1 Cr 29 - Chuj San Sebastian Bible

¹ Xlajw cha, 'ix yaln rey David 'ixtc 'a smasnil eb' 'anma yamn cha: Cojn jun wunnal Salomón tic 'ix si'x can 'el yuj Dios, caw quelm 'unn to, ax jun munljel tic, caw niwquil, yujto a jun n̈a cha, man̈ jantcoc swach'l yilx 'oj 'ajoc, man̈ sdespachooc junc winac, palta to yatut Jehová Dios.

² An tic, yet' wal smasnil wip 'ix in yamb'tzan can smasnil tas 'oj c'anxc 'a yatut qui Diosalec: atn q'uen oro, q'uen plata, q'uen bronce, q'uen hierro yet' pax te te', a tzyal tas 'oj c'anxc 'a junjn macn̈ munljel. Yet' pax q'uen ónice, eb' q'uen wach' yilxi, eb' q'uen q'uic' q'ue'en, eb' q'uen chucchc yilxi, yet' smasnil junjn macn̈ q'uen chan̈ stojol, caw niwn pax q'uen mármol.

³ An̈jtona', yujn̈ej pax to 'ay in niwquil chamc'ojlal 'a yatut in Diosal cha, yuj cha, tzin siyj q'uen oro, q'uen plata to mun wico', an̈jtona', 'ix in yamb'tzej can smasnil tas 'oj c'anxc 'a yatut qui Diosal cha.

⁴ Tzwac' 2,300 quintal q'uen oro caw wach', yet' 5,300 quintal q'uen plata caw wach' yaj sb'o'i, yic tz'och 'a sat yich n̈a,

⁵ yet' 'a tzann̈j munljel 'oj sb'o eb' munljum 'a q'uen oro mto 'a q'uen plata. Ax ticnec jun, mach ex wal tz'el 'a e c'ojl eya'n eyofrenda 'a Jehová ticnec, tztac' eya'ni, xchi win rey.

⁶ Xlajw cha, ax eb' yajl yaj 'a scal eb' yican, yet' eb' yajl yaj 'a junjn 'in̈tal eb' yit israelal, yet' eb' yajl yaj 'a junjn mil soldado, mto 'a junjn ciente soldado, yet' smasnil eb' yajl yaj 'a smasnil munljel tzb'o yuj win rey, 'ix 'el wal 'a sc'ojl eb' ya'n scolwal.

⁷ 'Ix yac' eb' yico' yic tzb'o yatut Dios, 3,800 quintal q'uen oro, 7,600 quintal q'uen plata, 13,500 quintal q'uen bronce, yet' pax 75 mil quintal q'uen hierro.

⁸ Yet' pax eb' 'a 'aj 'ay q'uen q'uen wach' yilx 'ay 'a 'a, 'ix yac' eb' 'a Jehiel yin̈tl Gersón, yujto a 'ajcuenta smoln jun tzo'n̈ yamc'ab' tzc'anx 'a yatut Dios.

⁹ Caw 'ix tzalj smasnil eb' 'anma', yuj jun tzo'n̈ tas 'ix 'el 'a sc'ojl eb' yajl chi ya'ni, yujto yet' wal smasnil sc'ojl eb', 'ix ya'n eb' 'a Jehová. An̈jtona', caw 'ix tzalj pax rey David yet' eb'.

¹⁰ Yuj cha, 'ix yaln rey David wach' paxti 'a Jehová 'a sat smasnil eb' chon̈b' cha, 'ix yaln 'ixtic: Mamin Jehová, qui Diosal ach yet' qui mam 'ichm Israel on̈, alx cab' wach' paxti 'aych 'a smasnil tiempo.

¹¹ Ec yaj jun tzo'n̈ tic, caw niwn el'chi, caw 'ay a poder, tzictzni elxi, ach 'ay ec smasnil tas, rey ach paxi, yujto a smasnil tas 'ay 'a satcha'an̈ yet' 'a sat lum tic, ec yaji. Mamin Jehová, ach yajl ach 'a yib'n̈ smasnil.

¹² A 'aych tzcot smasnil ricoal yet' yic tzon̈ 'ijx cha'an̈, ach tzac' mandar 'a yib'n̈ smasnil. A 'a yol a c'ab' 'ay te'nal yet' jelnal, ach tztac' alni to niwn quel'chi, tza'n qui jelnal 'a smasnil.

¹³ Yuj cha, a ticnec, ach qui Diosal on̈, tzcal yuj diosal 'ayach, tzcaln pax qui wach' paxti 'a a b'i to wach' yochi.

¹⁴ Wal yel, an tic yet' eb' wit chon̈b' tic, caw may jac tas tztac' tzqui siyj 'ayach, yujto smasnil jun tzo'n̈ tic a 'aych tzcoti. Yuj cha, cojn tas tzqui chaj 'ayach, a tzcac' pax 'ayach.

¹⁵ Yujto an̈ tic on̈, 'e'lb'a quec' 'a a sat on̈, lajn quec' 'icha 'e'nc smasnil eb' qui mam quichm on̈; a qui q'uinl 'a sat lum lum tic on̈, lajn 'icha xob' lum lu'um, caw yajn̈ej tz'eq'ui.

