1 Cr 23 - Chuj San Sebastian Bible

A yopiso eb' levita

¹ A yic caw 'ichm winc xo sq'uinlan David, 'ix ya'n can 'och yopiso yunnal, atn Salomón, xya'n can 'och reyl 'a yib'n̈ chon̈b' Israel.

² 'Ix ya'n syam sb'a smasnil eb' yichm wincal chon̈ab', yet' eb' ya'mal 'och sti eb' 'anma 'a Dios yet' pax eb' levita.

³ 'Ix b'isx eb' levita to 30 ab'il sq'uinal tz'at 'a yojltac. A yic 'ix b'isx eb', 'ay 38 mil sb'isl eb' winac.

⁴ A 'a scal eb' tic 'ix si'x 'elt 24 mil eb' tz'och sjucb'tzoc eb' munljum tzb'on yatut Jehová, ax junx waque mil eb' tz'och gobernadoral yet' 'a juezal.

⁵ Chan̈e mil eb' tz'och stan̈malc puerta, ax chan̈e xo mil eb' tz'och 'a alj wach' paxti 'a yojltac Jehová, yet' jun tzo'n̈ yamc'ab' ya'jnac David b'o'oc, yic tz'och yopiso ta'.

⁶ Spojn 'el David eb' 'a junjn macn̈il, a tzyal eb' yunnal Leví: Atn Gersón, Coat yet' Merari.

⁷ A eb' yunnal Gersón: Atn Laadan yet' Simei.

⁸ Eb' yunnal Laadan, 'oxwn̈ sb'ey eb': atn Jehiel, win b'ab'el, Zetam yet' Joel.

⁹ Atn jun tzo'n̈ eb' tic yajl yaj 'a yib'n̈ eb' yin̈tl Laadan. (Eb' yunnal Simei, an̈jtona 'oxwn̈ sb'ey eb': atn Selomit, Haziel yet' Harán.)

^10-11 Ax junx Simei, chan̈wn̈ sb'ey eb' yunnal: A stzolil atn Jahat, Ziza, Jeús yet' Bería. A Jeús yet' Bería cha, man̈ niwnoc sb'isl yunnal eb', yuj cha, junn̈j macn̈ x'ajcn eb'.

¹² A eb' yunnal Coat, chan̈wn̈ sb'ey eb': atn Amram, Izhar, Hebrón yet' Uziel.

¹³ Eb' yunnal Amram: atn Aarón yet' Moisés. Ax Aarón a si'x 'el yet' eb' yin̈tl yuj Jehová, yic tzyiln eb' jun tzo'n̈ tas to yic yaji, yic tzn̈usn eb' incienso 'a yojltac, yic tz'a'w servil eb' 'a 'a, yic tzyaln eb' wach' paxti 'a sb'i 'a smasnil tiempo.

¹⁴ Ax pax eb' yin̈tl Moisés, atn schecb' Dios, 'ix 'och eb' stz'acb'oc eb' yit levitail.

¹⁵ A eb' yunnal Moisés, atn Gersón yet' Eliezer.

¹⁶ A yunnal Gersón, atn Sebuel a b'ab'l 'unnab'il.

¹⁷ Ax yunnal Eliezer, atn Rehabías; ax Rehabías cha, caw niwn eb' yunnal.

¹⁸ A yunnal Izhar, atn Selomit a b'ab'l 'unnab'il.

¹⁹ A stzol-l eb' yunnal Hebrón: atn Jerías, Amarías, Jahaziel, yet' Jecamán.

²⁰ A eb' yunnal Uziel: atn Micaía yet' Isías.

²¹ A eb' yunnal Merari: atn Mahli yet' Musi. Ax eb' yunnal Mahli, atn Eleazar yet' Cis.

²² A Eleazar, may junc yunnal to winc 'unin, cojn yisl 'ay. 'Ix nupn eb' 'ix yet' eb' yican, atn yet' eb' yunnal Cis.

²³ A eb' yunnal Musi, 'oxwn̈ sb'ey eb': atn Mahli, Edar yet' Jeremot.

²⁴ Atn jun tzo'n̈ eb' yin̈tl Leví tic 'aych yopiso 'a yatut Jehová. A tzyal smacquixtacl 'ix 'aj stz'ib'x sb'isl eb', smasnil eb' sjunc'lil ab'il sq'uinal, tzb'ey 'a yojltac.

²⁵ 'Ix yal David 'ixtic: Tox 'ix yac' Jehová qui Diosal junc'ojlal 'ayn̈ an̈ israel on̈c tic, a 'ix si'n 'el 'aj 'oj 'aj cajn 'a Jerusalén tic 'a smasnil tiempo.

²⁶ Yuj cha, man̈xtoc 'oj 'ijxc b'eyc'oc smantiado Jehová yuj eb' levita, yet' jantcn̈ej syamc'ab'il yic tz'och 'emmquilal, xchi.

²⁷ Yuj cha, a eb' yin̈tl Leví, a yic tz'acw eb' 'a sjunc'lil ab'il, tzya'n tz'ib'xoc sb'a eb' 'icha tas xyal win David 'a slajb' schecnb'il.

²⁸ A eb' cha, 'ix can eb' 'a yol sc'ab' eb' ya'mal 'och sti eb' 'anma 'a Dios, atn eb' yin̈tl Aarón, yic tzb'on eb' jun tzo'n̈ munljel 'a yatut Jehová: yic tzya'n cuenta eb' yamq'uil, yet' jun tzo'n̈ cuarto, sacb'tzan pax eb' smasnil yamc'ab' to cojn Jehová 'ay yico', tzb'on pax eb' jun tzo'n̈ xo munljel 'a yatut Dios cha,

²⁹ atn 'ixm pan tz'em tzolan, 'ixm harina tz'ajx ofrendail, 'ixm c'oxx pan may yich, jun tzo'n̈ xo ofrenda tzb'o 'a yol xalten, 'ixm harina caln yaj yet' aceite, tzya'n cuenta pax eb' smasnil jun tzo'n̈ 'echtab'.

³⁰ An̈jtona', yowlal 'ayc'n̈ej eb' 'a yatut Dios yuj yaln eb' yuj diosal, yet' alj wach' paxti 'a Jehová 'a junjn sq'uin̈b'ial yet' 'a junjn yemc'ual,

³¹ yet' yic tz'ajx tz'a xajmb'al to tz'a smasnil 'a Jehová 'a sc'ul 'iljelal, yet' 'a yic tznax sq'uin̈l yic tzpac' 'uj, yet' pax jun tzo'n̈ xo q'uin̈ caw niwn yel'chi. Tz'a'wn̈ej servil eb' 'a Jehová, a tzyal sb'isl eb', yet' munljel tz'ajx sb'o eb'.

³² A 'a yic yaln̈taxi a eb' tztan̈wni mantiado 'a 'aj tzqui chaj qui b'a yet' Dios, ax ticnec a eb' x'ochx can munljc 'a yatut Jehová 'a yaln̈ schecnb'il eb' yin̈tl Aarón, atn eb' yican eb'.