma'ix techj ex qui nan on̈. Yuj cha, qui nan b'in on̈, to tzon̈ can qui ch'ocj 'a chon̈b' Atenas tic on̈.

² Ax cu'tac Timoteo tic xqui checb't 'ayex, yujto ya'mal pax servil Dios. Tzyaln 'el wach' 'ab'x yic Cristo quet' on̈. A xit' 'a'nc e te'nal. Xit' ya'nc e nab'enoc, sec tze wach' 'a'j 'och Cristo 'a e c'ojol.

³ A xit' alnc 'ayex, sec wach' may ex tzsomchj e nab'en yuj tastc wan eyab'n syail. Yujto eyojc xoni, to yowlal tzjaw jun tzo'n̈ yailal chi 'a quib'n̈ec 'icha tznib'j Dios.

⁴ A yic quec' 'ayx ta 'on̈, caln can 'ayx on̈, to yowlal tzcab'c syail. Eyojtac, 'ix 'el'ch 'icha wal yaj caln can 'ayx on̈.

⁵ Yuj cha, ma'ix techj ex in nani. Yuj cha, in checn 'at Timoteo 'at yab'i', toto an̈ja 'aych e c'ojl 'a Cristo. In nani, lemb'il a win diablo x'a'n juwc 'el e nab'en ta'. Toto 'ixta', nab'a 'ec' quixtjnac qui b'a qui munlj 'a e cal on̈.

⁶ Al ticnec, 'ix xit' Timoteo tic 'ayex. 'Ix yal eyu'uj, to an̈ja 'aych e c'ojl 'a Cristo, an̈ja 'ay e chamc'ojlal ta'. 'Ix yalni, to smasnil tiempo tzon̈ e na cot on̈, tzon̈ e chamc'ojlan cot on̈. 'Ix yaln paxi, to caw tze nib'j tzon̈ eyil on̈. An̈jtona', 'ixta 'on̈ pax on̈, caw tzqui nib'j tzex quil on̈.

⁷ An̈ xo tic on̈, til wal tas tzjaw 'a quib'n̈ on̈, wan cab'n syal 'a tic on̈. Palta a yic xcab'n on̈, chajtlto an̈ja 'aych e c'ojl 'a Cristo, xcaw japx qui tzaljc'ojlal eyuj on̈.

⁸ A yic xcab'n on̈, to an̈ja te'n tzeyutj eya'n 'och e nab'en 'a Cajlilec, xjapx can qui c'ojl eyuj on̈.

⁹ Yuj cha, caw tzcac' yuj diosal 'a Dios eyu'uj, yujto caw niwn qui tzaljc'ojlal eyuj 'a sat on̈.

¹⁰ Sc'ual yac'wlil ca'n 'ip qui leslwi on̈, sec toq'ue tztac' 'oj 'at ex quil on̈, ax qui wach' 'a'n tz'acwc e te'nal on̈.

¹¹ Tzqui nib'j on̈, a qui Mam Dios yet' Cajlil Jesucristo, tz'och quet' on̈, sec 'oj stac' qui 'at 'ayx on̈.

¹² Tzqui nib'j on̈, a Cajlilec tzwach' 'a'n niwtjoc e chamc'ojlal, sec 'oj e wach' chamc'ojloc e b'a si'mb'il. Ax e chamc'ojlan pax smasnil 'amna', 'icha tzex cutj ex qui chamc'ojlan pax on̈.

¹³ A 'a yic 'oj jawc pax Cajlil Jesucristo, qui masnil an̈ yic on̈c xo, junn̈j 'oj cajc yet'oc. Tzqui nib'j on̈, a tzwach' 'a'n te'nb'oc e nab'en, sec an̈ja caw wach' e b'eyb'al, may jac e mul 'a yojltac qui Mam Dios 'a jun tiempoal cha.