1 Cr 9 - Chuj San Sebastian Bible

¹ 'Ixtn tic 'ajnc stz'ib'x can smasnil eb' israel 'a ch'an̈ slibroal yic yab'xil eb' sreyl chon̈b' Israel. Palta a pax eb' 'anma 'ay 'a Judá, 'ix 'ijx 'at eb' 'icha presoal 'a Babilonia, yuj smaysch'olnilal eb'.

Eb' meltzjnac 'a Babilonia

² A eb' israel b'ab'l meltzjnac cot pax 'a slu'um yet' 'a schon̈ab', atn eb' ya'mal 'och sti eb' 'anma', eb' ya'mal servil yatut Dios, yet' jun c'aj xo eb' levita.

³ A 'a Jerusalén 'ix can cajn jayc'aj eb' israel, atn eb' yin̈tl Judá, Benjamín, Efraín yet' Manasés.

^4-6 A eb' yin̈tl Judá cha, 'ay 690 eb' winc 'a smasnil. A 'a eb' yin̈tl Fares win yunnal Judá, a Utai yunnal Amiud, 'aych yajlil 'a scal eb', yet' jun tzo'n̈ xo eb' smam yichm 'a stzolil: atn Omri, Imri, Bani, atn eb' yin̈tl Fares win yunnal Judá. A 'a scal eb' yin̈tl Sela yunnal Judá, a Asaías, a b'ab'l 'unnab'il yaj 'a scal eb', yajl yaj 'a yib'n̈ eb' yican. A 'a scal eb' yin̈tl Zera win yunnal Judá, a Jeuel 'aych yajlil 'a yib'n̈ eb' yican.

^7-9 Atn slistail eb' 'aych yajlil 'a yib'n̈ eb' yin̈tl Benjamín: atn Salú yunnal Mesulam, yixchicn Hodavías schab'l 'ichicn Asenúa. A Ibneías yunnal Jeroham; ax Ela, yunnal Uzi, yixchicn Micri; a Mesulam yunnal Sefatías, yixchicn Reuel, schab'l 'ichicn Ibnías. 'Ay 956 eb' 'a smasnil.

¹⁰ Ax eb' ya'mal 'och sti eb' 'anma 'a Dios cajn 'a Jerusalén: atn Jedaías, Joiarib, Jaquín,

¹¹ Azarías, yunnal Hilcías, a Hilcías yunnal Mesulam, a Mesulam, yunnal Sadoc, a Sadoc yunnal Meraiot, a Meraiot yunnal Ahitob. A Azarías cha, a yajl yaj 'a yatut Dios.

¹² A Adaía yunnal Jeroham, a Jeroham yunnal Pasur, a Pasur yunnal Malquías; a Malquías yunnal Masai, Masai yunnal Adiel, a Adiel yunnal Jazera, a Jazera, yunnal Mesulam, a Mesulam yunnal Mesilemit, ax Mesilemit yunnal Imer.

¹³ A eb' tic mamb'il yaj eb' 'a junjn n̈a'il. 'Ay 1,760 eb' winac, caw wal tztac' sb'on eb' munljel 'ay 'a yatut Dios.

¹⁴ Ax eb' yajl yaj 'a yib'n̈ eb' levita: atn Semaías, yunnal Hasub, yixchicn Azricam, schab'l 'ichicn Hasabías yin̈tl Merari eb';

¹⁵ Bacbacar, Heres, Galal yet' Matanías, yunnal Micaía yixchicn Zicri, schab'l 'ichicn Asaf;

¹⁶ Obadías, yunnal Semaías, yixchicn Galal yin̈tl Jedutún yet' Berequías, yunnal Asa, yixchicn Elcana. Ata 'e'nc cajn eb' 'a yaldeail yic eb' netofatita.

¹⁷ A eb' tan̈wm puerta: atn Salum, Acub, Talmón, Ahimán, yet' jun tzo'n̈ xo yican eb'. A Salum cha, a yajl yaj 'a yib'n̈ eb'.

¹⁸ Tztan̈wxn̈ej spuerta eb' rey yuj eb' levita 'a stojlal 'aj tzq'uel c'u. A jun tzo'n̈ eb' tic 'aych 'a yib'n̈ eb' stan̈wni spuertail camplamento 'a scal eb' yit levitail.

¹⁹ A Salum, yunnal Coré, yixchicn Ebiasaf, yin̈tl Coré, yet' jun tzo'n̈ xo yican eb', atn eb' coreita, a eb' 'aych 'a yib'n̈ stan̈wni spuertail yatut Dios, 'icha yutjnac eb' smam yichm eb' stan̈wni spuertail scajnub' Jehová 'a pecti'.

²⁰ A Finees, yunnal Eleazar, a 'aych syajlilc eb' 'a yaln̈taxi. ¡Caw 'aych Jehová yet'oc!

²¹ Ax Zacarías yunnal Meselemías, a tztan̈wni spuertail mantiado 'aj tzqui chaj qui b'a yet' Dios.

