1 Cr 24 - Chuj San Sebastian Bible

¹ An̈jtona', a eb' yin̈tl Aarón stzol-l yajch eb' yiln yopiso. A eb' yunnal Aarón, atn Nadab, Abiú, Eleazar yet' Itamar.

² Palta ax Nadab yet' Abiú, b'ab'l chamnc eb' 'a smam, mant 'a yunnal eb' scham eb', yuj cha, cojxn Eleazar yet' Itamar x'och ya'malc 'och sti eb' 'anma 'a Dios.

³ 'Ix spojn 'ec' David eb', yic tz'och eb' 'a stzol-l yiln yopiso cha, 'ix colwj pax Sadoc win yin̈tl Eleazar yet' Abimelec, yin̈tl Itamar.

⁴ Palta 'ix yil cot eb', chajtlto a eb' yin̈tl Eleazar 'ec'b'al sb'isl eb' 'a yib'n̈ eb' yin̈tl Itamar, yuj cha, 'ix pojx 'ec' eb', waclajn̈ macn̈ eb' xcan yet' eb' yin̈tl Eleazar, ax wajxc macn̈ eb' xcan yet' eb' yin̈tl Itamar cha.

⁵ Suerteal x'aj spojx 'ec' yopiso eb' cha, stzol-l yiln eb', yujto a 'a scal eb' yin̈tl Eleazar yet' 'a scal eb' yin̈tl Itamar, 'ay eb' niwc yajl sic'b'il 'och 'a yopiso 'a yatut Dios cha.

⁶ A Semaías 'ajtz'ib', yunnal Natanael win levita, wal 'a yojltac win rey, yet' 'a yojltac eb' 'ichmtac winac, 'ix stz'ib'j sb'i eb' syajlil junjn macan̈. A eb' 'ayc' yet' win rey cha, atn Sadoc ya'mal 'och sti eb' 'anma 'a Dios, yet' Ahimelec yunnal Abiatar, yet' pax eb' yajl yaj 'a yib'n̈ eb' ya'mal 'och sti eb' 'anma 'a Dios yet' jun tzo'n̈ xo yin̈tl eb' levita. Suerteal xyutj eb' yiln yopiso 'a stzolil, jun yic yin̈tl Eleazar jun pax yic yin̈tl Itamar.

^7-18 Atn slistail junjn macn̈ eb' tic, a tzyal x'aj yel-l stzol-l yiln eb' yopiso 'a suerteal, 'a win b'ab'el, masnto 'a win slajub', 24 macn̈ eb' 'a smasnil: atn Joiarib, Jedaías, Harim, Seorim, Malquías, Mijamín, Cos, Abías, Jesúa, Secanías, Eliasib, Jaquim, Hupa, Jesebeab, Bilga, Imer, Hezir, Pisés, Petaías, Hezequiel, Jaquín, Gamul, Delaía, Maazías.

¹⁹ Atn eb' tic 'ix pojx 'ec' 'a stzol-l ya'w servil 'a yatut Jehová, a tzyal sley Jehová qui Diosal an̈ israel on̈c tic, 'icha wal yutjnac yaln can 'a Aarón, atn smam yichm eb'.

²⁰ A jaywn̈ xo eb' yin̈tl Leví xcani: atn Subael, yin̈tl Amram; Jehedías, yin̈tl Subael;

²¹ Isías a b'ab'l yaj 'a yib'n̈ eb' yin̈tl Rehabías;

²² Selomot yin̈tl Izhar; Jahat yin̈tl Selomot.

²³ Eb' yin̈tl Hebrón 'a stzolil: atn Jerías, Amarías, Jahaziel, yet' Jecamán.

²⁴ Locn pax Micaía, yunnal Uziel; a Samir, yunnal Micaía;

²⁵ Isías, yu'tac Micaía; Zacarías, yunnal Isías;

²⁶ Mahli, Musi, yet' Jaazías yunnal Merari eb'.

²⁷ Eb' yin̈tl Merari yuj Jaazías: atn Soham, Zacur yet' Ibri.

²⁸ Eb' yunnal Mahli, atn Eleazar yet' Cis. A Eleazar cha, may yunnal,

²⁹ ax pax Cis 'ay jun yunnal, atn Jerhameel.

³⁰ A eb' yunnal Musi, atn Mahli, Edar yet' Jerimot. Atn eb' tic yajl yaj 'a scal eb' yin̈tl Leví.

³¹ An̈jtona pax eb' tic, suerteal 'ix yutj eb' schan yopiso, 'icha 'ajnc eb' yican eb', atn eb' yin̈tl Aarón, a 'a yojltac rey David, Sadoc, Ahimelec, eb' yajl yaj 'a eb' yin̈tl eb' ya'mal 'och sti eb' 'anma 'a Dios, yet' 'a eb' yajl yaj 'a eb' yin̈tl Leví. Lajn 'ix 'aj yajx yopiso eb' yin̈tl win b'ab'l winac, yet' 'a eb' yin̈tl win slajub'.