1 Cr 21 - Chuj San Sebastian Bible

Yijnac chan̈ David sb'isl eb' chon̈ab'

¹ Palta 'ix 'och win Satanás 'ajc'ojlal 'a eb' israel, 'ix ya'n sc'ojloc David sec tzyij chan̈ sb'isl eb' soldado.

² 'Ix yaln David 'ixtc 'a Joab yet' 'a eb' syajlil chon̈ab': —'Ixquec, 'at 'ijec chan̈ sb'isl eb' soldado quit israelal, tz'at e chaj cot 'a chon̈b' Beerseba 'a stojlal sur, masnto tzex c'och 'a chon̈b' Dan 'a stojlal norte. Tzlajw cha, tzeyi'n cot sb'isl eb' 'ayin, sec wach' tzwila jantc sb'isl eb' soldado 'a smasnil, xchi 'a eb'.

³ Palta xta'w Joab 'ixtic: —A cab' Jehová tz'a'n q'uib' sb'isl schon̈ab', man̈x b'ischjb'enoc cab' tz'aj eb', a 'a yol 'a c'ab' 'aych eb' smasnil. ¿Tom man̈ a checb'oc eb' tic smasnil? ¿Tas yuj tzac' ep 'e'n chan̈ sb'isl eb'? Yuj ton wal jun tic ax yoch smul qui chon̈b' tic, xchi.

⁴ Palta ma'ix schaj win rey chi yab' tas xyal Joab, yuj cha, 'ix 'at Joab, x'at yi'noc chan̈ sb'isl smasnil eb' soldado israel. Xlajw cha, 'ix meltzj pax 'a Jerusalén.

⁵ 'Ix ya'n jantc sb'isl smasnil eb' soldado chi 'a David. Ax 'a yol smacb'en eb' israel cha, 'ay jun miyon̈ yet' jun ciente mil soldado, eb' to caw stiempoal s'at 'a owal. A 'a scal eb' 'ay 470 mil eb' 'aj Judá.

⁶ A 'a scal eb' tic, man̈ 'ayc 'och eb' yin̈tl Leví yet' eb' yin̈tl Benjamín sb'isloc, yujto a Joab matz chaj sc'ojl jun sley win rey cha.

⁷ An̈jtona pax Dios caw ma'ix schaj sc'ojl jun tzo'n̈ cha. Yuj cha, 'ix ya'n cot yailal 'a yib'n̈ chon̈b' Israel.

⁸ Yuj cha, 'ix yaln David smul 'ixtc 'a Dios: —Caw niwquil in mul 'ix 'ochi, yujto xin b'o jun tic. Palta tzin tew 'ayach to tzac' niwnc'ojlal jun in mul an a checb' in tic, yujto 'icha junc may snab'en, 'ixta 'ix wutj in b'a, xchi.

⁹ Yuj cha, 'ix yaln Jehová 'a Gad, atn jun schecab', win tz'a'n snab'enoc David cha:

¹⁰ 'Ixic, 'at al 'a David, tzaln 'ixtc 'a 'a: A Jehová, a tzaln 'aych 'ixtic: 'oxe tas tzwac' a sic'a', ach 'oj a sic'a', 'aj 'ay junc tza nib'j tzin b'o et'oc, xchi Dios, xa chi, xchi 'a Gad.

¹¹ Yuj cha, 'ix 'at Gad 'at yil David, 'ix yaln 'a 'ixtic: —'Ixtc 'ix yutj Jehová yalni:

¹² Sic' 'a scal 'oxe yailal tic: ¿tom a 'oxe ab'il wejel, mto a 'oxe 'uj owl 'a e cal 'aj 'oj ex smil cham eb' 'ajc'ojol, mto a 'oxe c'u yab'il 'oj yac' 'a yol e nacion̈? A jun cha, atn wespada an Jehová in, yujto a jun wángel 'oj 'a'nc lajwc 'el eb' 'anma 'a smasnil yol smacb'en israel, xchi. Sic' ticnec, sec wach' 'oj stac' waln spac 'a Jehová, atn jun in checn coti, xchi Gad 'a David.

¹³ 'Ix yaln rey David 'ixtc 'a Gad: —Caw wal 'ajltac snachj 'el wu'uj tas 'oj in sic' 'a 'oxe tic. A ticnec, yel xo am wach' tzon̈ can 'a yol sc'ab' Jehová, yujto niwquil schamc'ojlal 'ayon̈, palta man̈oc cab' sc'ab' 'anma tzlow 'ayon̈, xchi.

¹⁴ Yuj cha, 'ix ya'n cot Jehová jun yab'il 'a yib'n̈ chon̈b' Israel. 'Ix cham 70 mil eb' winc israel cha.

¹⁵ 'Ix schecn cot jun yángel 'a Jerusalén yic tzya'n lajwoc. Palta ax yic xyilni to yelc'ojlal tzlajw 'el yu'uj, yuj cha, 'ix snan sb'a sc'ojl yuj jun yailal cha, 'ix yaln 'ixtc 'a jun yángel wan smilw cham 'anma cha: ¡Colb' cha, 'ochn̈ wa'an! xchi 'a 'a. A jun yángel Jehová cha, ata 'ayc' 'a 'aj wan ste'w trigo Ornán win jebuseo.

