1 Co 9 - Chuj San Sebastian Bible

A tas smoj schan eb'*r* schecb' Jesucristo

¹ An tic, wal yel, schecb' in Jesucristo. Wiljnac Cajlil Jesús cha. Yuj cha, 'ay waln wic 'icha eb' schecb' smasnil. Ax xo, 'ochnc ex creyenteal yuj in munljel 'a yic Cajlil cha.

² Wach'xam 'ay jun tzo'n̈ xo eb' tzalni, to man̈ in schecb'oc Cristo, palta ax xo, eyojc xoni to schecb' waji. Caw ch'oxnb'il eyaji, to schecb' waji, yujto wu'uj, 'aych e c'ojl 'a Cristo.

³ 'Ay eb' tu tzaln 'a in patic. Palta 'ixtc tzwutj waln pax spac 'a eb'.

⁴ An tic, 'ay waln wic in chan tas tzin c'uxu, yet' tas tzwuq'uej.

⁵ Q'uinloc 'ay junc canb'ec tz'och wistloc, 'ay waln wic wi'n 'at 'a 'aj tzin 'eq'ui. Yujto 'ixta tzyutj sb'a jun tzo'n̈ xo eb' schecb' Cajlilec, yet' eb' yu'tac Cajlilec cha, yet' pax Pedro.

⁶ ¿Tom may waln wic in chan jac colwal yet' Bernabé tic tze na'a? ¿Tom yowlal an̈ja tzin munlji yic tzin sayn jac in gasto? ¿Tom cojn jun tzo'n̈ xo eb' schecb' chi 'ay yaln yic e nani?

⁷ 'Iltec eb' soldado. ¿Tom 'ay junc eb' mun tzsay sgasto? Yet' eb' tz'awn junc tas, yowlal tzc'ux eb' tas tz'el-l 'a smunljel, an̈jtona', 'ixta pax eb' tan̈m calnelu, 'ay yaln eb' yic yu'n yim no'.

⁸ Palta a jun tzo'n̈ tic tzwal't 'ayx tic, man̈ snab'enoc 'anma'. A 'a ley yic Moisés, ata yaljnac can Dios jun tzo'n̈ tic.

⁹ A 'a jun ley cha, ata tz'ib'b'il can pax junx tic, 'a 'aj tzyal 'ixtic: Man̈ eya'ch spa no wacax, yic tzte'w trigo no', xchi. Man̈ yujocn̈ej no wacax, yaln can Dios jun tzo'n̈ tic,

¹⁰ palta cujec. A jun ley tic, tz'ib'b'il cani, sec tznachj 'el cujec. Yujto a eb' t'ocm lu'um, yet' eb' te'm trigo, a yic tzmunlj eb', tzya'ch eb' yipc sc'ojol, to 'oj sc'ux eb' yel-l jun smunljel cha. 'Icha eb' tzmunlj cha, 'ixta pax caj an̈ schecb' on̈ Cristo tic on̈.

¹¹ A yic quec' 'a e cal on̈, 'icha to 'ay tas 'ec' cawjnac can 'ayx on̈. A jun cha, yic espíritu. Yuj cha, ¿tom man̈ smojc tzqui chaj qui gasto 'ayx yuj spac qui munljel chi 'on̈?

¹² 'Ay jun tzo'n̈ xo eb' 'ay yaln yic schan yic 'ayex. Yuj cha, an̈ tic on̈, yel xo wal 'ec'b'al 'ay caln quic 'ayx on̈. Palta wach'xam 'ay caln quic 'ayx on̈, mant 'a jun 'ejmoc qui c'anjnac qui gasto 'ayx on̈. Caw tzcac' techjoc smasnil tas on̈, sec wach' niwn yel'ch yab'xil Cristo 'a 'ajtc tz'ec' cal-l on̈.

¹³ Eyojc xoni, a eb' tzmunlj 'a yatut Dios, ata tzchaj eb' tas tzc'uxu. Yujto a eb' 'ay yopiso ya'n xajmb'al, 'ay yaln eb' yic schin schib'jal no noc' chi tzyac' eb' xajmb'al-l cha.

¹⁴ An̈jtona', 'ixta pax eb' tz'ec' alnc 'el wach' 'ab'x yic colnb'il. Yujto yaljnac can Cajlilec, to yowlal tzchaj eb' sgasto 'a spatquil 'aj tzmunlj cha.

¹⁵ An tic, wach'xam 'ay waln wic yet' eb', palta mant 'a 'aj xin c'an jun tic jun 'ejmoc. Ton̈j tzwal't jun tzo'n̈ tic 'ayex. Man̈ yujoc in c'ann in gasto tzin tz'ib'n 'at jun tzo'n̈ tic. Tzin na'a, yel xom wach' tzin chami, 'a yib'n̈ to tzin c'an in gasto 'ayex. Yuj jun tic 'ay waln wic in tzalj 'a sat Dios. May mach tztac' yi'n 'ec' jun in tzaljc'ojlal tic.

