1 Cr 4 - Chuj San Sebastian Bible

Eb' yin̈tl Judá

¹ Ax eb' yunnal Judá: atn Fares, Hezrón, Carmi, Hur yet' Sobal.

² A Sobal, a 'ay yunnal Reaía, ax Reaía a 'ay yunnal Jahat, ax Jahat a 'ay yunnal Ahumai yet' Lahad. A jun macn̈ eb' tic zoratitan̈ej eb'.

^3-4 Eb' yunnal Hur: atn Etam, Jezreel, Isma, Idbás. 'Ay pax jun yanb' eb', Haze-lelponi sb'i. 'Ayt jun tzo'n̈ yu'tac eb': atn Penuel, smam Gedor, Eser, smam 'ichm Husa. Atn jun tzo'n̈ eb' tic, sb'ab'l 'unnal Efrata, smam 'ichm eb' 'aj Belén.

⁵ A Asur, atn smam Tecoa, 'ay chawn̈ yistzil, atn 'ix Hela yet' 'ix Naara.

⁶ A eb' yune 'ix Naara: atn Ahuzam, Hefer, Temeni yet' Ahastari.

⁷ Ax eb' yune 'ix Hela: atn Seret, Jezoar yet' Etnán.

⁸ A Cos, a 'ay yunnal Anub yet' Zobeba, atn smam 'ichm eb' yin̈tl Aharhel, yunnal Harum.

⁹ A Jabes cha, 'ixtc 'ix 'ajx sb'ic yuj snun yujto 'ix yal 'ix 'ixtic: Yet' wal yailal x'aj yalj jun wune tic, xchi 'ix. Caw niwn yel'ch Jabes cha 'a yib'n̈ eb' yu'tac.

¹⁰ 'Ix leslwi win 'a qui Diosalec an̈ israel on̈c tic, 'ix yalni: Tzin tew 'aych Mamin, to tzac' a yaxilal 'a wib'an̈. Tzin nib'j to niwquil in lu'um, tzin nib'j tzach 'och pax wet'oc, yic tzin a coln 'el 'a yailal, sec wach' matz in 'ixtxi, xchi 'a slesal. Ax Dios 'ix 'a'n tas 'ix sc'an cha.

A junc'aj xo eb' 'anma'

¹¹ A Quelub, yu'tac Súa, a 'ay yunnal Mehir, ax Mehir, a 'ay yunnal Estón.

¹² Ax Estón a 'ay yunnal Bet-rafa, Paseah yet' Tehina. A Tehina tic, a xb'on chan̈ jun chon̈b' Nahas. Atn eb' tic cajn 'a chon̈b' Reca.

¹³ Ax eb' yunnal Cenaz, atn Otoniel yet' Seraías. Eb' yunnal Otoniel, atn Hatat,

¹⁴ yet' Meonotai. A Meonotai, a 'ay yunnal Ofra. A Seraías, a 'ay yunnal Joab, atn smam 'ichm eb' cajn 'a lum pan̈n yic Carisim. 'Ixtnta sb'i jun lugar cha, yujto 'a eb' 'anma cajn ta', tzb'o eb' jun tzo'n̈ tas to wach' yilxi.

¹⁵ Ax eb' yunnal Caleb, win yunnal Jefone: atn Iru, Ela yet' Naam; ax Ela a 'ay yunnal Cenaz.

¹⁶ A eb' yunnal Jehaleel, atn Zif, Zifa, Tirías yet' Asareel.

^17-18 Eb' yunnal Esdras, atn Jeter, Meder, Efer yet' Jalón. A Meder cha, 'ix nupn yet' 'ix Bitia yisl faraón, ax eb' yunnal, atn María, Samai yet' Isba, atn smam 'ichm eb' 'aj Estemoa. An̈jtona', a Meder cha, 'ay junx yistzil, 'aj Judá 'ix. Atn eb' yunnal tic yet' 'ix: Jered smam 'ichm eb' 'aj Gedor, yet' Heber smam 'ichm eb' 'aj Soco, yet' pax Jecutiel, smam 'ichm eb' 'aj Zanoa.

¹⁹ Ax 'ix yistzil Hodías yanb' Naham, a yunnal eb': atn smam Keila win garmita, atn smam pax Estemoa win maacateo.

²⁰ Ax eb' yunnal Simón: atn Amnón, Rina, Ben-hanán yet' Tilón. A eb' yunnal Isi: atn Zohet yet' Ben-zohet.

