1 Cr 7 - Chuj San Sebastian Bible

Eb' yin̈tl Isacar

¹ Chan̈wn̈ sb'ey eb' yunnal Isacar: atn Tola, Fúa, Jasub yet' Simrón.

² A eb' yunnal Tola: atn Uzi, Refaías, Jeriel, Jahmai, Jibsam yet' Samuel. A eb' cha, yajl yaj eb' 'a eb' yin̈tl Tola. A jun tzo'n̈ eb' 'anma cha, caw wal jeln eb' ya'n owal. A 'a yol stiempoal David, a sb'isl smasnil eb' yin̈tl eb', 'ix q'ue'ch 'a 22,600.

³ A yunnal Uzi, atn Israhías, ax eb' yunnal Israhías: atn Micael, Obadías, Joel yet' Isías. Own̈ eb' 'a smasnil, yajln̈ej yaj eb'.

⁴ Yujto til wal yistzil eb', yunnal eb', yuj cha, niwn sb'isl yin̈tl eb'. 'Ay 36 mil eb' soldado to caw jeln ya'n owl 'a eb'.

⁵ A sb'isl eb' winc 'a junjn c'aj eb' yin̈tl Isacar, 'ay 87 mil eb' winc 'a smasnil, caw jeln eb' 'a owal.

Eb' yin̈tl Benjamín

⁶ 'Oxwn̈ sb'ey eb' yunnal Benjamín: atn Bela, Bequer yet' Jediael.

⁷ Ax eb' yunnal Bela, own̈ sb'ey eb': atn Ezbón, Uzi, Uziel, Jerimot yet' Iri. Smasnil jun tzo'n̈ eb' cha, yajl yaj eb' 'a junjn c'aj eb' yin̈til, caw jeln pax eb' ya'n owal. A tzyal jantc 'ix 'aj sb'isx 'el yin̈tl eb' 'a smasnil, 'ay 22,034 soldado.

⁸ Eb' yunnal Bequer: atn Zemira, Joás, Eliezer, Elioenai, Omri, Jerimot, Abías, Anatot yet' Alemet. Smasnil jun tzo'n̈ eb' tic yunnal Bequer eb'.

⁹ A tzyal jantc 'ix 'aj sb'isl smasnil yin̈tl eb' 'a junjn macan̈, eb' to yajl yaj 'a eb', yet' 20,200 soldado caw te'n 'a owal.

¹⁰ A yunnal Jediael, atn Bilhán, ax eb' yunnal Bilhán: atn Jeús, Benjamín, Aod, Quenaana, Zetán, Tarsis yet' Ahisahar.

¹¹ Smasnil jun tzo'n̈ eb' tic, yunnal Jediael eb', yajl yaj eb' 'a junjn macn̈ yin̈til, caw jeln eb' 'a owal, 'ay 17,200 soldado.

¹² Ax eb' yunnal Ir, atn Supim yet' Hufam. A yunnal Aher, atn Husim.

Eb' yin̈tl Neftalí

¹³ A eb' yunnal Neftalí: atn Jahzeel, Guni, Jezer yet' Salum. A eb' tic yin̈tl can Jacob yet' 'ix Bilha.

Eb' yin̈tl Manasés

¹⁴ Eb' yunnal Manasés yet' 'ix schab'l 'istzil, 'ix 'aj Siria; atn Asriel yet' Maquir, smam Galaad.

¹⁵ A Maquir cha, 'ix nupn yet' 'ix Maaca, a jun 'ix cha, ata cotnc yin̈tl 'a scal eb' yin̈tl can Hufam, yet' Supim. Ax junx yunnal Maquir, atn Zelofehad, a Zelofehad cha, cojn yisl 'ay.

¹⁶ Ax 'ix Maaca yistl Maquir, 'ay chawn̈ swinc 'une 'ix, jun xyac' 'ix sb'ic Peres, ax jun xo, 'ix yac' sb'ic Seres, ax eb' yunnal Peres, atn Ulam yet' Regem.

