1 Jn 4 - Chuj San Sebastian Bible

A eb' yic Dios yet' eb' man̈ yico'oc

¹ Ex chamc'ojlb'il wu'uj, toto 'ay eb' tzalni to yic Dios jun tzo'n̈ tas tz'ec' yal eb', man̈ e comn chac eyab' mu'c 'a eb'. Yowlal tze b'ab'l 'a'j prowal eb', toto yel a Dios 'aych yet' eb'. Yujto til wal eb' 'a'm 'es 'ay 'a yolyib'n̈q'uinl tic. Tzcob' yalch sb'a eb' schecb'oc Dios.

² Palta 'oj walb't 'ayex, tas tzcutjec cojcan 'eli, mach eb' yel 'aych Yespíritu Dios 'a 'a. Toto tzyal eb' 'ixtic: A Jesucristo caw yel 'ochnc sniwnal yic swulq'ui, toto xchi eb', atn eb' chi 'aych Yespíritu Dios 'a 'a.

³ Palta a mach man̈ 'ichcta tzyutj yaln yuj Jesús, man̈oc Yespíritu Dios 'aych 'a 'a, yujto lajn snab'en yet' jun 'ajc'ojl yajch 'a Cristo. Tox xeyab'i, a jun 'ajc'ojl yajch 'a Cristo cha, yowlal 'oj pitzwc cha'an̈. A ticnec, 'ayx eb' 'a yolyib'n̈q'uinl tic, lajn xo yaj snab'en eb' yet' jun cha.

⁴ Ex chamc'ojlb'il wu'uj, yic on̈c xo Dios ticnec. Tox 'ix can eb' 'a'm 'es chi 'a yaln̈ cujec. Yujto a jun 'aych 'ayn̈ec, 'ec'b'al xo spoder 'a yib'n̈ jun 'aych 'a eb' yic yolyib'n̈q'uinl tic.

⁵ A eb' cha, yicn̈ej yolyib'n̈q'uinl tic yaj eb'. Yuj cha, cojn jun tzo'n̈ yic yolyib'n̈q'uinl tic tzyal eb'. Ax eb' 'anma', caw tzya'ch eb' schicn 'a eb', yujto yicto pax yolyib'n̈q'uinl tic yaj eb' yet' eb'.

⁶ Palta an̈ec xo tic, yic on̈c xo Dios. Yuj cha, a eb' yic xo Dios quet'ec, tzya'ch eb' schicn 'a tas tzcalec. Palta ax eb' man̈ yico'oc Dios, matz ya'ch eb' schicn 'a tas tzcalc 'a 'a. 'Ixta tzcutjec cojcan 'eli, mach eb' yel 'aych Yespíritu Dios 'a 'a, mach pax eb' 'aych yespíritu win 'a'm 'es 'a 'a.

A Dios 'ay schamc'ojlal

⁷ Ex wu'tac, ex wanb' chamc'ojlb'il wu'uj, caw qui chamc'ojloquec qui b'a, yujto a jun chamc'ojlal, a 'a Dios tzcoti. Toto tzqui chamc'ojlejec qui b'a, to 'ixta', yunnaln̈ec Dios, 'ojcab'ilx cujec.

⁸ Toto matz qui chamc'ojlejec qui b'a, wal yel mant cojcoquec Dios, yujto a Dios, 'ayn̈j schamc'ojlal.

⁹ Caw sch'ox Dios schamc'ojlal 'ayn̈ec, yujto xchec cot jun c'otn̈ Yunnal chamc 'a yolyib'n̈q'uinl tic, sec tz'ajx qui q'uinlec 'a jun 'ejmn̈ej yu'uj.

¹⁰ A schamc'ojlal tic, caw yel, yujto man̈oc on̈c xqui b'ab'l ch'oxj qui chamc'ojlal 'a 'a. Palta a sb'ab'l ch'oxj schamc'ojlal 'ayn̈ec. 'Ix schec cot Yunnal, xwul ya'nc cham sb'a yic stojn qui mulec.

¹¹ Ex wu'tac, ex wanb' chamc'ojlb'il wu'uj, 'ixta on̈ yutjec Dios on̈ schamc'ojlani. Yuj cha, yowlal tzqui chamc'ojlejec qui b'a jun xo.

¹² Wach'xam may junc mach 'ix 'iln Dios jun 'ejmoc, palta toto tzqui chamc'ojlejc qui b'a junjn on̈ec, caw a cajn 'och 'ayn̈ec. Ax schamc'ojlal, caw tzwach' tz'acw 'ayn̈ec yu'uj.

¹³ A 'a'jnac Yespíritu 'ayn̈ec, yuj cha, cojquec, to junn̈j cajc yet'oc, junn̈j yaj pax quet' junjn on̈ec.

¹⁴ An̈ tic on̈, caw quiljnac Yunnal Dios on̈. Yuj cha, tzca'n testigoal qui b'a on̈, chajtlto a qui Mam Dios, a 'a'jnac cot Yunnal chi wul scolnc 'el eb' 'anma 'a yolyib'n̈q'uinl tic.

¹⁵ A mach tzaln 'ixtic: A Jesús Yunnal Dios, toto xchi, junn̈j yaj yet' Dios, ax Dios junn̈j yaj pax yet'oc.

¹⁶ Tzca'c 'och 'a qui c'ojol, to a Dios tzon̈ chamc'ojlanec. Caw cojquec jun tic. A Dios 'ayn̈j schamc'ojlal. Yuj cha, toto 'ay qui chamc'ojlal jun xo, junn̈j cajc yet'oc, junn̈j yaj pax quet'ec.

¹⁷ 'Ixta tz'aj swach' tz'acw qui chamc'ojlalec, sec wach' ax yic 'oj jawc jun c'u yic b'eyc'ojlal, ma'oj qui xiwc 'a sat Dios. Yujto 'icha sb'eyb'al Cristo, 'ixta tzcutjec qui b'eyb'al 'a yolyib'n̈q'uinl tic.

¹⁸ Toto yel 'ay qui chamc'ojlalec, man̈xtzac on̈ xiwec. A mach tz'acn schamc'ojlal, man̈xtzac xiwi. Yujto a yic tzon̈ xiwec, caw tzcab'c syal yu'uj. Yuj cha, a eb' tzxiwi, mant tz'acnoc schamc'ojlal eb'.

¹⁹ 'Ay qui chamc'ojlalec 'a Dios ticnec, yujto a on̈ b'ab'l chamc'ojlanec.

²⁰ Toto tzcalec, to 'ay qui chamc'ojlalec 'a Dios, palta tzon̈ chichnec 'och 'a junc quit creyenteal, toto 'ixta', ton̈j tzca'c 'es. A eb' quit creyenteal, cojc yilx eb'. Yuj cha, toto matz qui chamc'ojlejc eb', ¿tast wal 'oj cutquec qui chamc'ojlanec Dios, yujto man̈ cojcoquec yilxi?

²¹ A aljnac can jun schecnb'il tic 'ayn̈ec, 'a 'aj tzyal 'ixtic: A eb' tzchamc'ojlan Dios, yowlal tzchamc'ojlej pax sb'a eb' yet' eb' yit creyenteal, xchi.