1 Cr 26 - Chuj San Sebastian Bible

Eb' tan̈m puerta*r* yet' jun tzo'n̈ xo eb' 'ay yopiso

¹ An̈jtona', stzol-l 'ix 'aj spojx 'ec' eb' tan̈m puerta, 'ixtc 'ix 'aji: A eb' yic Coré: atn Meselemías, yunnal Coré, yin̈tl Ebiasaf.

^2-3 Eb' yunnal Meselemías 'a stzolil: atn win Zacarías, Jediael, Sebadías, Jatniel, Elam, Johanán, yet' Elieonai.

^4-5 'Ix yac' Dios syaxilal 'a yib'n̈ Obed-edom, yuj cha, caw niwn yunnal. Atn eb' yunnal tic 'a stzolil: Semaías, Jozabad, Joa, Sacar, Natanael, Amiel, Isacar, yet' Peultai.

⁶ A Semaías yunnal Obed-edom, 'ay eb' yunnal to caw wal jelan, caw te'n pax eb', yuj cha, a eb' yajl yaj 'a yib'n̈ eb' yin̈til.

⁷ A eb' yunnal Semaías cha, atn Otni, Rafael, Obed, Elzabad, Eliú yet' Samaquías, caw jeln eb'.

⁸ A smasnil jun tzo'n̈ eb' tic, yin̈tln̈ej Obed-edom eb', yet' yunnal eb', yet' pax yican sb'a eb', 'ay yip eb' smunlji. 'Ay 62 sb'isl eb'.

⁹ Eb' yunnal Meselemías yet' eb' yican, wajxclajn̈wan̈ sb'isl eb', caw jeln eb'.

¹⁰ A eb' yunnal Hosa atn yin̈tl Merari: a Simri, a yajl yaji, wach'xam man̈oc b'ab'l 'unnab'il yaji, palta a smam a 'ix 'a'n 'och yajlil.

¹¹ Win schab'il Hilcías, win yoxil Tebalías, win schan̈il Zacarías. Eb' yunnal Hosa, yet' eb' yican, 'oxlajn̈wan̈ sb'ey eb' 'a smasnil.

¹² 'Ix pojx 'ec' eb' tan̈m puerta yic yatut Jehová, yet' eb' yajl yaj 'a eb', 'icha ya'jnac jun tzo'n̈ xo eb' yit levitail eb'.

¹³ Suerteal 'ix 'aj sch'oxxi, tas puertail tztan̈wj junjn macn̈ eb', eb' 'ichmtac winac yet' eb' quelem, a tzyal yin̈tl eb'.

¹⁴ A x'aj yel-l suerte Selemías, ata xcan tan̈j puerta 'a stojlal 'aj tzq'uel c'u, ax Zacarías atn yunnal, win tztac' ya'w nab'en, ata xcan tan̈j puerta 'a stojlal norte.

¹⁵ Ax pax Obed-edom, ata xcan tan̈j puerta 'a stojlal sur, ax eb' yunnal, a eb' xcan stan̈wc yatutal 'aj tzmolx tas 'a yatut Dios.

¹⁶ A Supim yet' Hosa, a eb' xcan tan̈j puerta 'a stojlal 'aj tz'em c'u, yet' jun puerta yic Salequet 'a 'aj tzq'uel b'e. A eb' 'aych yet' eb' tzjucb'tzan cha, stzol-l tzyutj eb' stan̈wni puerta cha.

¹⁷ 'A junjn c'u wacwn̈ eb' levita tztan̈wni puerta 'a stojlal 'aj tzq'uel c'u, chan̈wn̈ 'a stojlal norte, chan̈wn̈ pax 'a stojlal sur, ax chatcwan̈ tztan̈wni spuertail yatutal 'aj tzmolx tas 'a yatut Dios.

¹⁸ A 'a yamq'uil yatutal 'aj tzmolx jun tzo'n̈ yamc'ab', 'a stojlal 'aj tz'ejm c'u, chan̈wn̈ tztan̈wni 'a sti b'e, ax chawn̈ xo tztan̈wni 'a scoredoral cha.

