1 Cr 14 - Chuj San Sebastian Bible

Xya't Hiram schecb' 'a David

¹ A win Hiram sreyl chon̈b' Tiro, 'ix ya't schecb' 'a David. An̈jtona', xya't eb' albanil, yet' eb' josmte', 'ix yi'n 'at eb' te c'ute yet'oc, yic tzb'on chan̈ eb' sdespacho David.

² Yuj cha, 'ix nachj 'el yuj David chajtlto a Jehová 'ix 'a'n 'och reyl 'a yib'n̈ chon̈b' Israel. Caw 'ix 'ijx chan̈ yopiso yujto 'ay schamc'ojlal Jehová 'a schon̈ab'.

Jun tzo'n̈ xo eb' yunnal David

³ 'Ix yi'n David chi jun tzo'n̈ xo eb' 'ix 'ix yistloc 'a Jerusalén, yuj cha, caw 'ayt yunnal yet' yisl x'alj yet' eb' 'ix.

^4-7 A sb'i jun tzo'n̈ xo eb' yunnal David x'alj 'a Jerusalén, atn eb' tic: Samúa, Sobab, Natán, Salomón, Ibhar, Elisúa, Elpelet, Noga, Nefeg, Jafía, Elisama, Beeliada yet' Elifelet.

'Emnc eb' filisteo yuj David

⁸ A yic 'ix yab'n eb' filisteo chajtlto tox 'ix 'och David reyl 'a yib'n̈ smasnil chon̈b' Israel, 'ix cot eb' yac' owl yet'oc. A yic 'ix yab'n David cha, 'ix 'elt yac' owl yet' eb' filisteo cha.

⁹ 'Ix jaw eb' 'ajc'ojl chi yixtc eb' 'anma 'a lum pan̈n 'a'lic 'a yol yic Refaim.

¹⁰ 'Ix sc'anb'n David 'a Dios 'ixtic: —¿Tztac' am wa'n owl yet' eb' filisteo tic? ¿'Oj a'ch am eb' 'a yol in c'ab'? xchi. 'Ix ta'w Jehová 'a 'ixtic: —'Ac' owl yet' eb', yujto an 'oj wa'ch eb' 'a yol a c'ab', xchi.

¹¹ 'Ix q'ue'ch David yet' eb' soldado 'a jun lugar tzcuch Baal-perazim, ata 'ix 'ajx ganar eb' filisteo yu'uj. Yajn̈ej 'ix yaln 'ixtic: 'Icha wal tzyutj sjacn a a sb'e, 'ixtnta 'ix yutj Jehová sjacn b'e 'ayn 'a scal eb' 'ajc'ojl yajch 'ayin, xchi. Yuj cha, xya'n scuch jun lugar chi Baal-perazim.

¹² 'Ix yactn can eb' filisteo jun tzo'n̈ sdiosal ta', ax David 'ix 'a'n n̈usxoc tz'a'oc.

¹³ Palta 'ix c'ochx eb' filisteo yixtc eb' 'anma jun 'ejm xo 'a jun pan̈n 'a'lic cha,

¹⁴ yuj cha, 'ix sc'anb'n pax David jun 'ejm xo 'a Dios. 'Ix ta'w Dios 'a 'ixtic: —Man̈x ex 'eltc 'a sat eb', palta to tzex 'och oyn 'a eb', sec wach' 'oj e jaw 'a spatquil eb'. Ata tzex 'elt eyac' owl yet' eb' 'a 'aj 'ay eb' te bálsamo.

¹⁵ A yic 'oj ab'noc, 'icha to 'ay mach tzc'an̈ sb'eyc' 'a schon eb' te te cha, yajn̈ej tzex 'elt eyac' owl yet' eb'. 'Ixta 'oj wutc in ch'oxni, to an Dios in 'oj in b'ab'l 'elt 'ayex, yic tzin miln cham eb' soldado filisteo cha, xchi Dios.

¹⁶ 'Icha wal 'ix yutj Dios yalni, 'ixtnta 'ix yutj David. Yuj cha, xlajw 'el eb' soldado filisteo, tzchaj 'at 'a Gabaón masnto 'ix c'och 'a Gezer.

¹⁷ 'Ixta 'ix 'aj yijx chan̈ sb'inab'ilal David yet' sjelnal 'a sat smasnil nacion̈, ax Jehová a 'ix 'a'n xiwc'ojlal 'a jun tzo'n̈ nacion̈ chi yuj David.