1 Cr 12 - Chuj San Sebastian Bible

Eb' junn̈j yaj yet' David

¹ Atn jun tzo'n̈ eb' tic 'ix jaw wul ya'ch sb'a yet' David 'a lum Siclag, xcolwj eb' yet' David 'a owal, yic 'el-lal yaj 'a Saúl win yunnal Cis.

² A jun tzo'n̈ soldado cha, yet'n̈j eb' sjul-lab', yet' pax eb' smejech', tztac' sjulwj eb' yet' sc'ab' schab'il. Yican Saúl eb' tic 'a yin̈tl Benjamín:

³ Atn eb' tic: Ahiezer, a yajl yaj yet' Joás atn yu'tac, yunnal Semaa eb', 'aj chon̈b' Gabaa eb'; Jeziel yet' Pelet, yunnal Azmavet eb'; Beraca yet' Jehú 'aj chon̈b' Anatot.

⁴ Ismaías 'aj Gabaón, atn jun tic 'aych stz'acb'oc eb' 30 caw jelan, a 'aych pax yajlilal 'a yib'n̈ eb': Jeremías, Jahaziel, Johanán, Jozabad 'aj Gedera,

⁵ Eluzai, Jerimot, Bealías, Semarías, Sefatías 'aj Haruf;

⁶ Elcana, Isías, Azareel, Joezer yet' Jasobeam yin̈tl Coré eb' tic;

⁷ Joela yet' Zebadías yunnal Jeroham eb', win 'aj Gedor.

⁸ An̈jtona yet' pax jun tzo'n̈ eb' yin̈tl Gad, 'ix ya'ch sb'a eb' yet' David yic 'ayc' 'a q'uen n̈aq'uen 'a lum cusltac lu'um. Caw jeln eb', cuywnac eb' ya'n owal, yet' eb' smaclab' sat jul-lab', yet' pax eb' slanza. Owltac yilx sat eb' 'icha no león, caw jeln sb'ey eb' 'icha no c'ultquil chej 'a jolmctac witz.

^9-13 Atn sb'i ewin tic: Eser, Obadías, Eliab, Mismana, Jeremías, Atai, Eliel, Johanán, Elzabad, Jeremías, yet' Macbanai.

¹⁴ Atn jun tzo'n̈ ewin tic, yin̈tl Gad eb', scapitan̈il eb' soldado yaj eb'. A junc win 'emncn̈ej yopiso, jun ciente soldado tzyac' mandar, ax junc win niwquil yopiso, jun mil soldado tzyac' mandar.

¹⁵ A ewin tic, 'ix c'axw 'ec' eb' 'a a Jordán, 'a b'ab'l 'uj 'a yol ab'il, atn 'a yic 'ix q'uib' chan̈ a', yic xpultz'j 'el a 'a yol sb'e. A eb' 'anma cajn 'a jun tzo'n̈ pan̈n 'a'lic 'a stojlal 'aj tzq'uel c'u, yet' 'a stojlal 'aj tz'ejm c'u, 'ix pechx 'el eb' yuj ewinac.

¹⁶ An̈jtona', 'ay pax jun tzo'n̈ eb' yin̈tl Benjamín, yet' eb' yic Judá, xwul ya'ch sb'a eb' yet' David yic 'ayc' 'a q'uen n̈aq'uen 'aj 'ayq'ui.

¹⁷ 'Ix 'at David chi scha eb', 'ix yaln 'a eb' 'ixtic: Toto tzex jaw 'a junc'ojlal, yic tzex colwj wet'oc, 'oj ex in cha jawc wet' 'a smasnil in c'ojol; wach'xam may junc tas tu x'el in b'oni, palta toto tzex jaw 'ayn yuj in eya'n 'och 'a yol sc'ab' eb' 'ajc'ojl yajch 'ayin, ¡ax cab' qui Diosal yet' eb' qui mam quichmec, 'oj yil sb'a eyet'oc, yic tzya'n 'och eyailal! xchi 'a eb'.

¹⁸ 'Ix 'och Yespíritu Dios 'a Amasai syajlil eb' 30 cha, 'ix yaln 'ixtc: ¡Ach David yunnal Isaí, ec caj on̈, 'oj qui can et'oc! ¡Junc'ojlal cab' aji! ¡Junc'ojlal cab' aj yet' eb' xcolwj et'oc, yujto a qui Diosalec a xcolwjn̈ej pax et'oc! xchi. 'Ix schaj David eb', 'ix ya'n 'och eb' capitan̈il 'a scal eb' syajlil eb' soldado cha.

¹⁹ An̈jtona', 'ix ya'ch sb'a jun tzo'n̈ eb' yin̈tl Manasés yet' David, yic 'ijn cob' s'at eb' yet' eb' filisteo yic ya'n eb' owl yet' Saúl. Palta ma'ix colwj yet' eb', yujto a yic syamn sb'a eb' syajlil eb' filisteo cha, 'ix schecn meltzjc eb' David 'a Siclag. 'Ix yaln eb' 'ixtic: ¡'Ay smay tzon̈ smil cham winac, ax yet' Saúl chi tz'ochi, atn syajlil win cha! xchi eb'.

²⁰ Ax yic wan sjaw David 'a Siclag, 'ix ya'n 'och sb'a jun tzo'n̈ eb' yin̈tl Manasés yet'oc, atn Adnas, Jozabad, Jediael, Micael, Jozabad, Elihú yet' Siletai. A eb' tic yajl yaj junjn eb' 'a yib'n̈ junjn mil eb' soldado 'a scal eb' yin̈tl Manasés.