¹⁶ An tic, wach'xam tz'ec' wal-l wach' 'ab'x yic colnb'il, man̈ yujoc cha, tztac' in b'an̈n in b'a. Yujto yowlal tz'ec' wal-li. Caw wal 'oltac in, toto matz 'ec' wal-l jun wach' 'ab'x tic.

¹⁷ Q'uinloc yujn̈ej in wach'loc, tz'ec' walnc 'eli. Toto 'ixta', yowlal tzin chaj in tojol. Palta tzwal-li, yujto wib'n̈ xon yaji, yujto a Dios 'a'jnac jun wopiso tic.

¹⁸ Yuj cha, a spac wan in chan ticnec, atn tzaljc'ojlal wan in chani yic tz'ec' walnc wach' 'ab'x 'a nab'an̈ej. Yujto wach'xam 'ay waln wic in c'ann in gasto 'a spatc wopiso tic, palta toxn may tas tzin c'ana.

¹⁹ Wach'xam may mach 'ay yaln yic 'ayin, palta tzwa'ch in b'a ya'malc servil smasnil 'anma', sec wach' caw niwn eb' tzmontchj 'och yico'oc Cristo wu'uj.

²⁰ A yic 'ayn 'ec' 'a scal eb' wit israelal, 'icha sb'eyb'al eb', 'ixta tzwutj in b'eyb'al jun xo, sec 'ay eb' tzmontchj wu'uj. A eb' cha, caw 'aych snab'en eb' 'a ley yic Moisés. Yuj cha, a yic 'ayn 'ec' yet' eb', wach'xam to man̈ 'ayc 'och in nab'en 'a jun ley chi yet' eb', palta caw tzin yiclj jun ley cha, sec 'ay eb' tzmontchj wu'uj.

²¹ Ax yic 'ayn 'ec' 'a scal eb' man̈ israeloc, eb' man̈ 'ayc 'och snab'en 'a jun ley cha, lajn tzwutj in nab'en yet' eb', sec 'ay eb' tzmontchj wu'uj. Palta smasnil tiempo, yowlal tzin yicljn̈ej sley Dios, yujto 'aych in nab'en 'a sley Cristo ticnec.

²² Ax yic 'ayn 'ec' 'a scal eb' mant 'a ste'nal 'a screyenteal, lajn tzwutj in b'a yet' eb'. 'Icha to mant 'a in te'nal jun xo, sec 'ay eb' tzmontchj wu'uj. Tzann̈j eb' 'aj tzin 'eq'ui, lajnn̈ej tzwutj in b'a yet' eb' smasnil, sec toq'ue 'ay eb' 'oj colchjoc can 'el wu'uj.

²³ Jantcn̈ej jun tzo'n̈ tzin b'o tic, yuj wach' 'ab'x yic colnb'il tzin b'oni, sec 'oj in cha pax swach'l yuj jun xo.

²⁴ Q'uinloc 'ay eb' 'aych 'a tajnel ticnec, tzya'n eb' carela. Eyojc xoni, smasnil eb' tzyac' carela. Palta an̈j jun tzb'ab'l c'ochi, an̈j tzchan spac yic cha. Yuj cha, 'icha eb' tz'a'n carela cha, yowlal 'ixta tzcutjec qui b'a 'a yic Cristo, sec 'oj qui chac spac quic junjn on̈ec.

²⁵ Jantcn̈ej eb' tz'och 'a tajnel cha, caw tzyac' cuenta sb'a eb' 'a smasnil tas maysch'olnil. 'Ixta tzyutj sb'a eb', sec toq'ue 'oj scha eb' spac. Palta a jun spac chi tzchaj eb' cha, ton̈j 'e'lb'a yec' muc'uc. Ax jun spac quic 'oj qui chac an̈ec tic, may b'a'n̈ 'oj lajwc 'eq'ui. Yuj cha, yowlal caw tzca'c cuenta qui b'a jun xo.

²⁶ An xo tic, 'icha junc mach caw tzyac' carela 'a tajnel, 'ixta tzwutj in b'a 'a yic Dios. Matz in chab'c'ojlej in b'a. 'Icha eb' tztajni, tzma'n sb'a eb', yaln̈ej mach tz'a'n ganar, 'ixta tzwutj in b'a jun xo. Yujto 'a smasnil in c'ojol, tzin munlj 'a yic Dios.

²⁷ Caw tzin tench wan in niwnal tic. Tzwac' cuenta in b'a si'mb'il. Yujto wach'xam til wal eb' xwawtj cot wet' 'a jun 'icha tajnel tic, palta toto matz wac' cuenta in niwnal tic, 'ay smay matz in chax 'och yet' eb'.