²² A sb'isl eb' tztan̈wni puerta sic'b'il 'eli, 'ay 212 eb' 'a smasnil, tz'ib'b'il can eb', a tzyal yin̈tl junjn macn̈ 'aj cajan. A rey David yet' Samuel atn schecb' Dios, a eb' x'a'n 'och eb' 'a yopiso to niwn yel'ch tic.

²³ Atn eb' yet' eb' yunnal, tz'och 'a stzol-l stan̈wni spuertail yatut Jehová, tzyal 'el'chi, atn scajnub'.

²⁴ 'Aychn̈ej stan̈mal spuertail 'a schan̈ paq'uil; 'a stojlal 'aj tzq'uel c'u, 'a stojlal 'aj tz'em c'u, 'a stojlal norte yet' 'a stojlal sur.

²⁵ Ax eb' yit levitail eb' cajn 'a aldea, tzwulc' eb' colwjoc wul stan̈wc jun tzo'n̈ puerta chi yet' eb', uque c'u tzwulc' junn̈j c'aj eb', macquiltac swulc' eb'.

²⁶ Palta 'ay chan̈wn̈ eb' levita niwn yel'ch yopiso, a eb' 'aych 'a yib'n̈ stan̈wni jun tzo'n̈ cuarto yet' a 'aj tzmolx q'uen tumn to yic yatut Dios yaji.

²⁷ A eb' tic 'ayc'n̈ej eb' 'a spatquil yatut Dios tz'ec' 'ac'wal, yujto 'aych 'a yib'n̈ eb' stan̈wni jun yatut Dios cha, tzjacn eb' 'a junjn sq'uin̈b'ial.

²⁸ A junc eb' tic, 'aych 'a yib'n̈ yiln jun tzo'n̈ yamc'ab' tzc'anx yic tz'och 'emmquilal, a eb' scuenta yi'n 'elta, tzmoln can pax eb'.

²⁹ Ax jun tzo'n̈ xo eb', 'aych 'a yib'n̈ eb' yiln jun tzo'n̈ xo yamc'ab' to yic yatut Dios yaji: atn 'ixm harina, yal uva, aceite, incienso yet' perjuma.

³⁰ 'Ay pax eb' ya'mal 'och sti eb' 'anma 'a Dios, a eb' tzb'on perjuma cha.

³¹ Ax jun levita tzcuch Matatías, sb'ab'l 'unnal Salum, yin̈tl Coré, 'aych 'a yib'n̈ sb'on jun tzo'n̈ 'ixm niwc pan tz'ajx ofrendail.

³² Ax jun tzo'n̈ xo eb' yit levitail, eb' yin̈tl Coat, 'aych 'a yib'n̈ eb' sb'on 'ixm pan tz'em tzoln 'a sat mexa 'a junjn sc'ul 'iljelal.

³³ An̈jtona', 'ay pax eb' yajl yaj 'a eb' yin̈tl levita to tzb'itni, ata cajn eb' 'a jun tzo'n̈ cuarto yic yatut Dios cha. Matz tac' yiln eb' jun tzo'n̈ xo munljel, yujto sc'ual yac'wlil smunlj eb', witz'n eb' yuj yopiso cha.

³⁴ Atn eb' tic yajl yaj 'a yib'n̈ smasnil yin̈tl eb' levita, a tzyal yaj stzol-l yin̈tl eb', ata cajn eb' 'a Jerusalén.

Eb' yin̈tl Saúl

³⁵ A 'a chon̈b' Gabaón ata cajn Jehiel, smam 'ichm eb' 'aj Gabaón cha. Ax yistzil Maaca sb'i.

^36-37 Eb' yunnal: atn Abdón sb'ab'l 'unnal, xlajw cha x'alj pax Sur, Cis, Baal, Ner, Nadab, Gedor, Ahío, Zacarías yet' Miclot.

³⁸ A Miclot cha, a 'ay yunnal Simeam. An̈jtona jun tzo'n̈ eb' tic 'ix can cajn eb' yet' eb' yican 'a Jerusalén.

³⁹ A Ner, a 'ay yunnal Cis, ax Cis a 'ay yunnal Saúl, ax Saúl a 'ay yunnal Jonatán, Malquisúa, Abinadab yet' Es-baal.

⁴⁰ A Jonatán a 'ay yunnal Merib-baal, smam Micaía.

⁴¹ Ax eb' yunnal Micaía: atn Pitón, Melec, Tarea yet' Acaz.

⁴² A Acaz a 'ay yunnal Jara, ax Jara a 'ay yunnal Alemet, Azmavet yet' Zimri, ax Zimri a 'ay yunnal Mosa.

⁴³ Ax Mosa a 'ay yunnal Bina, Refaías, Elasa yet' Azel.

⁴⁴ Wacwn̈ sb'ey eb' yunnal Azel: atn Azricam, Bocru, Ismael, Searías, Obadías yet' Hanán.