1 Cr 11 - Chuj San Sebastian Bible

A David, sreyl Israel yet' Judá

¹ Xlajw cha, 'ix syamn sb'a smasnil eb' israel, 'ix 'at eb' paxtinc yet' David 'a Hebrón. 'Ix yaln eb' 'a 'ixtic: An̈ tic on̈, 'in junn̈j qui mam 'ichm et'oc.

² A 'a yic yaln̈taxi, wach'xam 'aych Saúl reyal, palta ach on̈ a jucb'tzej an̈ israel on̈ tic, yic qui 'atc 'a owal. An̈jtona', 'ix yaln pax Jehová qui Diosalec 'ayach, to ach 'oj on̈ a jucb'tzoc, ax a'n pax reyl 'a quib'n̈ an̈ israel on̈ec tic, xchi eb' 'a 'a.

³ Ax smasnil eb' 'ichmtac winac, 'ix 'at eb' paxtinc yet' rey David 'a Hebrón, 'ix sb'on jun strato yet' eb' 'a yojltac Jehová. 'Ixta 'ix yutj eb' ya'n can 'och David 'a yopiso, yic tz'och sreyloc eb', 'icha yutjnac Samuel yaln yuj Jehová.

'Emnc chon̈b' Sión yuj David

⁴ Xlajw cha, 'ix 'at David yet' eb' yit israelal 'a Jerusalén, atn pax tzcuch Jebús. A eb' jebuseo cajn 'a jun lugar cha,

⁵ 'ix yaln eb' 'ixtc 'a David: Ach tic, ¿tom 'oj stac' oxt 'a tic a nani? xchi eb'. Palta 'ix 'ajx ganar Sión yuj David, yuj cha, 'ix 'ajx can sb'ic Schon̈b' David.

⁶ A David cha, yaljnacx 'ixtic: A mach 'oj b'ab'l milnc cham junc eb' jebuseo tic, a 'oj wa'ch syajlilc eb' soldado, xchi. Ax x'aji, a mach xb'ab'lji, atn Joab yune 'ix Sarvia, yuj cha, a x'och syajlilc eb' soldado.

⁷ Xlajw cha, 'ix can David 'a scuartel 'a Sión, yuj pax cha, xya'n eb' sb'ic can Schon̈b' David.

⁸ 'Ix ya'n David b'o jun tzo'n̈ n̈a 'a spatquil 'el chon̈b' cha, tzchaj 'at 'a 'aj lan̈b'il, masnto 'a 'aj 'ay smuroal chon̈ab'. Ax Joab a 'ix jucb'tzan eb' xwach' b'on jab'x stz'acb' jun chon̈b' cha.

⁹ Ax David, caw 'ipn swach' 'i'n yip 'a yopiso, yujto a Jehová tztac' yuj smasnil, a 'aych yet'oc.

'Ay eb' soldado rey David caw jelan

¹⁰ Atn jun tzo'n̈ eb' soldado David niwn yel'ch tic, to 'ix 'och eb' yet' eb' yit israelal yic xya'n 'och eb' David reyl 'a yib'n̈ smacb'en chon̈b' Israel, 'ix yiptzan pax eb' 'a sreyal, 'icha wal 'ix yutj Jehová yalni.

¹¹ Atn yab'xil jun tzo'n̈ eb' soldado David caw jeln tic: A Jasobeam, yunnal Hacmoni, a b'ab'l yajl yaj 'a scal eb' 'oxwn̈ yit jelnal. A yic jun 'el 'ix smil cham 'oxe ciente winc yet' slanza.

¹² Ax junx 'a scal eb' 'oxwn̈ caw jeln cha, atn Eleazar yunnal Dodo win ahohíta.

¹³ 'Ayc' yet' David 'a Pas-damim, yic 'ix syamn sb'a eb' filisteo ya'n owl ta'. Ata pax 'awb'il nan̈l 'ixm cebada. Wach'xam 'ix 'at eb' soldado israel 'elc 'a eb' filisteo,

¹⁴ palta ax eb' schawn̈il, a 'a scal 'ixm cebada chi x'och lin̈n eb' scol sb'a. 'Ix 'ajx ganar eb' filisteo chi yuj eb', yujto a Jehová 'ix 'a'n yac' ganar eb'.

¹⁵ A 'a yic jun 'el, a 'oxwn̈ eb' soldado 'a scal eb' 30 yit jelnal sb'a, 'ix b'ey't eb' 'a sat q'ue'en, yic tz'at schanoc eb' David 'a q'uen n̈aq'uen tzcuch Adulam. Ax scamplamento eb' filisteo cha, ata 'ay 'a jun pan̈n 'a'lic 'a yol yic Refaim.

¹⁶ A David cha, ata 'ayc' 'a q'uen n̈aq'uen cha, ya' sb'a ax nan̈l eb' soldado filisteo ata 'ayc' eb' 'a Belén.