¹⁷ Ax yunnal Ulam, atn Bedán. Atn jun tzo'n̈ eb' yin̈tl Galaad tic, yunnal Maquir, yixchicn Manasés eb'.

¹⁸ A 'ix yanb' Maquir, atn 'ix Hamolequet, atn snun Isod, Abiezer yet' Mahala.

¹⁹ Eb' yunnal Semida, atn Ahián, Siquem, Likhi yet' Aniam.

Eb' yin̈tl Efraín

^20-21 A eb' yin̈tl Efraín tzb'ey cot 'a stzolil: atn Sutela, Bered, Tahat, Elada, Tahat, Zabad, Sutela. 'Ay chawn̈ xo yunnal Efraín, atn Ezer yet' Elad. 'Ix xit' eb' yelc' scajb'en noc' eb' cajn 'a yol yic Gat, yuj cha, 'ix milx cham eb' yuj eb' 'aj Gat cha.

²² A Efraín, atn smam eb', caw niwn tiempo 'ix cusi, yuj cha, 'ix jaw eb' yican wul yac' sniwnal sc'ojol.

²³ Xlajw cha, 'ix 'alj junx yunnal Efraín yet' yistzil, xya'n sb'ic Beriá, yujto 'ix 'ec' jun niwquil cusc'ojlal 'a yib'n̈ eb'.

²⁴ A 'ix Seera yisl Bería, sb'o chan̈ 'ix jun chon̈b' Bet-horón 'ay 'a yaln̈ 'emta yet' junx chon̈b' Bet-horón 'ay 'a yib'n̈ q'ue'i, yet' pax chon̈b' Uzen-seera.

^25-27 A eb' yin̈tl Bería tzb'ey cot 'a stzolil: atn Refa, Résef, Telah, Tahán, Laadan, Amihud, Elisama, Nun yet' Josué.

²⁸ A slum eb' 'aj cajan, atn Bet-el, Naarán 'a stojlal 'aj tzq'uel c'u, Gezer 'a stojlal 'aj tz'em c'u, yet' pax Siquem masnto 'a lum Ayah. Smasnil jun tzo'n̈ chon̈b' tic 'ix can 'a eb' yet' yaldeail.

²⁹ A 'a yol yic Manasés, ata 'ay chon̈b' Bet-seán, Taanac, Meguido yet' Dor, yet' smasnil yaldeail jun jun. Atn 'a jun tzo'n̈ lugar chi 'ix can cajn eb' yin̈tl José, win yunnal can Israel.

Eb' yin̈tl Aser

³⁰ A eb' yunnal Aser: atn Imna, Isúa, Isúi, Bería yet' 'ix yanb' eb', atn 'ix Sera.

³¹ A eb' yunnal Bería: atn Heber yet' Malquiel smam Birzavit.

³² A Heber a 'ay yunnal Jaflet, Somer, Hotam yet' 'ix Súa atn 'ix yanb' eb'.

³³ A eb' yunnal Jaflet: atn Pasac, Bimhal yet' Asvat.

³⁴ A eb' yunnal Semer, win yu'tac Jaflet: atn Ahí, Rohga, Jehuba yet' Aram.

³⁵ A eb' yunnal Helem yu'tac Semer: atn Zofa, Imna, Seles yet' Amal.

^36-37 A eb' yunnal Zofa: atn Súa, Harnefer, Súal, Beri, Imra, Beser, Hod, Sama, Silsa, Itrán yet' Beera.

³⁸ A eb' yunnal Jeter: atn Jefone, Pispa yet' Ara.

³⁹ A eb' yunnal Ula: atn Ara, Haniel yet' Rezia.

⁴⁰ Smasnil jun tzo'n̈ eb' tic, yin̈tln̈ej Aser eb'. Yajl yaj eb' 'a yib'n̈ eb' yican, caw niwn yel'ch eb', sic'b'il 'el eb', caw jeln eb' 'a owal. A tzyal x'aj stz'ib'xi, 'ay 26 mil soldado 'a scal eb'.