1 Cr 22 - Chuj San Sebastian Bible

¹ Yuj cha, 'ix yaln David 'ixtic: A 'a tic 'oj b'o chan̈ yatut Jehová Dios, yet' jun yet'l xajmb'al 'aj 'oj ca'c tz'a qui xajmb'al an̈ israel on̈c tic, xchi.

Tzyamtzax syamc'ab'il yatut Dios

² Xlajw cha, 'ix ya'n David syam sb'a smasnil eb' chuc chon̈b'al cajn 'ec' 'a scal eb' israel. A 'a scal eb' cha, ata 'ix si'x 'elt eb' tzeym q'uen 'oj tzeync q'uen q'uen 'oj 'och 'a yatut Dios.

³ An̈jtona', til wal q'uen hierro 'ix syam sb'a yuj David, yic tz'och q'uen slawxilc 'a 'aj tzlaj schaj sb'a te spuertail yamq'uil. Til wal pax q'uen bronce syamtzej, man̈xtzac stac' yechtax yalil.

⁴ Syamtzej pax te c'ute', man̈xtzac b'ischji jantc te 'ix syam sb'a, yujto a eb' 'aj Sidón yet' eb' 'aj Tiro, caw niwn te c'ute 'ix yij cot eb' 'a David.

⁵ Yujto 'ix sna 'ixtic: A ni wunnal Salomón tic caw 'unn to na, ax pax jun yatut Jehová 'oj b'o cha, caw niwquil 'oj 'ajoc. Yel xo 'oj b'inax yuj swach'l yilx 'a smasnil yolyib'n̈q'uinal; ax ticnec yowlal 'oj in yamb'tzoc can smasnil syamc'ab'il 'oj 'och 'a 'a, xchi. A yic pitzn to David cha, caw niwn tas 'ix syamb'tzej cani.

⁶ Xlajw cha, 'ix yawtn cot David win Salomón, 'ix ya'n can 'ab'enal sb'omb'il yatut Jehová qui Diosal 'a 'a.

⁷ 'Ix yaln 'ixtc 'a 'a: Ach wunnal, caw 'ayc' 'a in nab'en in b'on chan̈ junc yatut Jehová qui Diosal.

⁸ Palta yaljnac 'ayn 'ixtic: Ach tic caw niwn chic' 'ix 'el o'oj, niwn pax owl xa b'o'o; yuj cha, man̈oc ach 'oj a b'o chan̈ jun watut cha.

⁹ Palta 'ay jun onnal 'oj 'aljoc, may owl 'oj sb'o', yujto an 'oj wa'cn 'och smasnil eb' 'ajc'ojl 'a junc'ojlal yet'oc. Salomón 'oj sb'ioc. A 'a yol stiempoal, an 'oj wac' junc'ojlal yet' tzaljc'ojlal 'a yib'n̈ in chon̈b' Israel.

¹⁰ A 'oj b'onc chan̈ jun watut cha. 'Oj 'och 'unnab'ilal 'ayin, an xo 'oj woch mamb'ilal 'a 'a, ax wa'n yic' yip yopiso 'a yib'n̈ chon̈b' Israel 'a smasnil tiempo, xchi Dios 'ayin.

¹¹ Ax ticnec ach wunnal, 'och cab' Jehová et'oc, 'oj colwjoc et'oc yic 'oj a b'on chan̈ jun yatut cha, 'icha 'ix yutj yaln oj tic.

¹² A cab' Jehová 'oj 'a'nc a jelnal, sec wach' a yic 'oj a'nc reyl 'a yib'n̈ chon̈b' Israel, 'oj a yiclc sley Jehová qui Diosal.

¹³ Wach'n̈j 'oj 'el'choc smasnil, toto tza ya'ilj a yiclni scuynb'il, yet' sley 'ix yac' 'a Moisés cu'uj. ¡Te'n tzotj a b'a, 'ac' ep, man̈ ach xiwoc, man̈ a chab'c'ojloc pax a b'a!

¹⁴ 'Ilto, an tic 'ix wac' wip in yamb'tzan jun tzo'n̈ syamc'ab'il yatut Jehová 'oj b'o cha, atn jun tzo'n̈ tic: 66 mil quintal q'uen oro, yet' 660 mil quintal q'uen plata, yet' jun niwquil b'uln̈ q'uen bronce, yet' q'uen hierro, caw niwn q'ue'en, man̈xtzac stac' yechtaxi. An̈jtona', caw niwn te te', yet' q'uen q'uen 'ix in yamb'tzej cani, ach xo tic 'oj a wach' yamb'tzoc stz'acub'.

^15-16 Ach tic til wal munljum 'ayc' 'a yol a c'ab' 'oj munljoc et'oc: atn eb' tzeym q'ue'en, eb' albanil, eb' josmte'. Man̈xtzac b'ischj jantc winc to jeln smunlj 'a tzann̈j munljelal, 'icha 'a q'uen oro, 'a q'uen plata, 'a q'uen bronce, yet' 'a q'uen hierro. Yuj cha, ¡'och cab' munljel! ¡A Jehová 'oj colwjoc et'oc! xchi David 'a Salomón.

¹⁷ Xlajw cha, 'ix yaln David 'a smasnil eb' yichm wincal chon̈ab', to tzcolwj eb' yet' Salomón, 'ix yaln 'a eb' 'ixtic:

¹⁸ A Jehová qui Diosalec, a 'aych quet'ec, atn x'a'n junc'ojlal 'a smasnil qui macb'en, yujto a pax x'a'n 'och smasnil 'anma cajn 'a jun tzo'n̈ nacion̈ tic 'a yol in c'ab', yuj cha, 'ix 'ochcn eb' 'a yol sc'ab' Jehová, yet' 'a yol qui c'ab'c an̈ schon̈b' on̈c tic.

¹⁹ Yuj cha, a ticnec 'a'c 'och wal 'a e c'ojol, yet' 'a e nab'en e sayn 'ec' Jehová qui Diosalec. Yamc 'och e b'on chan̈ jun scajnub' Jehová qui Diosalec, sec wach' 'oj 'och te scaxail strato 'a yojol, yet' jun tzo'n̈ syamc'ab'il yatut Dios to yic yaji, xchi rey David.