1 Ti 3 - Chuj San Sebastian Bible

A eb' tzjucb'tzan eb' creyente

¹ A junx paxti tic tzwalb't 'ayach, caw yel. Toto 'ay eb' cu'tac tznib'j tz'och yilmalc eb' yit creyenteal, wach' jun munljel chi tznib'j eb' sb'o'.

² 'Oj wala', tas yowlal tzb'eylb'ej eb' tz'och yopiso cha. Yowlal wach' sb'eyb'al eb' sec matz tac' yajx queja eb'. Yowlal junn̈j yistl junjn eb'. Yowlal caw te'n tzyutj eb' snab'en, tzya'n cuenta sb'a eb'. Yowlal wach' tzyutj eb' sb'eyb'al 'a sat eb' yit 'anma'il, 'ela tzyutj sb'a eb' 'a eb' tzlaj 'ec' 'a 'a. Yowlal wach' tzyutj eb' scuyn eb' yit creyenteal.

³ Caw matz tac' yu'n eb' 'an̈. Matz tac' sma'wj pax eb'. [Matz tac' snib'n eb' yac' ganar stumn 'a spatc maysch'olnil.] Yowlal niwn tzyutj eb' sc'ojol. Matz tac' ya'n eb' owl yet' junc xo mach. Man̈ pec' tumnoc eb'.

⁴ Yowlal caw wach' tzyutj eb' ya'n cuenta sb'a 'a yol yatut, sec wach' yiclum tzyutj sb'a yunnal eb' 'a 'a, sec 'ay yel'ch eb' 'a sat eb' yunnal cha.

⁵ A mach man̈ yojcoc tas tzyutj ya'n cuenta sb'a 'a yol yatut, ¿tast wal 'oj yutc ya'n cuenta yiglesia Dios?

⁶ A eb' 'unn creyente to, matz tac' yajx yopiso eb', yujto 'ay smay ton̈j tzb'an̈ sb'a eb'. Toto 'ixta tzyutj sb'a eb', 'ay smay tz'ajx can 'och yailal 'a yib'n̈ eb' 'icha x'aj win diablo.

⁷ A eb' 'ay yopiso, yowlal wach' tzyutj eb' sb'eyb'al 'a sat eb' man̈ creyenteoc, sec ma'oj b'uchxoc eb', yic ma'oj 'ajxc ganar eb' yuj win diablo.

A tas tzb'eylb'ej eb' diácono

⁸ Tic tzwalb't pax 'ayach, tas yowlal tzb'eylb'ej eb' diácono. Yowlal caw wach' tzyutj eb' sb'eyb'al 'a sat eb' yit 'anma'il. Man̈ chab' nab'enaloc tzyutj sb'a eb'. Caw matz tac' yu'n eb' 'an̈. Matz tac' snib'n eb' yac' ganar stumn 'a spatc maysch'olnil.

⁹ Yowlal caw tzya'ch eb' snab'en 'a jun tzo'n̈ cuynb'il 'ac'b'il yuj Dios, atn jun 'aj tzca'ch qui c'ojol. An̈jtona', yowlal tztan̈wj sb'a eb' yet' snab'en.

¹⁰ A yic mantzac 'och yopiso eb' diácono cha, yowlal tzb'ab'l b'eyc'ojlax can eb'. Toto may spaltail eb' tz'ilchji, tztac' yajx yopiso eb'.

¹¹ 'Ixta pax eb' 'ix 'ix tz'och yopiso, yowlal caw wach' tzyutj eb' sb'eyb'al 'a sat eb' yit 'anma'il. Matz tac' yalw peclal eb'. Yowlal caw te'n tzyutj eb' snab'en. An̈jtona', caw yiclum tzyutj sb'a eb' sb'on smasnil tas.

¹² A eb' diácono cha, yowlal junn̈j yistl junjn eb'. Caw wach' cab' tzyutj eb' ya'n cuenta sb'a 'a yol yatut.

¹³ Toto wach' tzyutj eb' yopiso, caw 'ay yel'ch eb' 'a sat eb' yit creyenteal. Toto 'ixta', matz xiw eb' yaln 'eli, chajtlto 'aych sc'ojl eb' 'a Cristo Jesús.

Yaljnac Dios yuj qui cuynb'il

¹⁴ Tzin na'a, toq'ue 'oj in 'at 'aych yic jaye c'u.

¹⁵ Palta lemb'il ma'oj stac' in 'at muc'uc. Yuj cha, tzin tz'ib'n 'at jun in carta tic 'ayach, sec wach' ojtac tas wal tzqui b'eylb'ej an̈ yunnaln̈ xo Dios. Yujto an̈ tic, 'ayn̈ xo 'och stz'acb'oc yiglesia Dios pitzan. 'Ay copiso caln 'el jun cuynb'il caw yel. Cu'uj, caw tz'och yip jun cuynb'il caw yel tic.

¹⁶ A Dios 'a'jnac cojcoc 'el tas yaj qui cuynb'il. Wal yel, caw niwn yel'ch jun tzo'n̈ ch'oxb'il yuj 'ayon̈: A Dios, ya'jnac 'och sb'a 'anma'il. Ax Yespíritu aljnac 'eli, chajtlto caw tojl snab'en. Ax eb' ángel, x'och q'ueln eb' 'a 'a. 'Ix alx pax 'el yab'xil 'a jun tzo'n̈ xo nacion̈. 'Ay eb' 'a yolyib'n̈q'uinl tic tzya'ch sc'ojl 'a 'a. An̈jtona', 'ijxnac can pax q'ue 'a satcha'an̈.