²¹ Ax eb' yin̈tl Sela, yunnal Judá, atn Er smam Leca yet' Laada. A 'ay yunnal Maresa, smam 'ichm eb' tzmunlj 'a b'oj lino 'a Bet-asbea,

²² yet' Joacim, yet' eb' cajn 'a chon̈b' Cozeba, yet' Joás yet' pax Saraf. A eb' tic 'ix yac' yajlil 'a chon̈b' Moab. Xlajw cha, 'ix meltzj pax eb' 'a Belén, 'ixta yaln eb' 'ajtz'ib' yic pecti'.

²³ A jun tzo'n̈ eb' cha, tz'acm eb'. Ata 'e'nc cajn eb' 'a Netaim yet' 'a Gedera, 'ix 'a'w servil eb' 'a win rey.

Eb' yin̈tl Simeón

²⁴ Eb' yunnal Simeón: atn Nemuel, Jamín, Jarib, Zera yet' Saúl.

²⁵ A Saúl a 'ay yunnal Salum, a Salum a 'ay yunnal Mibsam, a Mibsam, a 'ay yunnal Misma.

²⁶ Ax Misma a 'ay yunnal Hamuel, a Hamuel a 'ay yunnal Zacur, a Zacur a 'ay yunnal Simei.

²⁷ Waclajn̈wan̈ yunnal Simei, wacwn̈ pax yisil. Ax pax eb' yu'tac, man̈ niwnoc yunnal eb', yuj cha, matz q'uib' sb'isl eb' 'icha eb' yin̈tl Judá.

²⁸ 'Ix 'ec' cajn eb' 'a chon̈b' Beerseba, 'a Molada, 'a Hazar-sual,

²⁹ 'a Bilha, 'a Ezem, 'a Tolad,

³⁰ 'a Betuel, 'a Horma, 'a Siclag,

³¹ 'a Bet-marcabot, 'a Hazar-susim, 'a Bet-birai yet' 'a Saaraim. Atn jun tzo'n̈ schon̈b' eb' tic, masnto yic 'ix 'och David reyal.

³² 'Ayt pax o'e xo schon̈b' eb': atn Etam, Ain, Rimón, Toquén yet' Asán,

³³ yet' smasnil yaldeail jun tzo'n̈ chon̈b' cha, masnto 'a Baalat. Atn 'a jun tzo'n̈ lugar chi 'aj cajn eb'. Atn slistail sb'i yin̈tl eb' tic.

^34-38 Mesobab, Jamlec, Josías, yunnal Amasías, Joel, Jehú yunnal Josibías yixchicn Seraías, a Seraías tic yunnal Asiel yet' Elioenai, Jaacoba, Jesohaía, Asaías, Adiel, Jesimiel, Benaía, yet' Ziza. A Ziza tic yunnal Zifi yixchicn Alón, atn yunnal Jedaías yixchicn Simri. A Simri tic yunnal Semaías. A jun tzo'n̈ eb' xb'inax sb'i tic, atn eb' yajl yaj 'a junjn macn̈ yin̈tl eb'. Caw wal 'ix q'uib' sb'isl yin̈tl eb'.

³⁹ 'Ix c'och eb' 'a 'aj tzon̈ 'och 'a Gedor, 'a stojlal 'aj tzq'uel c'u 'a jun pan̈n 'a'lic, yic tzsayn 'ec' eb' te c'ultc caw yax 'aj tzwa scalnelu.

⁴⁰ Ata x'ilchj te c'ultc caw yax yuj eb', caw wach' te', til wal pax te'. Caw lewn sat jun lum cha. Junc'ojlal xoj yaj eb', may tas tz'i'n eb'. Ata 'e'nc cajn eb' yin̈tl Cam 'a yaln̈taxi.

⁴¹ Palta a 'a yol stiempoal Ezequías sreyl Judá, ata xjaw jun tzo'n̈ eb' tox 'ix b'inax sb'i tic. 'Ix satx 'el eb' 'anma cajn ta yuj eb', yet' scamplamento eb', yet' pax yatut eb', jun 'ejmn̈ej 'ix sat 'ejm smasnil, masnto ticnec. A eb' xcajn can slum eb' cha, yujto caw 'ay te c'ultc caw yax 'aj wach' swa scajb'en noc' eb'.

⁴² An̈jtona', 'ayt pax junx o'e ciente eb' winc 'a yin̈tl Simeón 'ix c'och cajn 'a lum jolm witz 'a yol yic Seir, ax eb' yunnal Isi, atn Pelatías, Nearías, Refaías yet' Uziel, atn eb' 'aych scapitan̈oc eb'.

⁴³ A eb' chi 'ix 'a'n lajwc 'el eb' amalecita cajnto 'ec' ta'. Ax eb' xcann̈j cajn ta'.