1 Co 6 - Chuj San Sebastian Bible

A eb' tzyac' queja sb'a

¹ 'Ayx ab' 'ay owl 'a e cal, tzex 'at ab' e jac e b'a 'a ewin yajal. ¿Tas yuj tze te'wtzej e b'a e 'at 'a ewin yajl man̈ creyenteoc cha? ¿Tas yuj man̈oc 'a eb' yic xo Dios, man̈oc ta tz'at e b'oyaj e b'a?

² ¿Tom mant eyojcoc, to an̈ec yic on̈c xo Dios tic, an̈ec 'oj cochc yajlil 'a yib'n̈ eb' yic yolyib'n̈q'uinl tic? Yuj cha, smoj an̈ec tzqui b'oc yaj jun tzo'n̈ mayn̈ej wal yel'ch tic.

³ ¿Tom mant eyojcoc paxi, to an̈ec tic, 'oj qui b'eyc'ojloc pax eb' ángel? Yuj cha, a jun tzo'n̈ tas yic yolyib'n̈q'uinl tic, caw smoj qui b'onec pax yaji.

⁴ Yuj cha, a yic 'ay jun tzo'n̈ owl 'a e cal, ¿tas yuj a 'a eb' may yopiso yuj iglesia, ata tzex 'at e b'oyaj e b'a?

⁵ Tzwalb't jun tzo'n̈ tic 'ayex, sec 'oj e q'uixw 'eli. ¿Tom tze na'a, to may junc eb' 'a e cal tznachj 'el yu'uj? ¿Tom may junc eb' tztac' ex sb'onyaj ax creyente ex xo cha?

⁶ 'In 'ayx ton̈j tz'at laj eya'lac queja e b'a 'a sat ewin yajal, palta man̈ creyenteoc ewinac.

⁷ A yic tzlaj eya'nc queja e b'a, caw palta tzex can 'a sat Dios. Toto 'ay junc eyit creyenteal man̈ tojloc tzyutj sb'a 'ayex, comnoc ton̈j tzeyac' techjoc. Toto 'ay mach tz'elc'n junc tas 'ayex, 'a'c niwnc'ojlal 'a 'a.

⁸ Palta 'in 'ayx man̈ tojloc tzeyutj e b'a jun xo. 'In 'ayx tzex laj 'och 'elc'l jun xo. 'In 'ixta pax tzeyutj e b'a 'a eb' eyit creyenteal.

⁹ ¿Tom mant eyojcoc, to a eb' man̈ tojloc tzyutj sb'a, may yaln eb' yic sc'och 'a yol sc'ab' Dios? Caw man̈ e cha 'ixtxoc paxti e b'a. Yujto a eb' 'oj wal tic, may xon jac yaln eb' yic sc'och 'a yol sc'ab' Dios. A eb' mant 'a yistzil tzcomn b'on 'ajmulal, yet' eb' tzyal sb'a 'a jun tzo'n̈ tzalx 'och diosal, eb' 'ayx yistzil tzb'on 'ajmulal, eb' tzyixtj sb'a yet' eb' yit wincal.

¹⁰ An̈jtona', eb' 'elc'um, eb' tznib'n 'och tas 'ay 'a junc xo mach, eb' 'u'm 'an̈, eb' b'ajwjum, yet' pax eb' tzcomn to'n 'ec' junc tas 'a junc xo mach. Atn eb' tic, toxn ma'oj c'och 'a yol sc'ab' Dios.

¹¹ 'Ayn̈ec 'ixta cutjnaquec qui b'a 'a yic yalan̈. Al ticnec, 'ic'b'ilx 'el qui mul 'ayn̈ec. 'Ac'b'iln̈ec xo yico'oc Dios. A tzalni, to wach'n̈ec 'a sat ticnec. 'Ixta tzon̈ 'ajc yuj Cajlil Jesucristo ticnec, yet' pax yuj Yespíritu qui Diosalec.

Yicn̈ej Dios yaj qui niwnalec

¹² Tecn 'ayx wan eyaln 'ixtic: An̈ec tic, libre qui b'onec smasnil tas, xe chi. Yel toni libre on̈ec, palta man̈ smojc qui b'onec smasnil. Wach'xam libre qui b'onec jun tzo'n̈ cha, palta may junc tas 'aj tztac' ca'nec qui b'a 'a 'a, yic tzon̈ ya'nec mandar.

¹³ Tecn 'ayx pax tzeyal 'ixtic: A tas tzc'uxxi yic qui c'ojl yaji, yujto a qui c'ojl tic, a 'ay yic pax jun tzo'n̈ cha, xe chi. Yel toni, palta a Dios 'oj 'a'nc lajwc 'el jun tzo'n̈ chi smasnil. A qui niwnalec tic, man̈ yico'oc 'ajmulal yaji, to yicn̈ej Cajlilec. A Cajlilec chi 'aych 'a qui niwnalec tic.

¹⁴ Yuj cha, 'icha yutjnac Dios ya'n pitzwc pax Cajlil, 'ixta 'oj on̈ yutquec on̈ ya'nec pax pitzwc yet' spoder jun xo.

¹⁵ 'In eyojc xoni, a qui niwnalec tic, 'icha to sniwnal Cristo yaji. Yuj cha, ¿tom tztac' qui'nec 'at sniwnal Cristo, tz'at ca'noc yitb'eymoc junc 'ix 'ajmul 'ix, sec junxn̈ej tz'aj yet' 'ix? May ton b'i'an.

¹⁶ Yujto eyojtac, toto 'ay junc winc tzyij sb'a yet' junc 'ix 'ajmul 'ix, junxn̈ej niwnal tz'ajcn yet' 'ix. Yujto 'ixta tzyal 'a Ch'an̈ U'un̈, 'a 'aj tzyal 'ixtic: A eb' schawn̈il, junxn̈ej niwnal tz'ajcn eb', xchi.

¹⁷ Palta a yic tzca'nec qui b'a 'a Cajlil, junxn̈ej tzon̈ 'ajc can yet' 'a 'esal.

¹⁸ Yuj cha, caw tzeyij 'el e b'a 'a 'ajmulal. Yujto tzann̈j jun tzo'n̈ xo maysch'olnil tzb'o eb' 'anma', man̈oc sniwnal eb' tzmulni. Palta a mach tzb'on 'ajmulal cha, caw a 'a sniwnal chi tz'och smul.

¹⁹ Eyojc xoni, to a qui niwnalec tic, to yatut Yespíritu Dios yaji. A 'aych 'a 'a, yujto a Dios 'a'jnac 'och 'ayn̈ junjn on̈ec. Man̈x quico'oquec qui b'a ticnec,

²⁰ yujto manb'iln̈ec xo 'eli. Yuj cha, yowlal caw wach' tzcutjec ca'n cuenta qui niwnalec tic, tzqui ch'oxnec 'el qui b'a, to caw niwn yel'ch Dios.