¹⁶ A yic 'ix q'ue q'ueln David, 'ix yilni to 'ayc' jun ángel chi 'a snan̈l satcha'an̈ yet' lum lum tic, yamb'il chan̈ jun espada yu'uj, wan stojlb'tzan 'at 'a Jerusalén. Yuj cha, 'ix 'em n̈ojn yet' eb' yichm wincal chon̈ab', masnto squil 'ejm eb' snan̈l sat 'a sat lu'um, 'aych te pichl n̈achtac sat yic tzch'oxn 'el eb' scusc'ojlal.

¹⁷ 'Ix yaln David 'ixtc 'a Dios: —¡Mamin, an 'ix wala to tz'ijx chan̈ sb'isl eb' chon̈ab', caw an 'ix 'och in mul, wal yel an xin b'o jun maysch'olnil tic! Palta ¿tom 'ay tas tu sb'o jun tzo'n̈ 'anma may smul tic? Mamin Jehová ach in Diosal, a ticnec a jun yailal tic, cotcn cab' 'a wib'an̈, yet' 'a yib'n̈ win̈til, palta 'actj a'n 'och yailal 'a yib'n̈ jun a chon̈b' tic, xchi.

Sb'ojnac David jun yet'l xajmb'al

¹⁸ 'Ix yaln jun yángel Jehová chi 'a Gad, to tzyal 'a David, to tzb'o chan̈ junc yet'l xajmb'al 'a ste'lab' trigo Ornán cha.

¹⁹ Yuj cha, 'ix 'at David 'at sb'o jun yet'l xajmb'al 'a sb'i Jehová, 'icha 'ix 'aj yalx 'a yuj Gad.

²⁰ A Ornán wan ste'w trigo yet' chan̈wn̈ yunnal, a yic 'ix yiln eb' to 'ayc' jun ángel chi ta', yuj cha, a eb' yunnal cha, 'ix 'at eb' sc'ub'c 'el sb'a.

²¹ A yic xyiln winac chajtlto wan sc'och David, 'ix 'elt 'a yol te'lab' cha, 'ix 'em n̈ojan, masnto squil 'ejm snan̈l sat 'a sat lum 'a yojltac.

²² Xlajw cha, 'ix yaln David 'ixtc 'a winac: —'Ac' jun a lugar 'aj tzach te'w trigo tic 'ayin, sec wach' a 'a tic tzin b'o chan̈ junc yet'l xajmb'al 'a Jehová, sec tz'och wan jun yab'il tic 'a qui chon̈b' tic. Chon̈ 'ayin, a tzyal jantc tza c'ana, xchi.

²³ Ax Ornán cha, 'ix ta'w 'ixtc 'a 'a: —'Ij lum mamin rey, b'o tas tza nib'j a b'o cha. Tzwac' e no quelm wacx tic 'ayach yic tz'och no xajmb'alil, yet' te luchlab' trigo tic, tztac' tz'och te c'atztzil, yet' 'ixm trigo, tztac' yoch 'ixm ofrendail. ¡Tzwac' jun tzo'n̈ tic 'aych smasnil! xchi.

²⁴ Xlajw cha, 'ix yaln rey David 'ixtc 'a winac: —Yuj wal dios 'ayach, palta yowlal tzin man smasnil jun tzo'n̈ tic 'aych 'icha wal stojol, yujto matz tac' wi'n 'ec' tas to eco', yic tzwa'n xajmb'al-l 'a Jehová, matz tac' pax wa'n junc xajmb'al yic to matz wab' syal in manni, xchi.

²⁵ 'Ix ya'n David stojl jun lugar chi 'a winac, waque ciente q'uen tumn oro xyac' 'a 'a.

²⁶ Axta sb'o chan̈ jun yet'l xajmb'al chi 'a Jehová. Ata 'ix yac' xajmb'al to tz'a smasnil, yet' xajmb'al yic junc'ojlal. 'Ix leslwi 'a Jehová. 'Ix ta'w 'a 'a, yuj cha, xya'n cot c'ac' 'a satcha'an̈, 'ix 'ejm 'a yib'n̈ jun no xajmb'al cha.

²⁷ Xlajw cha, 'ix yaln Jehová 'a jun ángel cha, to tzmol 'ejm yespada chi 'a yol yatut.

A jun lugar yic yatut Dios

²⁸ A yic xyiln David chajtlto 'ix ta'w Jehová 'a 'a, yic 'ayc' 'a ste'lab' trigo Ornán cha, yuj cha, 'ix ya'n̈j xajmb'al ta'.

²⁹ Wach'xam a jun mantiado yic Jehová b'ob'il chan̈ yuj Moisés 'a lum cusltac lu'um, yet' jun yet'l xajmb'al 'aj tz'ajx xajmb'al, ata 'ay 'a jolm witz yic Gabaón,

³⁰ palta man̈x 'ic stac' s'at David ta', yic tzyaln sb'a 'a Dios, yujto 'ix xiw si'mb'il 'a yic 'ix yiln jun yángel Jehová yet' yespada cha.