1 Cr 17 - Chuj San Sebastian Bible

Strato Dios yet' David

¹ A 'a yic cajn xo 'ec' David 'a yol jun sdespacho 'a'to, 'ix yaln 'ixtc 'a Natán, atn win schecb' Dios: —'Ilto, an tic 'ayn xo 'och 'a yol in despacho to nab'a c'ute 'aych 'a 'a, palta ax pax scaxail strato Jehová, ata 'ay 'a yol jun mantiado, xchi.

² 'Ix yaln Natán 'ixtc 'a David: —Tztac' tza b'o smasnil tas tza nib'j a b'o', yujto 'aych Dios et'oc, xchi.

³ A 'a yic jun 'ac'wl cha, 'ix yaln Dios 'ixtc 'a Natán:

⁴ 'Ixic, 'at al 'a in checb' David, to an Jehová in, an tzwal 'ixtc 'a 'a: Man̈oc ach 'oj a b'o chan̈ junc watut 'aj 'oj in can cajan.

⁵ Yictax wi'n 'elt eb' e mam eyichm 'a Egipto, masnto 'a jun c'u tic, may xon 'ajtil in 'aj 'a yol junc n̈a, palta to an̈j 'a yoltc mantiado tzin 'eq'ui.

⁶ 'A smasnil tiempo in b'eyc' yet' eb' in chon̈ab', may 'ajtil waljnac 'a eb' syajlil eb' tz'i'n b'eyoc, to tzb'o eb' junc watut nab'a c'ute tz'och 'a 'a, xchi Jehová, xa chi 'a 'a.

⁷ Tzaln pax 'a jun in checb' David cha, chajtlto an Jehová in tzta'n̈j wuj smasnil, an tzwal jun tic: An ach wij 'el 'a spatc no calnelu, yic tzach wa'n 'och syajlilc in chon̈b' Israel.

⁸ Tzann̈j 'ajtil ach 'eq'ui, caw 'aynn̈ej 'och et'oc, in satjnac 'el smasnil eb' 'ajc'ojl yajch 'ayach, xwi'n q'ue'ch a b'inab'ilal, 'icha sb'inax eb' niwc winc 'a yolyib'n̈q'uinl tic.

⁹ An̈jtona', in b'ojnac jun e lugar 'aj wach' tzex can cajn ax in chon̈b' ex tic. Man̈x 'a b'a'n̈ 'ay mach 'oj eyi'n 'el 'a 'a, man̈x 'a eb' tu snab'en 'oj eyixtn 'icha 'a yictax pecti',

¹⁰ yic xwa'n 'och eb' eyajlil ex 'i'n b'eyoc. An 'oj wic' 'ejm smasnil eb' 'ajc'ojl yajch 'ayex. An Jehová in, tzwa'cn ojcoc to 'oj wa'chn̈ej yopiso eb' en̈til.

¹¹ A yic 'oj lajwc c'och a q'uinal, yic 'oj a chami, an 'oj wa'ch junc eb' onnal reyl a jeloc, ax wa'n yic' yip yopiso cha.

¹² A 'oj b'onc chan̈ junc watut yic 'emmquilal cha, ax eb' yin̈til 'oj ya'n̈j eb' yajlil 'a sdespacho 'a smasnil tiempo.

¹³ An 'oj woch mamb'il-l 'a 'a, ax 'oj 'och 'unnab'ilal 'ayin. Ma'oj wi'l in chamc'ojlal 'a 'a, man̈ 'ichaoc wutjnac in b'a yet' Saúl yic wi'n 'el 'a yopiso yic ach xo ach wa'cn 'och sjeloc.

¹⁴ An 'oj wa'xcan 'och en̈tl a jelc reyl 'a yib'n̈ in chon̈b' 'a smasnil tiempo, xchi Dios, xa chi 'a 'a, xchi Dios 'a win Natán.

