1 Cr 20 - Chuj San Sebastian Bible

'Emnc chon̈b' Rabá yuj David

¹ Ax 'a junx ab'il, atn 'a yic stiempoal s'at eb' rey 'a owal, a Joab 'ix smolb'tzan eb' soldado, 'ix 'at sjunc slum eb' amonita. 'Ix 'at yoync pax 'och sb'a eb' 'a spatquil chon̈b' Rabá, 'ix ya'n owl yet'oc, masnto xlajw can 'ejm yu'uj, ya' sb'a a David 'aycn 'a Jerusalén.

² Xlajw cha, 'ix c'och David, xyi'n cot scorona sreyl eb' amonita. A jun corona cha, nab'a oro, til wal q'uen q'uen wach' yilx 'aych 'a 'a, 'oxe aroba yalil. 'Ix ya'n q'ue eb' 'a sjolm David cha. An̈jtona', til wal tas chan̈ stojl 'ix yij 'elt eb' 'a jun chon̈b' cha.

³ Ax jantc to eb' 'anma xcan to yuj 'a jun chon̈b' cha, 'ix 'ijx 'elt eb' yu'uj. 'Ix 'ajx pural eb' smunlj yet' q'uen serucho yet' q'uen piyocha, yet' ch'acab'. An̈jtona', 'ixta pax 'ix yutj David chi eb' amonita 'a jun tzo'n̈ xo chon̈ab'. Xlajw xoj cha, 'ix paxt David chi yet' smasnil eb' soldado 'a Jerusalén.

Owl yet' eb' winc niwc ste'il

⁴ Xlajw cha, 'ix 'och jun owl yet' eb' filisteo 'a Gezer. Ax Sibecai 'aj Husa a 'ix miln cham Sipai. A win cha, yin̈tl win Refa winac, 'ixtnta 'ix 'aj yajx ganar eb' filisteo.

⁵ 'Ix 'och junx owl yet' eb' filisteo, ax Elhanán, yunnal Jair, a xmiln cham Lahmi, yu'tac Goliat win 'aj Gat. Caw niwquil spatquil yoc slanza winac, 'icha am spatquil te te 'aj tzb'a'x 'och te ch'al yic eb' tzjalwi.

⁶ Ax 'a Gat 'ix 'och junx owal, ata 'ay junx winac yel xo niwquil ste'il, lajchwe yune sc'ab', lajchwe yune yoc, yin̈tl pax win Refa.

⁷ A jun winc cha, 'ix b'uchwj 'a eb' israel, palta xmilx cham yuj Jonatán, yunnal Simea, atn win yu'tac David.

⁸ A jun tzo'n̈ winc caw niwc stel tic, yin̈tl Refa eb', 'aj Gat eb', 'ix 'ajx ganar eb' yuj David yet' eb' soldado.