1 Cr 27 - Chuj San Sebastian Bible

Smacquiltacl eb' soldado*r* 'a yol smacb'en rey David

¹ A jun tic, slistail eb' sat yajl yaj 'a yib'n̈ eb' yican. Yajl yaj eb' 'a yib'n̈ eb' syajlil mil soldado, 'a yib'n̈ eb' syajlil jun ciente soldado, atn eb' ya'mal servil win rey, yic tzyiln eb' junjn macn̈ eb' soldado tz'och yilmalc win rey 'a junjn 'uj. Macquiltac yoch eb' 'a yol junjn ab'il. A 'a junjn macan̈ 'ay 24 mil winac.

^2-3 A syajlil eb' tz'och 'a yopiso 'a b'ab'l 'uj: atn Jasobeam, yunnal Zabdiel, yin̈tl Fares.

⁴ A syajlil eb' tz'och 'a yopiso 'a yic schab'l 'uj: atn Dodai win ahohíta, ax Miclot a schab'l yajl yaji.

^5-6 A syajlil eb' tz'och 'a yopiso 'a yic yoxl 'uj: atn Benaía, yunnal Joiada win ya'mal 'och sti eb' 'anma 'a Dios. A Benaía cha, caw yel xo jeln 'a scal eb' 30 jeln cha, a yajl yaj 'a yib'n̈ eb'. Ax Amisabad, atn yunnal, a schab'l yajl yaj 'a jun macn̈ eb' cha.

⁷ A syajlil eb' tz'och 'a yic schan̈l 'uj: atn Asael yu'tac Joab, ax Zebadías atn yunnal a x'ochcn yajlil sjelc smam cha.

⁸ A syajlil eb' tz'och 'a yic yol 'uj: atn Samhut win izraita.

⁹ A syajlil eb' tz'och 'a yic swacl 'uj: atn Ira, yunnal Iques 'aj chon̈b' Tecoa.

¹⁰ A syajlil eb' tz'och 'a yic yucl 'uj: atn Heles 'aj Pelón, yin̈tl Efraín.

¹¹ A syajlil eb' tz'och 'a yic swajxquil 'uj: atn Sibecai 'aj Husa, yin̈tl Zera.

¹² A syajlil eb' tz'och 'a yic sb'aln̈il 'uj: atn Abiezer 'aj Anatot, yin̈tl Benjamín.

¹³ A syajlil eb' tz'och 'a yic slajn̈il 'uj: atn Maharai 'aj Netofa, yin̈tl Zera.

¹⁴ A syajlil eb' tz'och 'a yic yuxlchil 'uj: atn Benaía 'aj Piratón, yin̈tl Efraín.

¹⁵ A syajlil eb' tz'och 'a yic slajchwil 'uj: atn Heldai 'aj Netofa, yin̈tl Otoniel.

¹⁶ Ax eb' yajl yaj 'a yib'n̈ junjn macn̈ eb' yin̈tl Israel atn eb' tic: a Eliezer yunnal Zicri, a yajl yaj 'a yib'n̈ eb' yin̈tl Rubén, ax 'a eb' yic Simeón, atn Sefatías yunnal Maaca;

¹⁷ 'a eb' yic Leví, atn Hasabías, yunnal Kemuel; ax 'a eb' yin̈tl Aarón, atn Sadoc;

¹⁸ 'a eb' yin̈tl Judá, atn Eliú, jun yu'tac David: ax 'a eb' yic Isacar, atn Omri, yunnal Micael;

¹⁹ 'a eb' yic Zabulón, atn Ismaías, yunnal Abdías: ax 'a eb' yic Neftalí, atn Jerimot, yunnal Azriel.

²⁰ 'A eb' yic Efraín, atn Oseas, yunnal Azazías: ax 'a eb' spacl yic Manasés, atn Joel, yunnal Pedaías;

²¹ ax 'a junx spacl eb' yic Manasés, 'a yol yic Galaad, atn Iddo, yunnal Zacarías; 'a eb' yic Benjamín, atn Jaasiel, yunnal Abner;

²² ax 'a eb' yic Dan, atn Azareel, yunnal Jeroham. Atn jun tzo'n̈ eb' tic yajl yaj 'a yib'n̈ junjn macn̈ eb' yin̈tl Israel.

²³ A David ma'ix yij chan̈ sb'isl eb' to 'ayt stz'acw 'a sjunc'lil ab'il sq'uinal, yujto tox 'ix yac' Jehová sti', to 'oj q'uib' sb'isl eb' israel 'icha sb'isl c'anal 'a satcha'an̈.

²⁴ A Joab yune 'ix Sarvia, 'ix chaj 'el yich yi'n chan̈ sb'isl eb', palta ma'ix lajw yi'n cha'an̈, yujto 'ix yij cot jun sb'isl eb' chi jun niwquil yailal 'a yib'n̈ chon̈b' Israel. Yuj cha, man̈ tz'ib'b'ilc sb'isl eb' 'a ch'an̈ libro yic yab'xil rey David.

²⁵ A Azmávet, yunnal Adiel, a molm tumn yaj 'a win rey, ax Jonatán, yunnal Uzías, a 'ajcuenta yiln jantcn̈ej tas molb'il 'a sat lum lum tz'awxi, yet' 'a jun tzo'n̈ xo chon̈ab', yet' 'a yaldeail yet' pax jun tzo'n̈ cuartel 'ay 'a sti mon̈jon.

²⁶ Ax pax mach tz'iln eb' tzmunlj 'a sat lum lu'um, atn Ezri, yunnal Quelub.

²⁷ A mach 'ajcuenta yiln te uva, atn Simei 'aj Ramat. Ax mach tzmoln yal uva 'a yet'ul, atn Zabdi 'aj Sefam.

²⁸ A mach 'aych yiln te olivo yet' te calte'al higo 'ay 'a lum pan̈n 'a'lic, atn Baal-hanán 'aj Gedera. Ax pax mach tzmoln aceite 'a yet'ul, atn Joás.

²⁹ A mach tz'iln no wacx 'a lum Sarón, atn Sitrai, 'aj Sarón cha. Ax mach tz'iln no wacx 'ay 'a lum pan̈n 'a'lic, atn Safat, yunnal Adlai.

³⁰ A mach tz'iln no cameyo, atn Obil, win ismaelita. Ax mach tz'iln no axna, atn Jehedías, 'aj Meronot.

³¹ Ax mach tz'iln no calnelu, atn Jaziz, win agareno. A smasnil jun tzo'n̈ eb' tic, atn eb' tz'iln smasnil tas 'ay 'a win rey David.

³² A Jonatán, yican David, caw jelan, cuywnac, 'a'm nab'en yaj 'a win rey. Ax Jehiel, yunnal Hacmoni, a 'ajcuenta yiln eb' yunnal win rey cha.

³³ A Ahitofel ya'mal snab'en win rey yaji, ax Husai, win arquita caw swach'c'ojl sb'a win rey yet'oc.

³⁴ A yic 'ix cham Ahitofel cha, ax Joiada yunnal Benaía 'ix 'ochcn sjeloc yet' pax Abiatar. Ax Joab comandante yaj 'a yib'n̈ eb' soldado win rey.