¹⁹ 'Ixtnta 'ix 'aj spojx 'ec' yopiso eb' tan̈m puerta cha, atn eb' yin̈tl Coré yet' eb' yic Merari.

²⁰ 'Ay pax jun tzo'n̈ xo eb' yit levitail eb' 'aych 'a yib'n̈ yiln 'aj tzmolx tas 'a yatut Dios, yet' pax yet'l 'aj 'ay ofrenda to yic Jehová yaji.

²¹ A Jehiel yunnal Laadan, yin̈tl Gersón, a yajl yaj 'a scal eb' yican.

²² A eb' yunnal Jehiel cha, atn Zetam yet' Joel. A eb' 'aych 'a yib'n̈ yiln tas molb'il 'a yatut Jehová.

²³ 'Ix 'ajx pax yopiso eb' yin̈tl Amram, Izhar, Hebrón yet' Uziel.

²⁴ 'A scal eb' yin̈tl Amram, a Sebuel yin̈tl Gersón yunnal Moisés, yajl yaj 'a yib'n̈ yiln jantcn̈ej tas 'ay 'a yatut Dios.

²⁵ A Sebuel tic yican sb'a yet' Selomit, yujto a smam yichm Selomit cha, atn Eliezer yu'tac Gersón. A eb' smam yichm Selomit 'a stzolil, atn Eliezer, Rehabías, Isaías, Joram yet' Zicri.

²⁶ A Selomit yet' eb' yu'tac, a eb' 'aych 'a yib'n̈ yiln smasnil tas to 'ac'b'il 'a Jehová yuj rey David, yet' tas ya'jnac eb' yajl yaj 'a yib'n̈ junjn macn̈ eb' yin̈tl eb', yet' eb' capitan̈ yaj 'a yib'n̈ mil soldado yet' 'a yib'n̈ jun ciente soldado, yet' pax eb' niwc yajl yaj 'a eb' soldado cha.

²⁷ A jun tzo'n̈ tas 'at yijnac 'ec' eb' 'a owal, a 'ix yac' eb' yic tzc'anlb'ax 'a yatut Jehová.

²⁸ An̈jtona', ata 'ayc' pax smasnil tas 'ix ya'cn eb' tic: Samuel atn schecb' Dios, Saúl yunnal Cis, Abner yunnal Ner, yet' Joab yune 'ix Sarvia. Smasnil jun tzo'n̈ tas sic'b'il 'el yico'oc Dios cha, a Selomit yet' eb' yu'tac, a eb' 'ajcuenta yilni.

²⁹ A 'a eb' yin̈tl Izhar, ata cotnc Quenanías yet' eb' yunnal. A eb' 'aych gobernadoral, yet' juezal 'a chon̈b' Israel, palta man̈xtoc a 'a yatut Dios 'aych yopiso eb'.

³⁰ A Hazabías yet' eb' yican, eb' yin̈tl Hebrón, caw wal jeln eb', 1,700 sb'isl eb'. A eb' 'aych yilmalc chon̈b' Israel 'a sc'axpil 'ec' a Jordán, 'a stojlal 'aj tz'em c'u, atn eb' tz'iln smunjel Jehová yet' smasnil yic win rey.

³¹ A yic chawinc ab'il xo yoch David reyal, 'ix 'ijx chan̈ sb'isl eb' 'anma 'a junjn lugar. Ata 'ix checlji, jantc eb' caw checl yaji, to 'ay eb' yin̈tl win Hebrón caw jeln 'a chon̈b' Jazer 'a yol yic Galaad. A jun mach yajl yaj 'a yib'n̈ eb', atn Jerías.

³² A sb'isl eb' caw jeln cha, 2,700 eb' 'a smasnil, yajl yaj eb' 'a yib'n̈ eb' yin̈til. 'Ix 'ajx 'och 'a yib'n̈ eb' yuj rey David, to a eb' tz'iln eb' yin̈tl Rubén, eb' yin̈tl Gad yet' spacl eb' yin̈tl Manasés. A yopiso eb', to a eb' tz'iln smasnil tas to yic Dios yaji, yet' pax tas to yic win rey.