1 Co 8 - Chuj San Sebastian Bible

A tas tz'ajx xajmb'al-l*r* 'a jun tzo'n̈ tzalx 'och diosal

¹ A ticnec, 'oj wal yuj jun tzo'n̈ tas tz'ajx xajmb'al-l 'a jun tzo'n̈ tzalx 'och diosal, tzlajw cha, tzchix paxi. Yel tzeyala, a jun tzo'n̈ tic, tznachj 'el cujec qui masnil. Palta a qui jelnalec tic, ton̈j tzqui b'an̈c qui b'a yu'uj. Ax toto 'ay qui chamc'ojlalec 'a eb' quit creyenteal, caw tz'och ste'nal eb' cujec.

² A eb' 'ay snab'en snani, may xon jac sjelnal eb' 'icha tznib'j Dios.

³ Palta a eb' tzchamc'ojlan Dios, 'ojcab'il xon eb' yu'uj.

⁴ Ax ticnec, 'oj wal yuj jun tzo'n̈ tas tzc'uxxi, yic tox x'ajx xajmb'al-l 'a jun tzo'n̈ tzalx 'och diosal cha. A jun tzo'n̈ tzalx 'och diosal cha, cojquec, may jac yopiso eb' 'a yolyib'n̈q'uinl tic. Yujto cojn jun Dios 'ay, may junc xo.

⁵ 'Ay jun tzo'n̈ tzalx 'och diosal, tz'ec' 'a satcha'an̈. 'Ay pax jun tzo'n̈ tzalx 'och diosal 'a yolyib'n̈q'uinl tic. Yujto a eb' 'anma', til wal jun tzo'n̈ tas tzyalch eb' sdiosaloc, mto syajliloc.

⁶ Palta ax 'ayn̈ec tic, cojn jun Dios 'ay, atn qui Mamec. A qui Mamc tic, a b'ojnac smasnil tas. A b'ojnacn̈ec paxi, sec wach' tzqui ch'oxc 'el swach'il. Cojxn pax jun Cajlilec, atn Jesucristo. Yujn̈ej, 'ayc' smasnil tas. An̈jtona pax an̈ec tic, yu'uj 'ayn̈ec 'ec' paxi.

⁷ Palta man̈ smasnilc eb' creyente tznachj 'el jun tzo'n̈ tic yu'uj. 'Ay eb' caw ya'jnac 'och sc'ojl 'a jun tzo'n̈ tzalx 'och diosal cha. Yuj cha, a jun tzo'n̈ tas tz'ajx xajmb'al-l cha, yicn̈ej jun tzo'n̈ tzalx 'och diosal chi snan eb'. A jun snab'en eb' tz'a'n cuenta cha, mant 'a ste'nal. Yuj cha, tzjuw 'el snab'en eb' yic tzchin eb' jun tzo'n̈ xajmb'al cha.

⁸ Palta a jun tzo'n̈ tas tzqui c'uxu, matz on̈ sb'eyc'ojlej Dios yu'uj. Man̈toc yel xo wach'n̈ec, toto tzqui c'uxec. An̈jtona', toto matz qui c'uxec, matz on̈ 'och pax tu'al.

⁹ Wach'xam libre cajc qui c'uxn smasnil tas, palta 'ay smay tzjuw 'el eb' mant 'a ste'nal 'a screyenteal cujec. Yuj cha, yowlal tzca'c cuenta qui b'a.

¹⁰ 'Ayex eyojtac to may smay jun tzo'n̈ tzchix cha. Palta 'ay pax eb' 'a e cal mant 'a ste'nal 'a screyenteal, mant yojcoc eb' jun tzo'n̈ tic. Q'uinloc tzyil eb', to tzex 'em wocn e wa 'a 'aj 'ay jun tzo'n̈ tzyalch eb' 'anma sdiosaloc. Toto 'ixta', 'oj montchjoc 'at snab'en eb' eyu'uj, ax schin pax eb' jun tzo'n̈ tzalx xajmb'al-l cha.

¹¹ Toto 'ixta tzeyutj e b'a, 'oj juwc 'el eb' mant 'a ste'nal chi yuj tas tze b'o cha. Palta a Cristo xcham pax yuj eb'.

¹² Yuj cha, a eb' mant 'a ste'nal cha, toto eyu'uj, tzjuw 'el jun snab'en eb' tz'a'n cuenta, a 'a Cristo tz'och e mul.

¹³ Yuj cha, q'uinloc 'ay junc mach 'oj juwc snab'en yuj tas tzin c'uxu. To 'ixta', yel xo am wach' man̈x 'a chib'j 'oj in chi', sec wach' may junc eb' 'oj juwc 'el snab'en wu'uj.