¹⁷ 'Ix yaln David chi 'ixtic: ¡Comnoc wal 'ay mach tz'a'n wuc' jac a 'uc'b'ila 'ay 'a sti spuertail chon̈b' Belén! xchi.

¹⁸ Yuj cha, ax eb' 'oxwn̈ soldado caw jeln cha, 'ix 'och eb' 'a scamplamento eb' filisteo, 'ix 'at slechnc q'uet eb' a 'uc'b'ila 'ay 'a sti spuertail Belén cha, 'ix yi'n cot eb' a 'a David. Palta ma'ix yal sc'ojl David to xyuq'uej, ton̈j sec 'ejm ofrendail 'a Jehová.

¹⁹ 'Ix yaln 'ixtic: ¡A cab' Dios matz chan wuc' jun a a tic! ¡To ma'ay 'icha to a schic'l jun tzo'n̈ winc tic tzwu'j 'ejmi, Yujto 'ix ya'ch sb'a eb' 'a yol sc'ab' chamel, yic x'at yi'nc eb' a'! xchi. Yuj cha, ma'ix yal xon sc'ojl xyuq'uej. Atn jun tic 'ix sb'o eb' 'oxwn̈ caw jeln cha.

²⁰ A Abisai yu'tac Joab, a yajl yaj 'a yib'n̈ eb' 30 caw jeln cha. A xmiln cham 'oxe ciente winc yet' slanza. 'Ixta 'ix yutj swach' 'i'n yopiso 'a scal eb' 30 cha.

²¹ Caw wal niwn yel'ch 'ix 'aj 'a yib'n̈ eb' 30 cha, a x'och syajlilc eb'. Palta ma'ix q'ue'ch 'icha eb' 'oxwn̈ b'ab'l cha.

²² A Benaía, yunnal Joiada 'aj chon̈b' Cabseel, caw wal jelan, til wal tas 'ix 'el sb'oni. Atn 'ix miln cham chawn̈ eb' yunnal Ariel 'aj Moab. An̈jtona', 'ix 'ejm 'a yojl jun lum xab', ata sma' cham jun no león yic stiempoal 'ay sacb'acum.

²³ An̈jtona', 'ix smiln pax cham jun win 'aj Egipto, jab'xoj may nan̈l yoxl metro ste'il winac, caw wal niwquil spatquil yoc slanza winac. Palta 'ix sjab'ch Benaía jun te te 'a winac, 'ix yi'n 'ec' slanza win chi 'a sc'ab', ax yet' jun slanza win chi 'ix smil chamoc.

²⁴ Atn yuj jun tzo'n̈ 'ix sb'o cha, 'ix yi'n wal Benaía yopiso 'a yib'n̈ eb' 30 to caw jeln cha.

²⁵ Caw wal niwn yel'ch x'aj 'a yib'n̈ eb' 30 cha, palta ma'ix q'ue'ch 'icha eb' 'oxwn̈ b'ab'el. 'Ix ya'ch David syajlilc eb' 'aych stan̈maloc.

^26-47 Atn slistail eb' caw jeln tic: Asael yu'tac Joab, Elhanán yunnal Dodo 'aj Belén; Samot 'aj Harod, Heles 'aj Pelón, Ira yunnal Iques 'aj Tecoa; Abiezer 'aj Anatot; Sibecai 'aj Husa; Ilai 'aj Aho; Maharai 'aj Netofa; Heled yunnal Baana 'aj Netofa paxi; Itai yunnal Ribai 'aj Gabaa, a jun cha, ata 'ay 'a yol yic Benjamín; Benaía 'aj Piratón; Hidai 'aj sti a Gaas, Abiel 'aj Arba. Azmavet 'aj Bahurim; Eliaba 'aj Saalboni; eb' yunnal Hasem 'aj Gizón; Jonatán yunnal Sage 'aj Arar; Ahiam yunnal Sacar 'aj Arar paxi; Elifal yunnal Ur; Hefer 'aj Mequera; Ahías 'aj Pelón; Hezrai 'aj Carmel; Naarai yunnal Esbai; Joel yu'tac Natán; Mibhar yunnal Hagrai; Selec 'aj Amón; Naharai 'aj Berot, a win tic 'et'jnac yamc'ab' yic owal, atn syamc'ab' Joab yune 'ix Sarvia; Ira 'aj Jatir, Gareb 'aj Jatir paxi. Urías win hitita; Zabad yunnal Halhai; Adina yunnal Siza, yic Rubén, a yajl yaj 'a yib'n̈ eb' yin̈tl Rubén cha, 30 eb' ajun yet'oc. Hanán yunnal Maaca; Josafat 'aj Mitán; Uzías 'aj Astarot; Sama yet' Jehiel yunnal Hotam 'aj Aroer; Jediael, yet' Joha yunnal Simri eb' 'aj Tiza; Eliel 'aj Mahanaim, Jerebai yet' Josavía, yunnal Elnaam eb'; Itma 'aj Moab. A Eliel, Obed, yet' Jaasiel 'aj Soba eb'.