1 Cr 18 - Chuj San Sebastian Bible

Jun tzo'n̈ chon̈b'*r* 'ajxnac ganar yuj David

¹ A yic xlajw ye'cn jun tzo'n̈ tic, 'ix 'ajx ganar eb' filisteo yuj David. 'Ix can eb' 'a yol sc'ab', xyi'n 'ec' chon̈b' Gat yet' yaldeail.

² An̈jtona', 'ix 'ajx pax ganar eb' moabita, 'ix can eb' 'a yaln̈ schecnb'il, tzya'n pax eb' stojlb'al.

³ An̈jtona', 'ix 'ajx pax ganar Hadad-ezer sreyl chon̈b' Soba, ata 'ay 'a stojlal Hamat. A jun rey cha, wan smacn 'ec' yico'oc lum lu'um, masnto 'a a Éufrates.

⁴ 'Ix yamchj jun mil caruaje yic owl yuj David yet' soldado, yet' uque mil soldado 'ay q'ue 'a yib'n̈ chej, yet' pax junc'l mil eb' to tzb'ey 'a yoc. Sma'n wecchjoc eb' yoc smasnil no chej to'jnac te caruaje yic owl cha, cojxn̈ej no tzc'anx yuj junc ciente caruaje xcani.

⁵ 'Ix jaw eb' soldado sirio 'aj Damasco colwjoc yet' Hadad-ezer cha, palta xmilx cham 22 mil eb' yuj David yet' soldado.

⁶ Xlajw cha, 'ix ya'n 'och David jun tzo'n̈ eb' soldado tztan̈wni eb' sirio 'a yol yic Damasco. Ax eb' sirio cha, 'ix can eb' 'a yaln̈ schecnb'il, tzya'n pax eb' stojlb'al, yujto a Jehová a tz'a'n yac' ganar David owal, yaln̈j 'aj tzxit'q'ui.

⁷ An̈jtona', 'ix yi'n pax 'ec' jun tzo'n̈ tzmacn sat jul-lab' to nab'a oro tzc'an eb' syajlil soldado win Hadad-ezer, 'ix yi'n cot 'a Jerusalén.

⁸ 'Ix yi'n pax 'ec' jun tzo'n̈ q'uen bronce 'a chon̈b' Tibhat yet' 'a Cun, atn jun tzo'n̈ schon̈b' Hadad-ezer. Ax Salomón yunnal David, a c'anjnac jun tzo'n̈ q'uen bronce cha, yuj jun niwquil pila, chab' 'oy, yet' pax yuj smasnil yamc'ab' to nab'a bronce.

⁹ Ax yic 'ix yab'n win Toi sreyl chon̈b' Hamat, chajtlto tox 'ix 'ajx ganar eb' soldado Hadad-ezer chi yuj David,

¹⁰ yuj cha, 'ix schecn 'at yunnal, atn Adoram, xyi'n 'at win oro, plata yet' bronce 'a rey David, yic tz'at 'ajxc stzatzl sc'ojl yu'uj. Xyaln pax swach' paxti 'a 'a, yujto 'ix yac' ganar ya'n owl yet' Hadad-ezer cha. A Toi cha, ya'jnac pax owl yet' rey Hadad-ezer chi 'a yic yaln̈taxi.

¹¹ 'Ix yac' rey David smasnil jun tzo'n̈ q'uen yamc'ab' chi 'a Jehová. Junn̈j 'ix yutj ya'n yet' q'uen plata yet' q'uen oro, atn q'uen xit' yijc' 'a jun tzo'n̈ eb' chon̈b' tic: atn 'a eb' edomita, 'a eb' moabita, 'a eb' amonita, 'a eb' filisteo yet' 'a eb' amalecita.

¹² An̈jtona pax Abisai, yune 'ix Sarvia, 'ix 'ajx ganar wajxclajn̈e mil eb' edomita yuj 'a pan̈n 'a'lic yic 'atz'am. Caw ch'iyquixtac x'ajcn eb' yu'uj.

¹³ Xlajw cha, 'ix ya'n 'och David jun tzo'n̈ eb' soldado stan̈wc chon̈b' Edom. A smasnil eb' edomita cha, 'ix ya'ch sb'a eb' 'a yaln̈ schecnb'il, yujto a Jehová a tz'a'n yac' ganar owal, yaln̈j 'aj tzxit'q'ui.

Eb' 'ay yopiso yet' David

¹⁴ 'Ix yac' David reyl 'a yib'n̈ smasnil chon̈b' Israel. Caw wach' 'ix yutj sb'eyb'al, 'ix sb'on yaj eb' yit chon̈b' 'a stojlal.

¹⁵ A Joab yune 'ix Sarvia, a yajl yaj 'a eb' soldado, ax Josafat yunnal Ahilud, 'ajtz'ib' yaj 'a win rey.

¹⁶ A Sadoc yunnal Ahitob, yet' Ahimelec yunnal Abiatar, ya'mal 'och sti eb' 'anma 'a Dios yaj eb', ax pax Savsa, a tz'ib'n 'ab'ix.

¹⁷ Ax Benaía yunnal Joiada, a yajl yaj 'a yib'n̈ eb' quereteo yet' eb' peleteo. Ax eb' yunnal David cha, a eb' sat yaj scolwj yet'oc.