1 Cr 19 - Chuj San Sebastian Bible

'Emnc eb' amonita*r* yet' eb' sirio yuj David

¹ 'Ix 'ec' jun tiempoal, ax x'aji 'ix cham Nahas, sreyl eb' amonita, ax Hanún atn yunnal, a x'ochx can reyl sjeloc.

² 'Ix yaln David 'ixtic: 'Oj in ch'oxl in chamc'ojlal 'a Hanún, yunnal Nahas, yujto a smam sch'oxjnac schamc'ojlal 'ayin, xchi. Yuj cha, 'ix schecn 'at David eb' schecb' 'at yac' sniwnal sc'ojol, yuj schamlil smam. Palta ax yic 'ix c'och eb' checb' chi 'a schon̈b' eb' amonita,

³ a eb' yajl yaj 'a scal eb' amonita cha, 'ix yaln eb' 'a Hanún 'ixtic: ¿Am wal a nani, to yuj a niwnc'ojlaxi, mto yuj pax to niwn yel'ch a mam 'a sat David, yuj cha, 'ix checn cot eb' schecb' 'ayach? ¡Ma'ay, palta ton̈j tzwul smaclj jun tzo'n̈ checb' tic yila', yic tzyojcan 'el eb' tas yaj qui nacion̈ tic sec tzyij 'ec' eb'! xchi eb' 'a 'a.

⁴ Yuj cha, 'ix ya'n Hanún yamchjc eb' schecb' David cha, 'ix joxx 'el xil sti eb', 'ix slot'x 'el sti spichl eb', masnto 'ix q'ue'ch yel 'a sti syop eb'. Xlajw cha, 'ix checx meltzjoc eb'.

⁵ Yajn̈j cha, 'ix 'at alxoc yab' rey David yuj tas 'ix 'aj eb' schecb' cha. 'Ix 'at ya'nc chaxc eb', yujto caw tzq'uixw eb'. 'Ix 'at ya'nc alxoc, to wach' tzcan eb' 'a chon̈b' Jericó, masnto tzq'uib' xil sti eb' jun 'ejm xo, 'ixta to b'i'an, tzmeltzj eb'.

⁶ 'Ix snan 'el eb' amonita cha chajtlto caw tzcot yowl David 'a eb' yujto caw tu tas 'ix sb'o eb' 'a eb' schecab', yuj cha, ax Hanún sreyl eb', 'ix ya't 660 quintal q'uen plata 'a eb' syajlil Mesopotamia, yet' 'a eb' sirio 'aj Maaca yet' 'a Soba, yic tz'och stojloc caruaje yic owal yet' eb' soldado 'aych 'a yib'n̈ chej yuj scolwj eb' 'a eb'.

⁷ 'Ix stojn eb' 32 mil caruaje yic owal, stojn pax eb' win sreyl Maaca yet' eb' soldado. A eb' tic, ata sb'o chan̈ eb' scamplamento 'a sla'nil chon̈b' Medeba. An̈jtona pax eb' amonita cha, 'ix 'elt eb' 'a yol schon̈ab', xjaw pax eb' ta', yic tz'och eb' 'a owal.

⁸ A yic 'ix yab'n David jun cha, 'ix schecn 'at Joab yet' smasnil eb' soldado to caw tec'an.

⁹ Ax eb' amonita 'ix sb'ab'l 'a'j lista sb'a eb'. Ata tzol-li x'aj eb' 'a 'aj tzon̈ 'och 'a yol schon̈b' eb'. Palta ax eb' rey ajun yet' eb' cha, mun chuc xcan eb' 'a 'a'lic sch'ocoj.

¹⁰ Ax yic 'ix yiln Joab to 'ay eb' 'ajc'ojl 'ayc' 'a sat yet' 'a spatquil, yuj cha, 'ix si'n 'el eb' soldado israel, eb' to caw wal jelan, atn eb' matz xiw 'a owal, yic tzya'n eb' owl yet' eb' sirio cha.

¹¹ Yajn̈ej 'ix ya'n 'och jun tzo'n̈ xo eb' soldado 'a yol sc'ab' yu'tac, atn Abisai.

¹² 'Ix yaln 'a 'ixtic: Toto tzela a eb' sirio yel xo jeln eb' 'a wib'an̈, to 'ixta', tzach 'at colwjoc wet'oc. Palta 'oj wila', toto a eb' amonita yel xo jeln 'a eb'an̈, to 'ixta', an xo 'oj in 'at colwjoc et'oc.

¹³ Qui te'wtzoc qui b'a, ca' quip qui coln 'el qui nacion̈, atn eb' schon̈b' qui Diosal. ¡Sb'o cab' Jehová 'icha tznib'ej! xchi Joab.

¹⁴ Xlajw cha, 'ix 'at Joab yet' eb' soldado 'ayc' yet'oc, yic tz'at ya'nc eb' owl yet' eb' sirio, palta 'ix 'at eb' sirio chi 'elc 'a eb'.

¹⁵ Ax eb' amonita, 'ix yiln eb' to x'at eb' sirio chi 'eloc, yuj cha, 'ix 'at pax eb' 'elc junx 'a Abisai yet' eb' soldado, 'ix 'och eb' 'a yol schon̈b' scol sb'a. Xlajw xoj cha, 'ix meltzj Joab yet' smasnil eb' soldado 'a Jerusalén.

¹⁶ A yic 'ix yiln cot sb'a eb' sirio chajtlto tox 'ix 'ajx ganar eb' yuj eb' israel, yuj cha, 'ix schecn 'at eb' schecb' 'a eb' yit sirioal 'ayc' 'a junx sc'axpil 'ec' a Éufrates, sec tzcot eb' colwjoc yet' eb'. A Sofac a scapitan̈il eb' soldado yic rey Hadad-ezer, a sat yajl x'aj 'a smasnil eb' soldado.

¹⁷ Yajn̈j wal cha, 'ix alx jun tzo'n̈ chi 'a David. Yuj cha, 'ix ya'n syam sb'a smasnil eb' israel jun 'ejm xo. 'Ix c'axw 'ec' eb' 'a a Jordán, 'ix c'och eb' 'a eb'. Ax David 'ix yac' lista sb'a yet' eb' soldado, 'ix 'och eb' 'a owl yet' eb' sirio cha.

¹⁸ Palta a eb' sirio 'ix 'at eb' 'elc 'a eb' israel cha, 'ix smil cham eb' soldado Israel 40 mil eb' soldado tzb'ey 'a yoc, ax uque mil eb' tzb'ey 'a yol scaruaje. 'Ix smiln cham pax eb' win Sofac scapitan̈il eb' soldado sirio cha.

¹⁹ Ax xyiln eb' schecb' rey Hadad-ezer, chajtlto tox 'ix 'ajx ganar eb' yuj eb' israel, yuj cha, xya'n 'och sb'a eb' 'a junc'ojlal yet' David, 'ix 'ochcn eb' 'a yaln̈ schecnb'il. Ax eb' sirio cha, man̈x 'ic yal sc'ojl eb' xcolwj yet' eb' amonita cha.