²¹ A eb' tic caw jeln eb' smasnil, 'ix 'och eb' capitan̈il 'a yib'n̈ eb' soldado David. 'Ix colwj eb' yet' David cha, yic xya'n owl yet' nan̈l eb' soldado 'elc'um.

²² Junjn c'u tzq'uib' sb'isl eb' soldado David, masnto caw niwn 'ix 'aj sb'isl eb', caw 'ay yip eb' si'mb'il.

Eb' soldado rey David

²³ Atn slistail jun tzo'n̈ eb' syajlil eb' soldado tic caw jeln 'a owal. 'Ix jaw eb' wul ya'ch sb'a yet' David 'a Hebrón, yic tz'ajx 'och reyl sjelc Saúl, a tzyal 'ixta yaln can Jehová:

²⁴ A 'a eb' yin̈tl Judá 'ay 6,800 winc 'et'jnac tzmacn sat jul-lab', yet' pax eb' slanza, caw lista yaj eb' s'at 'a owal.

²⁵ 'A eb' yin̈tl Simeón, 'ay 7,100 soldado caw tec'an, tzyal sc'ojl eb' tz'at 'a owal.

²⁶ 'A eb' yin̈tl Leví, 'ay 4,600 eb'.

²⁷ 'Ay pax 3,700 eb' 'a yin̈tl Aarón, a Joiada a 'aych yajlilc 'a yib'n̈ eb'.

²⁸ A Sadoc, quelm to, caw tec'an, tzyaln̈j sc'ojl s'at 'a owal. 'Ay 22 eb' yican yajl yaji, ajun eb' yet'oc.

²⁹ A 'a eb' yin̈tl Benjamín, atn eb' yican Saúl 'ay 'oxe mil eb' xya'ch sb'a yet' David, ax jantcto eb' ma'ix ya'ch sb'a, 'ix can eb' yet' eb' yin̈tl Saúl.

³⁰ 'A eb' yin̈tl Efraín, 'ay 20,800 soldado caw tec'an, caw b'inab'il eb' 'a scal eb' yican.

³¹ 'A spacl eb' yin̈tl Manasés 'ay wajxclajn̈e mil winac, tox 'ix can 'a yib'an̈, yic tz'at ya'nc 'och eb' David 'a reyal.

³² 'A eb' yin̈tl Isacar, 'ay chab' ciente eb' yajal, 'ix jaw eb' yet' smasnil eb' winc tzyac' mandar. A jun tzo'n̈ eb' tic, caw wal tznachj 'el yuj eb' tas yowlal tzb'o chon̈b' Israel, b'a'n̈ pax 'oj 'el'choc.

³³ 'A eb' yin̈tl Zabulón 'ay 50 mil eb' soldado caw wal stiempo s'at 'a owal, yet' eb' junjn c'aj smasnil yamc'ab' yic owal, tzya'ch eb' 'a sc'ojl s'at 'at scol David, may schab'c'ojlal eb'.

³⁴ 'A eb' yin̈tl Neftalí, 'ay jun mil capitan̈ yet' 37 mil soldado, yet' eb' slanza yet' pax eb' smacnb'il sat jul-lab'.

³⁵ 'A eb' yin̈tl Dan, 'ay 28 mil eb' soldado, caw tzya'ch eb' 'a sc'ojl s'at 'a owal.

³⁶ 'A eb' yin̈tl Aser, 'ay 40 mil eb' soldado, lista yaj eb' s'at 'a owal.

³⁷ Ax 'a scal eb' 'ay 'a junx sc'axpil 'ec' a Jordán, 'ay 120 mil winc 'a 'a eb' yin̈tl Rubén yet' 'a yin̈tl Gad yet' pax 'a spacl eb' yin̈tl Manasés, lista pax yaj eb' s'at 'a owl cha, yet' eb' smasnil junjn c'aj yamc'ab' yic owal.

³⁸ A smasnil jun tzo'n̈ eb' soldado tic, caw xya'ch eb' sc'ojl s'at 'a owal. Yuj cha, stzol-l x'aj eb' s'at 'a Hebrón. Wal 'a smasnil sc'ojl eb', x'at eb' yic tz'at ya'nc 'och eb' David reyl 'a yib'n̈ smasnil eb' israel. An̈jtona jun tzo'n̈ xo eb' yit israelal eb', junn̈j yaj snab'en eb' yic' 'ix 'och David reyal.

³⁹ 'Oxe c'u 'ix can eb' yet' David chi ta'. 'Ix wa eb', xyu'j eb' tas xyuq'uej, yujto a eb' yit chon̈b' eb', sb'o eb' janctcn̈ej tas 'ix c'uxx cha.

⁴⁰ An̈jtona pax eb' cajn 'a stz'ey eb', 'icha eb' yic Isacar, eb' yic Zabulón yet' eb' yic Neftalí, 'ix yij cot eb' tas tzc'uxx 'a yib'n̈ no b'uru, no cameyo, no mula, yet' pax no mam wacax. Til wal sc'ajquixtacl tas tzc'uxx 'ix yij cot eb'; atn 'ixm harina, tacn̈ higo, yal uva, aceite, no mam wacax, yet' no calnelu, caw 'ix yac' sobra, yujto til wal tzaljc'ojlal 'a chon̈b' Israel.