¹⁵ Xlajw cha, 'ix yaln Natán smasnil jun tzo'n̈ tic 'a David, 'icha wal 'ix yutj yilni mto yab'ni, 'ixta xyutj yalni.

A slesl rey David

¹⁶ Yuj cha, 'ix 'och rey David, 'ix 'em wocn paxtinc 'a yojltac Jehová, 'ix yaln 'ixtic: Mamin Jehová in Diosal, ¿tas wal wilx tzela, an̈jtona tas pax yilx eb' in mam wicham, yuj cha, tzin a'n 'och 'a jun niwquil 'opiso tic?

¹⁷ Man̈ocn̈ej jun tic ach in Diosal, palta wan aln can 'ayin to 'oj ac' a wach'c'ojlal 'a yib'n̈ eb' win̈tl yic b'aq'uin̈. Lajn xoj tzin otj in eln 'och 'icha jun tzo'n̈ niwc winac.

¹⁸ ¿Tas to tztac' waln 'aych yuj jun 'opiso tzac' 'ayn an a checb' in tic? Ach tic, caw ojtac to a checb' in.

¹⁹ Mamin Jehová, yuj a chamc'ojlal 'ayin, a tzyal 'ixta tz'el 'a a c'ojl a'n smasnil jun tzo'n̈ 'opiso satjub'tac yilx tic 'ayin, yic tzcheclj 'eli, to caw niwn el'chi.

²⁰ Mamin Jehová, toc 'ay junc xo mach lajn et'oc, toxn may junc comn dios tztac' slajb'tzan sb'a et'oc, a tzyal xcutj cab'n an̈ tic on̈.

²¹ Ax pax an̈ a chon̈b' israel on̈ tic on̈, ¡toc 'ay junc xo chon̈b' lajn quet' 'a sat lum tic on̈! Ach in Diosal, ach on̈ a col on̈ yic tzon̈ 'och a chon̈b'oc. Caw 'ix b'inax sniwquil-l el'ch cuj on̈, yujto 'ix a b'o jun tzo'n̈ tas to satjub'tac yilxi. Ach 'ix ej 'el jun tzo'n̈ nacion̈ 'a yojltac eb' qui mam quichm a coljnac 'elt 'a Egipto on̈.

²² Yujto ach 'ix on̈ a'cn 'och an̈ israel on̈ tic a chon̈b'oc 'a jun 'ejmn̈ej, ach tic Mamin Jehová, qui Diosal ach on̈.

²³ Ax ticnec Mamin Jehová, a 'a paxti 'ix alcn wuj an a checb' in tic, yet' pax yuj win̈tl b'aq'uin̈, te'n cab' yaj 'a smasnil tiempo, b'o cab' 'icha xotj aln tic.

²⁴ ¡'El'choc cab' jun 'ix al tic, 'ijx cab' chan̈ a b'i 'a smasnil tiempo! 'Oj alxoc chajtlto ach tic Jehová tztac' 'oj smasnil, qui Diosal ach an̈ a chon̈b' israel on̈ tic, caw yel qui Diosal ach on̈. ¡Ax win̈tl an a checb' David in tic, te'n cab' yaj 'a yopiso 'a ojltac!

²⁵ Ach tic in Diosal ach, 'ix ac' wojcoc 'eli, to a win̈til, caw 'oj 'ochn̈j 'a yopiso, yuj wal cha, tzin te'wtzan in b'a in leslwi 'a ojltac.

²⁶ A ticnec Mamin Jehová, ach tic Dios ach, ach 'ix alcn jun wach'l tic 'ayin.

²⁷ Ax ticnec, 'ix 'el 'a a c'ojl a'n a yaxilal 'a yib'n̈ eb' win̈til, sec wach' 'ayc'n̈ej eb' 'a ojltac. Ach tic Mamin Jehová 'oj ac' a yaxilal 'a eb', sec wach' 'oj scha eb' yaxilal 'a smasnil tiempo, xchi rey David.