¹⁶ Mamin Jehová, ach qui Diosal on̈, ec yaj smasnil jun tzo'n̈ ricoal tic. A 'aych tzcot smasnil jun tzo'n̈ 'ix qui yamb'tzej tic, yic tzqui b'on junc n̈a 'a a b'i yuj ach qui'n cha'an̈.

¹⁷ Wojc wal ach in Diosal, to tza b'eyc'ojlej qui nab'en, caw tzchaj a c'ojl tojlal. Yuj cha, an tic yet' in tojl nab'enal tzwa'n jun tzo'n̈ tic. A ticnec caw tzin tzalj wilni to a smasnil eb' a chon̈b' yamn 'a tic, wal 'a smasnil sc'ojl eb' 'ix ya'n eb' yofrenda 'ayach.

¹⁸ Mamin Jehová, qui Diosal ach yet' Abraham, yet' Isaac yet' pax Israel, atn eb' qui mam quichm on̈, 'ac' jawc 'a snab'en eb' a chon̈b' tic, 'el cab' 'a sc'ojl eb' ya'nn̈ej yico', 'ac' wal ya'chn̈ej eb' sc'ojl 'ayach.

¹⁹ An̈jtona', tzac' wach' nab'enal 'a ni wunnal Salomón tic, sec wach' 'oj syiclc ni smasnil a checnb'il, a cuynb'il yet' pax a ley, ax sb'eylb'an ni smasnil, sec wach' 'oj stac' sb'on chan̈ ni jun n̈a man̈x jantcoc swach'l yilx 'ix in yamb'tzej can syamc'ab'il tic, xchi rey David 'a Dios.

²⁰ Xlajw cha, 'ix yaln David 'ixtc 'a smasnil eb' 'anma': A ticnec ex wit chon̈ab', alc wach' paxti 'a Jehová qui Diosalec, xchi. Xlajw cha, 'ix yaln smasnil eb' 'anma wach' paxti 'a Dios, atn sDiosal eb' yet' smam yicham. 'Ix 'em cumn eb' 'a yojltac Dios yic 'ayc' eb' 'a yojltac win rey cha.

'Ochnc Salomón reyal

²¹ Ax 'a junx c'u 'ix yac' eb' no xajmb'al yet' pax no xajmb'al to tz'a smasnil 'a Jehová: Jun mil no quelm wacax, jun mil no mam calnelu, yet' pax jun mil no quelm calnelu, yet' yal uva tz'ajx xon 'a yic tz'ajx junjn macn̈ no xajmb'al tz'ajx yuj eb'.

²² A 'a yic jun c'u cha, 'ix wa eb', 'ix yu'n eb' tas tzyu'j 'a tzaljc'ojlal 'a yojltac Jehová. Xlajw cha, 'ix swach' 'a'n 'och eb' Salomón reyal, atn yunnal David. 'Ix ya'n q'ue eb' aceite 'a sjolm 'a yojltac Jehová, yic tz'och sreyloc eb', 'ix ya'n q'ue pax eb' aceite 'a sjolm Sadoc yic tz'och sat ya'malc 'och sti eb' 'a Dios.

²³ 'Ixtnta 'ix 'aj yochcn Salomón reyl 'a sdespacho Jehová sjelc David, atn smam. Caw wach' 'ix 'el'ch yet' yopiso cha, 'ix syiclj smasnil eb' israel 'a 'a.

²⁴ Ax smasnil eb' yajl yaji yet' eb' soldado, yet' pax jun tzo'n̈ xo eb' yunnal rey David, 'ix yac' eb' sti syiclni 'a rey Salomón.

²⁵ 'Ix 'ijx chan̈ sb'inab'ilal win yuj Jehová 'a sat smasnil eb' yit israelal, caw rico x'aj 'el'ch winac. Caw niwn x'aj 'el'ch 'a yopiso chi yu'uj, mant 'a xon junc sreyl chon̈b' Israel sb'inax 'icha rey Salomón tic.

Schaml rey David

²⁶ A David yunnal Isaí, 'ix yac' reyl 'a yib'n̈ smasnil chon̈b' Israel.

²⁷ Chawinc ab'il 'ix yac' reyal; uque ab'il 'ix yac' reyl 'a chon̈b' Hebrón, 33 ab'il 'ix yac' reyl 'a Jerusalén.

²⁸ Caw 'ichm winc xo sq'uinlani, 'ix cham 'a tzaljc'ojlal, caw rico si'mb'il, niwn pax yel'chi. Ax Salomón, atn yunnal, a x'ochcn reyl sjeloc.

²⁹ A yab'xil tas sb'ojnac rey David cha, yictax 'ix 'el yich masnto 'a slajub', ata tz'ib'b'il can 'a eb' ch'an̈ libro tz'ib'b'il can yuj eb' schecb' Dios, atn Samuel, Natán, yet' pax Gad.

³⁰ A eb' 'oxwn̈ tic 'ix tz'ib'n smasnil tas 'ix sb'o David 'a yic 'aych reyal, yuj tas tztac' yu'uj, yet' pax tas 'ix 'ec' 'a yib'an̈, yet' 'a yib'n̈ chon̈b' Israel, yet' 'a yib'n̈ jun tzo'n̈ xo nacion̈ 'a stz'ey.